ନ୍ୟୁୟର୍କ,୧୧ା୪: କରୋନା ଭାଇରସ୍ ସଂକ୍ରମିତଙ୍କ ସଂଖ୍ୟାରେ ବିଶ୍ୱର ସମସ୍ତ ଦେଶଠାରୁ ଆମେରିକାର ନ୍ୟୁୟର୍କ ପ୍ରଦେଶ ଟପିଯାଇଛି। କେବଳ ନ୍ୟୁୟର୍କରେ ଗୁରୁବାର ୧୦,୩୩୩ ଜଣ ସଂକ୍ରମିତ ହେବା ସହ ମୋଟ ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ୬୦ ହଜାର ଛୁଇଁଛି। ଏହି ସମୟରେ ସ୍ପେନରେ ୧ ଲକ୍ଷ ୫୩ ହଜାର ଏବଂ ଇଟାଲୀରେ ୧ ଲକ୍ଷ ୪୩ ହଜାର ଜଣ ସଂକ୍ରମିତ ହୋଇଛନ୍ତି। ବିଶେଷକରି କରୋନାର ଉତ୍ପତ୍ତିସ୍ଥଳ କୁହାଯାଉଥିବା ଚାଇନାରେ ଗୁରୁବାର ସୁଦ୍ଧା ୮୧,୮୬୫ ଜଣ ସଂକ୍ରମିତ ହୋଇଛନ୍ତି। ଏହି ଦିନ ସମଗ୍ର ଆମେରିକାରେ ୩୩,୫୩୬ଜଣ ସଂକ୍ରମିତ ହୋଇଥିବାବେଳେ ୧୯୦୦ କରୋନା ପୀଡ଼ିତ ଆଖିବୁଜିଛନ୍ତି। ଏହାସାଙ୍ଗକୁ ଆମେରିକାରେ ମୋଟ ସଂକ୍ରମିତ ସଂଖ୍ୟା ୪ ଲକ୍ଷ ୬୮ ହଜାର ଟପିଯିବା ସହ ୧୬ ହଜାର ୬୯୧ଜଣଙ୍କ ପ୍ରାଣହାନି ଘଟିଛି। ନ୍ୟୁୟର୍କ ପରେ ନ୍ୟୁଜର୍ସି ଆମେରିକାର ଦ୍ୱିତୀୟ କରୋନା ହଟସ୍ପଟ। ଏହି ପ୍ରଦେଶରେ ଆକ୍ରାନ୍ତଙ୍କ ସଂଖ୍ୟା ୫୧ ହଜାର ଟପିଯାଇଛି। ସାରା ବିଶ୍ୱକୁ ଦେଖିଲେ ଗୁରୁବାର ସୁଦ୍ଧା ସଂକ୍ରମିତ ସଂଖ୍ୟା ୧୬ ଲକ୍ଷ ଏବଂ ମୃତ୍ୟୁସଂଖ୍ୟା ୯୫ ହଜାର ପାର କରିଯାଇଛି।
ନ୍ୟୁୟର୍କରେ ଗୁରୁବାର ମୋଟ ମୃତ୍ୟୁସଂଖ୍ୟା ୭ ହଜାର ଟପିଯାଇଥିଲା, ଯାହାକି ଚାଇନାର ମୃତ୍ୟୁସଂଖ୍ୟା(୩,୩୩୫)ଠାରୁ ଦୁଇଗୁଣରୁ ଅଧିକ। ଏହି ସମୟ ମଧ୍ୟରେ ସର୍ବାଧିକ ମୃତ୍ୟୁ ଇଟାଲୀ(୧୮,୨୭୯)ରେ ଘଟିଥିବାବେଳେ ଦିନେ କିମ୍ବା ୨ ଦିନ ମଧ୍ୟରେ ଆମେରିକା ଏହି ସଂଖ୍ୟାକୁ ଟପିଯାଇପାରେ। କାରଣ ଗତ ସପ୍ତାହର ସ୍ଥିତି ଅନୁଧ୍ୟାନ କଲେ ଆମେରିକାରେ ଗତ ଶୁକ୍ରବାର ୧୦୪୬, ଶନିବାର ୧୩୩୦, ରବିବାର ୧୧୬୫, ସୋମବାର ୧୨୫୮, ମଙ୍ଗଳବାର ୧୯୭୧, ବୁଧବାର ୧୯୪୦ ଓ ଗୁରୁବାର ୧୯୦୦ ଲୋକଙ୍କ ପ୍ରାଣହାନି ଘଟିଛି। ବିଶେଷ କରି ଏପ୍ରିଲ ୧ରୁ ୯ ତାରିଖ ଯାଏ ୧୨ ହଜାର ୬୩୧ଜଣଙ୍କ ମୃତ୍ୟୁ ଘଟିଲାଣି। ଏବେ ନ୍ୟୁୟର୍କର ଶ୍ମଶାନ ବିଶେଷକରି ବ୍ରୋନକ୍ସ ନିକଟ ‘ହାର୍ଟ ଦୀପ’ରେ ଗଣସମାଧି ଦିଆଯିବାର ଦୃଶ୍ୟ ଦେଖିବାକୁ ମିଳୁଛି। ହାର୍ଟ ଦୀପ ହେଉଛି ଏକ ଐତିହାସିକ ସ୍ଥାନ, ଯେଉଁଠି ୧୫୦ ବର୍ଷ ଧରି ମୃତକଙ୍କୁ କବର ଦିଆଯାଉଛି। କେହି ସମ୍ପର୍କୀୟ ନ ଥିବା କିମ୍ବା ଅକ୍ଷମ ପରିବାର ପାଇଁ ସ୍ଥାନୀୟ ସରକାର ପକ୍ଷରୁ ସେଠାରେ କରୋନା ମୃତକଙ୍କୁ କବର ଦିଆଯାଉଛି। ସାଧାରଣତଃ ରାଇକର୍ସ ଦ୍ୱୀପର ବନ୍ଦୀମାନେ କବର ଦେବା କାର୍ଯ୍ୟ କରିଥାନ୍ତି। ଏବେ ମୃତ୍ୟୁସଂଖ୍ୟା ବୃଦ୍ଧି ପାଇଥିବାରୁ ଠିକାଦାରଙ୍କ ଦ୍ୱାରା ଉକ୍ତ କାର୍ଯ୍ୟ କରାଯାଉଛି। ନ୍ୟୁୟର୍କ ସିଟି ମେୟର ବିଲ୍ ଡି ବ୍ଲାସିଓ ସୂଚନା ଦେଇଛନ୍ତି ଯେ, ସହରର ସର୍ବସାଧାରଣ ଶ୍ମଶାନକୁ କରୋନା ମହାମାରୀ ସମୟରେ କବର ଦେବା ପାଇଁ ବ୍ୟବହାର କରାଯାଇପାରେ। ହ୍ବାଇଟ୍ ହାଉସ୍ର କରୋନା ଭାଇରସ୍ ଟାସ୍କଫୋର୍ସ ପ୍ରମୁଖ ସଦସ୍ୟ ଡ. ଆନ୍ଥୋନୀ ଫଉସି ଗୁରୁବାର ଏନ୍ବିସି ନ୍ୟୁଜ୍ କହିଛନ୍ତି ଯେ, କୋଭିଡ-୧୯ରେ ୬୦ ହଜାରରୁ ଊର୍ଦ୍ଧ୍ୱ ଆମେରିକୀୟଙ୍କ ମୃତ୍ୟୁ ଘଟିପାରେ। କିନ୍ତ ମାର୍ଚ୍ଚ ଶେଷ ସପ୍ତାହରେ ଆନ୍ଥୋନୀଙ୍କ ଏହି ଆକଳନ ଥିଲା ୧ଲକ୍ଷରୁ ୨ଲକ୍ଷ।