ପଦ୍ମପୁର/ତିହିଡ଼ି, ୩୧।୮ (ଡି.ଏନ.ଏ.) : ଭଦ୍ରକ ଜିଲା ନାୟକାଣିଡିହୀ ଥାନା ବାଲିମେଦ ପଞ୍ଚାୟତ ଅଧୀନ ପାଇକସାହି ନିକଟସ୍ଥ ନୟନଯୋରିରୁ ଶୁକ୍ରବାର ସକାଳେ ଜଣେ ଅଚିହ୍ନା ଯୁବତୀଙ୍କ ମୃତଦେହ ଉଦ୍ଧାର କରାଯାଇଥିଲା। ମୃତା ଯୁବତୀଙ୍କ ପରିଚୟ ମିଳିଛି। ସେ ତିହିଡ଼ି ଥାନା ରାଜନଗର ପଞ୍ଚାୟତ ଚାରିତରଫ ଗ୍ରାମର ସାବିତ୍ରୀ ମହାକୁଡ଼(୨୩) ବୋଲି ଜଣାପଡ଼ିଛି। ସାବିତ୍ରୀଙ୍କୁ ସେହି ପଞ୍ଚାୟତ ବାହାରପାଳ ଗ୍ରାମର ଜଣେ ଯୁବକ ବଳାତ୍କାର ପରେ ହତ୍ୟା କରିଥିବା ମୃତା ସାବିତ୍ରୀଙ୍କ ବାପା ଭାଗୀରଥି ଶନିବାର ତିହିଡ଼ି ଥାନାରେ ଅଭିଯୋଗ କରିଛନ୍ତି। ଏହି ଅଭିଯୋଗକୁ ଭିତ୍ତିକରି ତିହିଡ଼ି ଥାନା ପୋଲିସ ଏକ ମାମଲା(ନଂ.୩୯୦/୧୯) ରୁଜୁ କରି ତଦନ୍ତ କରୁଛି।
ମୃତା ସାବିତ୍ରୀଙ୍କ ବାପା ଅଭିଯୋଗରେ ଦର୍ଶାଇଛନ୍ତି ଯେ, ଗତ ୨୯ ତାରିଖ ସନ୍ଧ୍ୟାରେ ସାବିତ୍ରୀ ଶୌଚ ପାଇଁ ଯାଉଥିବା କହି କେଉଁଆଡ଼େ ଚାଲି ଯାଇଥିଲେ। ବିଳମ୍ବିତ ରାତି ପର୍ଯ୍ୟନ୍ତ ସେ ଘରକୁ ନ ଫେରିବାରୁ ପରିବାର ଲୋକେ ଚାରିଆଡ଼େ ଖୋଜାଖୋଜି କରିଥିଲେ। ପରେ ବାହାରପାଳ ଗ୍ରାମର ଜଣେ ଯୁବକଙ୍କ ବାଇକ୍ରେ ବସି ସାବିତ୍ରୀ ଗଦି ଆଡ଼କୁ ଯାଇଥିବା କେତେକ ଗ୍ରାମବାସୀଙ୍କଠାରୁ ସେ ଖବର ପାଇଥିଲେ। ପରେ ସେ ବିଭିନ୍ନ ଆଡ଼େ ସନ୍ଧାନ ନେଇଥିଲେ ମଧ୍ୟ ଝିଅର କୌଣସି ଖବର ପାଇ ନ ଥିଲେ। ପାଇକସାହି ନିକଟରୁ ଜଣେ ଯୁବତୀଙ୍କ ମୃତଦେହ ମିଳିଥିବା ଏବଂ ତାଙ୍କୁ ବ୍ୟବଚ୍ଛେଦ ପାଇଁ ନିଆଯାଇଥିବା ଜାଣିବା ପରେ ସେ ଭଦ୍ରକ ଡାକ୍ତରଖାନାକୁ ଯାଇଥିଲେ। ମୃତଦେହକୁ ଦେଖିବା ପରେ ତାହା ତାଙ୍କ ଝିଅର ବୋଲି ଚିହ୍ନଟ କରିଥିଲେ। ବାହାରପାଳ ଗ୍ରାମର ଯୁବକ ଜଣଙ୍କ ପୂର୍ବରୁ ବିଭିନ୍ନ ସମୟରେ ତାଙ୍କ ଘରକୁ ଆସି ଝିଅ ସହ ମିଳାମିଶା କରୁଥିଲେ ବୋଲି ସେ ଦର୍ଶାଇଛନ୍ତି। ସାବିତ୍ରୀଙ୍କ ବେକକୁ ଏକ ଧାରୁଆ ଛୁରୀରେ କଟା ଯାଇଥିବାରୁ ତାଙ୍କୁ ବଳାତ୍କାର ପରେ ହତ୍ୟା କରାଯାଇଥିବା ସେ ଅଭିଯୋଗ କରିଛନ୍ତି।
