ନୟାଗଡ଼ ଅଫିସ,୧୭ା୮- ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଦଲାଲମାନେ ଅବାଧରେ ପଶି ରୋଗୀମାନଙ୍କ ଇସିଜି (ଇଲୋକ୍ଟ୍ରୋ କାଡ଼ିଓଗ୍ରାମ) ପରୀକ୍ଷା କରୁଛନ୍ତି। ଦିନେ କି ଦୁଇଦିନ ନୁହେଁ ଦୀର୍ଘ ୮ମାସ ହେଲା ଏହିଭଳି ଅବ୍ୟବସ୍ଥା ଦେଖିବାକୁ ମିଳିଛି। ମୁଖ୍ୟ ଚିକିତ୍ସାଳୟରେ ମାଗଣା ଇସିଜି ପରୀକ୍ଷା କରାଇବା ବ୍ୟବସ୍ଥା ଥିଲେ ମଧ୍ୟ ରୋଗୀମାନେ ଦଲାଲ୍ଙ୍କ ଦ୍ୱାରା ପରୀକ୍ଷା କରାଇ ଖର୍ଚ୍ଚାନ୍ତ ହେଉଛନ୍ତି।
ରୋଗୀମାନଙ୍କ ମାଗଣାରେ ଇସିଜି କରିବା ପାଇଁ ଏକବର୍ଷ ତଳେ ଜିଲା ମୁଖ୍ୟ ଚିକିତ୍ସାଳୟରେ ଇସିଜି ପରୀକ୍ଷା କେନ୍ଦ୍ର ଖୋଲାଯାଇଥିଲା। ସକାଳ ୮ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଏଠାରେ ମାଗଣାରେ ରୋଗୀମାନଙ୍କ ପରୀକ୍ଷା କରାଯାଏ। ୮ମାସ ତଳେ ଜଣେ ମହିଳାଙ୍କ ପରୀକ୍ଷା କରୁଥିବା ଉକ୍ତ କେନ୍ଦ୍ରର ଟେକ୍ନିସିଆନ୍ ଜଣକ ତାଙ୍କୁ ଅସଦାଚରଣ କରିଥିଲେ। ଏହା ପରଠାରୁ ଉକ୍ତ କେନ୍ଦ୍ର ବନ୍ଦ ହୋଇପଡ଼ିଛି। ଚିକିତ୍ସାଳୟ କର୍ତ୍ତୃପକ୍ଷ ଏହାର କୌଣସି ସମାଧାନ କରୁ ନ ଥିବାରୁ ଅନ୍ୟ ଉପାୟ ନ ପାଇ ରୋଗୀମାନେ ବାହାରେ ପରୀକ୍ଷା କରାଇ ଖର୍ଚ୍ଚାନ୍ତ ହେଉଛନ୍ତି। ଏପରି କି ଦଲାଲ୍ ଶ୍ରେଣୀର କେତେଜଣ ଯୁବକ ହାତରେ ଇସିଜି ମେଶିନ୍ ଧରି ଜିଲା ମୁଖ୍ୟ ଚିକିତ୍ସାଳୟରେ ଅବାଧରେ ପଶି ପରୀକ୍ଷା କରୁଛନ୍ତି। ସେମାନେ ରୋଗୀଙ୍କୁ ଦେଖି ୩୦୦ରୁ ୫୦୦ ଟଙ୍କା ନେଉଛନ୍ତି। ଏହିଭଳି ଭାବେ ସେମାନେ ରୋଗୀଙ୍କୁ ଶୋଷଣ କରିବାରେ ଲାଗିଛନ୍ତି। ଏ ନେଇ ଚିକିତ୍ସାଳୟ କର୍ତ୍ତୃପକ୍ଷ ଜାଣିଥିଲେ ମଧ୍ୟ ପଦକ୍ଷେପ ନେଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ଫଳରେ ଦଲାଲ୍ମାନଙ୍କ ପ୍ରାଦୁର୍ଭାବ ବଢିବାରେ ଲାଗିଛି। ଅନ୍ୟପଟେ ପରୀକ୍ଷାରେ ଯଦି କୌଣସି ତ୍ରୁଟି ରହେ ତେବେ ରୋଗୀଙ୍କ ଜୀବନ ଉପରେ ଏହାର ପ୍ରଭାବ ପଡିବା ସମ୍ଭାବନା ରହିଛି। ଏ ନେଇ ଜିଲା ମୁଖ ଚିକିତ୍ସା ଅଧିକାରୀ ଡା. ଶ୍ୱେତ ମହାପାତ୍ରଙ୍କୁ ପଚାରିବାରୁ ସେ କହିଥିଲେ, ଟେଲିମେଡ଼ିସିନ୍ରେ ଯିଏ କାର୍ଯ୍ୟ କରୁଥିଲେ ସିଏ ଇସିଜି କେନ୍ଦ୍ର ଦାୟିତ୍ୱରେ ରହି ରୋଗୀମାନଙ୍କ ପରୀକ୍ଷା କରୁଥିଲେ। ୮ମାସ ତଳେ ଜଣେ ମିହଳା ତାଙ୍କ ନାମରେ ଦୁର୍ବ୍ୟବହାର ଅଭିଯୋଗ ଆଣିଥିଲେ। ବର୍ତ୍ତମାନ ଟେକ୍ନିସିଆନ୍ ନ ଥିବାରୁ ଉକ୍ତ କାର୍ଯ୍ୟାଳୟ ବନ୍ଦ ହୋଇ ରହିଛି। ଆଗାମୀ ରୋଗୀ କଲ୍ୟାଣ ସମିତି ବୈଠକରେ ଏ ସମ୍ପର୍କରେ ଆଲୋଚନା କରାଯାଇ ସମାଧାନ କରାଯିବ ବୋଲି ସେ ସୂଚନା ଦେଇଥିଲେ।