ନୟାଗଡ଼ ଅଫିସ,୯।୬: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ମଙ୍ଗଳବାର ଜଣେ ଡାକ୍ତର ଓ ନର୍ସ କରୋନା ପଜିଟିଭ ଚିହ୍ନଟ ହୋଇଛନ୍ତି। ସଂକ୍ରମିତ ଡାକ୍ତର ଓ ନର୍ସଙ୍କୁ ଚିକିତ୍ସା ପାଇଁ ସୋମବାର ସାରୁ ଭୁବନେଶ୍ୱର କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ସିଡିଏମ୍ଓ ସୁଧାଂଶୁ ଶେଖର ସଡ଼ଙ୍ଗୀ ସୂଚନା ଦେଇଛନ୍ତି। ଜିଲା ମୁଖ୍ୟ ଚିକିତ୍ସାଳୟରେ ଡାକ୍ତର ଓ ନର୍ସ କରୋନାରେ ଆକ୍ରାନ୍ତ ହେବା ପରେ ମାତୃ ଶିଶୁ ଚିକିତ୍ସାଳୟର ଗୋଟିଏ ୱାର୍ଡ, ସର୍ଜରି ୱାର୍ଡ, କୋଭିଡ କଣ୍ଟ୍ରୋଲ ରୁମ୍ ସିଲ୍ କରାଯାଇ ବିଶୋଧନ ଆରମ୍ଭ ହୋଇଛି।
ପୂର୍ବରୁ ଜୁନ ୩ ତାରିଖରେ ଜିଲା ମୁଖ୍ୟ ଚିକିତ୍ସାଳୟରେ ଜଣେ ନର୍ସ କରୋନା ପଜିଟିଭ ଚିହ୍ନଟ ହୋଇଥିଲେ।
ତେବେ ସେ କିପରି ଆକ୍ରାନ୍ତ ହେଲେ ତାହା ଏଯାବତ୍ ଜଣାପଡ଼ି ନ ଥିବା ବେଳେ ବର୍ତ୍ତମାନ ଡାକ୍ତର ଓ ଆଉ ଜଣେ ନର୍ସ କରୋନା ଆକ୍ରାନ୍ତ ହେବାକୁ ନେଇ ପ୍ରଶାସନର ଚିନ୍ତା ବଢ଼ିଛି। ଜିଲା ମୁଖ୍ୟ ଚିକିତ୍ସାଳୟକୁ ଦୈନିକ ହଜାର ହଜାର ସଂଖ୍ୟାରେ ରୋଗୀ ଓ ତାଙ୍କ ସମ୍ପର୍କିୟ ଆସୁଛନ୍ତି। ତେବେ ଆକ୍ରାନ୍ତ ଡାକ୍ତର ଓ ନର୍ସଙ୍କ ସଂସ୍ପର୍ଶରେ କେଉଁମାନେ ଆସିଛନ୍ତି ସେନେଇ ଖୋଳତାଡ଼ ଚାଲିଛି।