ଢେଙ୍କାନାଳ ଅଫିସ, ୭।୧୨: ଢେଙ୍କାନାଳ ଜିଲାରେ ବେଆଇନ ନିଶା କାରବାର ଉପରେ ଅଙ୍କୁଶ ଲାଗି ପାରୁନାହିଁ। ପୋଲିସ, ଅବକାରୀ ବିଭାଗର ଉଦ୍ୟମ ସତ୍ତ୍ୱେ ମାଫିଆମାନେ ମଧ୍ୟସ୍ଥଙ୍କ ଜରିଆରେ ବ୍ୟବସାୟ ଚଳାଇଛନ୍ତି। ଏହାଦ୍ୱାରା କେବଳ ଯୁବପିଢ଼ି ପ୍ରଭାବିତ ହେଉନାହାନ୍ତି, ଅଧିକନ୍ତୁ ସହରରେ ଲୁଟ୍, ଡକାୟତି ଭଳି ଅସାମାଜିକ କାର୍ଯ୍ୟକଳାପ ମଧ୍ୟ ବୃଦ୍ଧି ପାଉଛି। ରାଜ୍ୟ ଅବକାରୀ କମିଶନର ଆଶିଷ ସିଂ, ଜିଲାପାଳ ସରୋଜ କୁମାର ସେଠୀଙ୍କ ନିର୍ଦ୍ଦେଶରେ ମଙ୍ଗଳବାର ଜିଲା ଅବକାରୀ ବିଭାଗର ମୋବାଇଲ ସ୍କ୍ବାଡ୍ ବିଭିନ୍ନ ସ୍ଥାନରେ ଚଢ଼ାଉ କରି ୬୮ ଗ୍ରାମ୍ ବ୍ରାଉନସୁଗାର, ୫ କେଜି ଗଞ୍ଜେଇ, ୪ ଲିଟର କଫ୍ ସିରପ୍ ସହ ଏକ ସ୍କୁଟି ଜବତ କରିଛି।
ବେଆଇନ ମାଦକଦ୍ରବ୍ୟ କାରବାରରେ ସମ୍ପୃକ୍ତି ଅଭିଯୋଗରେ ଲକ୍ଷ୍ମୀବଜାର ଅଞ୍ଚଳର ଶାନ୍ତିଲତା ସ୍ବାଇଁଙ୍କୁ ଗିରଫ କରାଯାଇଛି। ତାଙ୍କ ନିକଟରୁ ୬୮ ଗ୍ରାମ ବ୍ରାଉନ୍ ସୁଗାର ଜବତ କରାଯାଇଥିଲା, ଯାହାର ଆନୁମାନିକ ମୂଲ୍ୟ ୬ ଲକ୍ଷ ୮୦ ହଜାର ଟଙ୍କା ହେବ। ଏଥିପୂର୍ବରୁ ବ୍ରାଉନ୍ସୁଗାର ବ୍ୟବସାୟ କରୁଥିବା ଅଭିଯୋଗରେ ଶାନ୍ତିଲତାଙ୍କ ପୁଅ ବାପୁନ ଗିରଫ ହୋଇ ଜେଲ ହାଜତରେ ଅଛନ୍ତି। ସେହିପରି ଢେଙ୍କାନାଳ ଜୁବିଲି ଟାଉନ-୧ ଓ ମହିଷାପାଟ ମଧ୍ୟରେ ଥିବା ରାସ୍ତାରୁ ଏକ ସ୍କୁଟିରେ ଚାଲାଣ କରାଯାଉଥିବା ୫ କେଜି ଗଞ୍ଜେଇ ଜବତ କରାଯାଇଛି। ଏହି ଘଟଣାରେ ଦିଲୀପ କୁମାର ସେନାପତି ଗିରଫ ହୋଇଛନ୍ତି। ଅନୁରୂପ ଭାବେ ଭୁବନ ଥାନା ବାସୁଦେବପୁର ଅଞ୍ଚଳରୁ ୪ ଲିଟର ନିଷିଦ୍ଧ କଫ୍ ସିରପ ଜବତ ହୋଇଥିବାବେଳେ ଗୋଲାପ ଦାସ ନାମ୍ନୀ ଜଣେ ମହିଳା ଧରାପଡ଼ିଛନ୍ତି। ସମସ୍ତ ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
ଏ ସଂକ୍ରାନ୍ତରେ ଜିଲା ଅବକାରୀ ଅଧୀକ୍ଷକ ପ୍ରଦୀପ କୁମାର ପାଣିଗ୍ରାହୀ କୁହନ୍ତି, ଢେଙ୍କାନାଳ ସହରରେ ବ୍ରାଉନ୍ସୁଗାର ବେପାର କରାଯାଉଥିବା ସୂଚନା ମିଳିବା ପରେ ନଜର ରଖାଯାଇଥିଲା। ଚୋରା କଫ୍ ସିରପ୍ ବିକ୍ରି ରୋକିବା ପାଇଁ ଅବକାରୀ ବିଭାଗ ପକ୍ଷରୁ ଉଦ୍ୟମ କରାଯାଉଛି।