ଭୁବନେଶ୍ୱର,୨।୬(ବ୍ୟୁରୋ): ନୟାପଲ୍ଲୀ ଥାନା ରେଣ୍ଟାଲ କଲୋନୀ ନିକଟସ୍ଥ ହର୍ଟିକଲ୍ଚର କ୍ୟାମ୍ପସ ଭିତରେ ଜଣେ ଯୁବକଙ୍କ ହତ୍ୟା କରି ଫିଙ୍ଗିଦେବା ଘଟଣାର ମୁଖ୍ୟ ଅଭିଯୁକ୍ତଙ୍କୁ ପାହାଳରୁ ରବିବାର ପୋଲିସ ଗିରଫ କରିଛି। ଅଭିଯୁକ୍ତଜଣଙ୍କ ହେଲେ ପିଣ୍ଟୁ ଜେନା। ତାଙ୍କ ଘର ଜଗତସିଂହପୁର ଜିଲା ନାଉଗାଁରେ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ପିଣ୍ଟୁ ଓ ନୟାଗଡ଼ କଣ୍ଟିଲେ ଅଞ୍ଚଳର ମୃତ ଦିଲୀପ କୁମାର ସାହୁ ସ୍ଥାନୀୟ ଏକ ଅଟା କଳରେ ଦୀର୍ଘଦିନ ଧରି କାମ କରୁଥିଲେ। ଉଭୟ ଅଟାକଳ ପଛରେ ଥିବା ଏକ କ୍ୟାବିନରେ ରହି ଆସୁଥିଲେ। ସୋମବାର ସାବିତ୍ରୀ ଥିବାରୁ ଦିଲୀପ ମାଲିକଙ୍କଠାରୁ ୭ହଜାର ଟଙ୍କା ଆଣିଥିଲେ। ପୂର୍ବରୁ ପିଣ୍ଟୁଙ୍କ କିଛି ପଇସା ଦିଲୀପଙ୍କ ଉପରେ ଥିବାରୁ, ସେ ତାହାକୁ ଦେବାଲାଗି ଦିଲୀପଙ୍କୁ କହିଥିଲେ। ଏଥିରେ ଅମଙ୍ଗ ହେବାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିଯୋଗୁ ଦିଲୀପଙ୍କୁ ପିଣ୍ଟୁ ହତ୍ୟା କରିବା ପରେ କାର୍ଟୁନରେ ଗୁଡ଼ାଇ ଫିଙ୍ଗି ଦେଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି।
ଶନିବାର ରାତିରେ ମୃତଦେହ ଉଦ୍ଧାର କରିବା ପୂର୍ବରୁ ପିଣ୍ଟୁ ସେଠାରୁ ଫେରାର ହୋଇଯାଇଥିଲେ। ଏଣୁ ତାଙ୍କ ଉପରେ ପୋଲିସର ସନ୍ଦେହ ହୋଇଥିଲା। ପାରିପାଶ୍ୱିକ ସ୍ଥିତିରୁ ତାଙ୍କୁ ମଦ ପିଇବାକୁ ଡାକି ଗଳାକାଟି ହତ୍ୟା କରାଯାଇଥିବା ସନ୍ଦେହ କରିଥିଲା ପୋଲିସ।