ପଁଚେତ୍ରେ ତାଲା ପକାଲେ ଗଁ।ବାସୀ: ପିଇଲା ପାଏନ୍ରୁ ବଁଚିତ୍ ୬ ହଜାର ଲୋକ୍
21 ସିନାପାଲି, ୧୬।୬ (ଡି.ଏନ.ଏ): ମୁଡ଼ଫଟା ଖରା ତାତିର ଏହେଦେ ପଶ୍ଚିମ ଓଡ଼ିଶା ଜଲୁଛେ କହେଲେ କିଛି କମ୍ ନାଇଁହୁଏ। ଲୋକ ଗରମ, ଗୁଲଗୁଲିରେ ଅଥାଥାଲି ହେଇଯାଉଛନ୍। ଏନ୍ତାଥି ଫେର ଅନେକ ଜାଗାରେ ଲୋକ ପାଏନ୍ ସମସିଆରେ ଯୁଝୁଛନ୍। ଇଆଡ଼େ ସରକାର କୋଟି କୋଟି ଟଁକା ଖରଚ୍ କରି ଲୁକ୍କର ଲାଗି ପିଇଲା ପାଏନ୍ ସୁବିଧା କରୁଛନ୍। ହେଲେ ଅନେକ ଯାଗାରେ ଅଧ୍କାରୀମାନକର ଉଦାସିନ୍ତା ଲାଗି କେନ୍ଠାନେ ପ୍ରକଳ୍ପ ଅଚଲ ତ ଆରକେନ୍ନେ ମାସ ମାସ ହେଲା ନଲ୍ଚୁଅଁା ଅଚଲ ହେଇ ପଡ଼ିଛେ। ଏନ୍ତା ପିଇଲା ପାଏନ୍ ସମସିଆରେ ଯୁଝୁଛନ୍ ନୂଆପଡ଼ା ଜିଲା ସିନାପାଲି ବ୍ଲକ ହାତୀବନ୍ଧା ପଁଚେତ୍ ସଦର ଗଁାର ଲୋକ୍। ଯେନ୍ଥିରଲାଗି ଗଁାବାସୀ ଶନିବାର ପଁଚେତ୍ରେ ତାଲା ପକାବାର ତକ୍ କଁଟ ଯାଇଛେ।
ସୂଚନା ଅନ୍ସାରେ ହାତିବନ୍ଧା ଗଁାରେ ପାଖାପାଖି ୬ ହଜାରରୁ ଅଧ୍କା ଲୋକ୍ ବାସ କରୁଛନ୍। ବହୁତ୍ ବଛର ହେଲା ଗଁାକେ ପାଇପ୍ ପାଏନ୍ ସପ୍ଲାଏ ବେବସ୍ତା ଥିବାର ସରକାରୀ କାଗଜପତରରେ ରହିଛେ। ହେଲେ ଗଁାର ୬ଟା ଓ୍ବାର୍ଡ ଭିତରୁ ୩ଟା ଓ୍ବାର୍ଡକେ ବହୁତ୍ ବଛର ହେଲା ମୂଲହୁଁ ପାଏନ୍ ନାଇଁ ଯିବାର। ଲୋକ୍ ଉପେ ଶୂଇନ୍ ହେଇ ନାଲ୍ନଲିଆ, ଖୁଲାଚୁଅଁା, ବଁଧ୍କଟାର ପାଏନ୍ ବେଭାର କରି ନାନା ରୋଗ୍ର ଶିକାର ହେଉଛନ୍। ଇ ବାବ୍ଦେ ଗଁାବାସୀ ସରପଁଚ୍ନୁ ମୂଲ କରି ବିଡିଓ, ଜିଲାପାଲ, ଜଳ ଓ ପରିମଳ ବିଭାଗ ତକ୍ ଅଭିଯୋଗ କରି ନିରାଶ ହେଇଛନ୍। ଏନ୍ତାଥି ଲୋକ୍ ରିସ୍ମି ହେଇ ଶନିବାର ଗୁଟେ ରାଲିରେ ପଁଚେତ୍ ଅଫିସ ଆସି ତାଲା ପକେଇଥିଲେ ଆର ଶହ ଶହ ମହିଲା ପୁରୁଷ୍ ୫ ଘଁଟା ତକ୍ ଧାରନାରେ ବସିଥିଲେ। ପଛେ ସରପଁଚ୍ ସନ୍ତୋଷିନୀ ଅଗ୍ରଓ୍ବାଲ, ଥାନୀୟ ତହସିଲଦାର କପିଳଦେବ ସାହୁ ଆର ଖଡ଼ିଆଳ ବିଧାୟକ ଅଧିରାଜ ପାଣିଗ୍ରାହୀ ଘଟନାଥଲକେ ପୁହଁୁଛି ଆଂଦୋଲନକାରୀକର ସଂଗେ ଆଲୋଚନା କରିଥିଲେ। ରଏବାର ଦିନୁ ହାତୀବନ୍ଧା ଗଁାକେ ୫ଟା ଟ୍ୟାଙ୍କରରେ ପିଇଲା ପାଏନ୍ ଯୁଗେଇ ଦେବାକେ ସରପଁଚ୍ ଅଗ୍ରଓ୍ବାଲ ଆଂଦୋଲନକାରୀକୁ ପରତିଶୁରତି ଦେଇଥିଲେ। ସେନ୍ତା ଜିଲା ଜଳ ଓ ପରିମଳ ବିଭାଗ ତରଫୁ ଗଁାରେ ଥିବାର ଓଭରହେଡ଼ ଟ୍ୟାଙ୍କକେ ବହୁତ୍ ଜଲଦି କାଯ୍କ୍ଷମ କରାଯିବା, ପାଏନ୍ରୁ ବଁଚିତ୍ ଥିବାର ଓ୍ବାର୍ଡବାସୀକୁ ପାଏନ୍ ଯୁଗେଇ ଦିଆଯିବା ବଲି ତହସିଲଦାର କପିଳଦେବ ସାହୁ କହିଛନ୍। ଇଆଡ଼େ ସମସିଆର ଥାୟୀ ସମାଧାନ ନାଇଁ ହେଲେ ଆଏବାର ଦିନେ ବଡ଼ଭାରି ଜନଆଂଦୋଲନ କରାଯିବା ବଲି ବିଧାୟକ ଅଧିରାଜ ପାଣିଗ୍ରାହୀ କହିଛନ୍। ହାତୀବନ୍ଧା ଗଁାରେ ୬ ହଜାରୁ ଅଧ୍କା ଲୋକ୍ ବାସ କରୁଥିଲାବେଲେ ଗଁାବାସୀକୁ ୨ଟା ଟ୍ୟାଙ୍କରରେ ପାଏନ୍ ଯୁଗେଇ ଦିଆଯାଉଛେ। ହେଲେ ଟ୍ୟାଙ୍କରରେ ଯୁଗେଇ ଦିଆଯାଉଥିବାର ପାଏନ୍ ବି ବେଭାର କଲାଲେଖେଁ ନୁହେ। ଇ ବାବ୍ଦେ ଅଭିଯୋଗ କଲେ କେହି ନାଇଁ ଶୁନବାର ବଲି ଗଁାବାସୀ କହିଛନ୍। ୨୦୦୩ ମସିହାରୁ ଗଁାରେ ପାଇପ୍ ପାଏନ୍ ସପ୍ଲାଏର ବେବସ୍ତା ରହିଛେ, ହେଲେ ନୂତନ ପାଇପ କି ଷ୍ଟାଣ୍ଡପୋଷ୍ଟ ତିଆର ନାଇଁ ହେଇ। ଯେନ୍ଥିରଲାଗି ଗଁାବାସୀ ଶନିବାର ପଁଚେତ୍ ଅଫିସରେ ତାଲା ପକେଇ ଧାରନାରେ ବସବାର ସଂଗେ ଉଦନ୍ତୀ ନଦୀରୁ ସବୁ ଓ୍ବାର୍ଡକେ ପିଇଲା ପାଏନ୍ ଯୁଗେଇ ଦେବାକେ ଦାବି କରିଛନ୍।