ବିନିକା,୧୨।୩ (ଡି.ଏନ୍.ଏ.)- ସୁବର୍ଣପୁର ଜିଲା ବିନିକା ବ୍ଲକ କଇଁତରା ପଁଚେତ୍ ବାଞ୍ଜିପାଲି ଗଁା ହରିଜନ ପଡ଼ାର ଡିଲେଶ୍ୱରୀ ବାଘ(୬୮)। ସେ ଅନେକ ଦିନ ହେଲା ପକ୍ଷାଘାତ ରୋଗ୍ରେ ଖଟେ ପଡ଼ିରହିଛନ୍। ପରିବାର ଲୋକ୍ ଯାହା ପାରଲେ ଆସରପାସର ଡାକ୍ତରଖାନାରେ ଦେଖେଇ ଚିକିଛା କରାଲେ। ହେଲେ ଏହେଦେ ଟଁକା ପଏସା ଅଭାବୁ ପରିବାର ଲୋକ ତାକର ଉଚ ଚିକିଛା କରେଇ ନାଇଁପାରବାର। ଏନ୍ତାଥି ପରିବାରଟା ସରକାରୀ ଚିକିଛା ସାହାଯ୍ ଆଶ୍ରେ ରହିଛନ୍।
ସୂଚନା ଅନ୍ସାରେ ବାଞ୍ଜିପାଲି ଗଁା ହରିଜନ ପଡ଼ାର କଙ୍ଗାଲୁ ବାଘ। ପରିବାର କହେଲେ ମାଏକିନା ଡିଲେଶ୍ୱରୀ, ପୁଓ ମନୋଜ, ସରୋଜ ଆର ଝି’ କଳ୍ପନାକୁଁ ନେଇ ସଁସାର। ପରିବାରଟା ନିହାତି ଗରିବ୍, ସଁପତି ବଲି କିଛି ନାଇଁ। କଙ୍ଗାଲୁ ଦୁଖ୍ସୁଖ କରି ନିଜର ପିଲାଛୁଆକୁ ବିହାଚୁରା କରି ସାରିଛନ୍। ଏହେଦେ ବଏସ୍ ଅଧ୍କା ହେବାର ଲାଗି ସେ କାମ୍ବୁତା ବି କରି ନାଇଁପାରବାର। ଇଆଡ଼େ ଅନେକ ବଛର ହେଲା ମାଏକିନା ଡିଲେଶ୍ୱରୀ ପକ୍ଷାଘାତ ରୋଗ୍ରେ ଖଟେ ପଡ଼ି ରହିଛନ୍। ପିଲାମାନେ ମା’କେ ଅନେକ ଡାକ୍ତରଖାନାକେ ନେଇ ଚିକିଛା କରେଇ ନିରାଶ ହେଇଛନ୍। ଏନ୍ତା କି ମା’ର ଚିକିଛାରେ ପିଲାମାନେ ଘରର ଜିନିଷପାତି ବିକି ଗୁଟେପରକାର ସରବ୍ସୁଅଁାତ ହେଇଛନ୍। ଏତେ ଉଷୋକଷା କଲା ଉତାରୁ ବି ଡିଲେଶ୍ୱରୀକଁର ନିରୁଜ ହେଇ ନାଇଁପାରବାର। ଇଆଡ଼େ ଟଁକା ପଏସା ଅଭାବୁ ଏହେଦେ ପିଲାମାନେ ଡିଲେଶ୍ୱରୀକଁର ଉଚ ଚିକିଛା କରେଇ ନାଇଁପାରବାର। ସେନ୍ତା ସରକାରୀ ସାହାଯ୍ କହେଲେ ପରିବାରକେ ମାସିକ ମିଲୁଥିବାର ୩୫ କେ.ଜି. ଚାଉଲ। ଡିଲେଶ୍ୱରୀ ଅନେକ ବଛର ହେଲା ଖଟେ ପଡ଼ି ରହିଥିଲେ ବି ଭତା, ଚିକିଛା ସାହାଯ୍ ଲେଖେଁ ସରକାରୀ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍। ପରିବାର ଲୋକ ଡିଲେଶ୍ୱରୀକଁର ଭାତା ଆର ଚିକିଛା ସାହାଯ୍ ଲାଗି ବି ଜିଲାପାଳକଁର ଜନଅଭିଯୋଗ ଶୁନାନିରେ ଗୁହାରି କରି ନିରାଶ ହେଇଥିବାର କହିଛନ୍। ଇ ଦିଗେ ଜିଲା ଆର ବ୍ଲକ ପରଶାସନ ଦୁରୁଷ୍ଟି ଦେଇ ଡିଲେଶ୍ୱରୀକୁଁ ଭତା ଆର ଚିକିଛା ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ବିନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀ ଜୟପ୍ରକାଶ ପ୍ରଧାନକୁଁ ପଚ୍ରାଲାରୁ ଘଟନା ବାବ୍ଦେ ଆମରନେ କେହି ଅଭିଯୋଗ ନାଇଁକରି। ହେଲେ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି ସେ କହିଥିଲେ। ସେନ୍ତା ଇ ବାବ୍ଦେ ବିନିକା ବିଡିଓ ବିଶ୍ୱରଞ୍ଜନ ମଲ୍ଲିକକୁଁ ପଚ୍ରାଲାରୁ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି ସେ କହିଥିଲେ।