ଅନୁଗୋଳ ଅଫିସ, ୨୯।୩ – କରୋନା ସଂକ୍ରମଣ ଏବେ ତୃତୀୟ ପର୍ଯ୍ୟାୟରେ ପହଞ୍ଚିଥିବା ରାଜ୍ୟ ସରକାରଙ୍କ ପକ୍ଷରୁ କୁହାଯିବା ସହ ଏହାର ମୁକାବିଲାକୁ ଅଧିକ ଶାଣିତ କରିବାକୁ ପ୍ରସ୍ତୁତି ଆରମ୍ଭ ହୋଇଛି। ଅନୁଗୋଳ ଜିଲା ପ୍ରଶାସନ ମଧ୍ୟ ଏ ନେଇ ଘନ ଘନ ବୈଠକ କରୁଛି। ଜିଲାରେ ୨୩୫ଟି ଆଇସୋଲେଶନ୍ ସେଣ୍ଟର ଓ ୨୨୫ଟି ପଞ୍ଚାୟତରେ ଅସ୍ଥାୟୀ ମେଡିକାଲ କ୍ୟାମ୍ପ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। କିନ୍ତୁ ଏଯାଏ ସମସ୍ତ ପଞ୍ଚାୟତରେ ଆଇସୋଲେଶନ ସେଣ୍ଟର କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିବାରୁ ସାଧାରଣରେ ଚିନ୍ତା ବଢ଼ିଯାଇଛି। ତେବେ ଉକ୍ତ କାର୍ଯ୍ୟ ପ୍ରାୟ ଶେଷ ପର୍ଯ୍ୟାୟରେ ପହଞ୍ଚତ୍ଥିବା ସାମାଜିକ ପୃଥକୀକରଣ ନୋଡାଲ ଅଧିକାରୀ ତଥା ପିଡି ଅତୁଲ୍ୟ କୁମାର ଚମ୍ପତ୍ତିରାୟ ସୂଚନା ଦେଇଛନ୍ତି।
ଜିଲା ପ୍ରଶାସନ ସୂଚନା ମୁତାବକ ଅନୁଗୋଳ ଜିଲାକୁ ରାଜ୍ୟ ଓ ବିଦେଶରୁ ୧୯୩୯ ଜଣ ଲୋକ ଆସିଛନ୍ତି। ବାହାରୁ ଆସୁଥିବା ସମ୍ପୃକ୍ତ ଲୋକମାନଙ୍କୁ ୧୪ ଦିନ ହୋମ୍ କ୍ୱାରାଣ୍ଟାଇନ୍ରେ ରହିବାକୁ କୁହାଯାଇଛି। କିନ୍ତୁ ସମସ୍ତଙ୍କ ଘରେ ଏପରି ସୁବିଧା ନ ଥିବାରୁ ସମସ୍ୟାର ସମାଧାନ ପାଇଁ ପ୍ରତି ପଞ୍ଚାୟତ ହାଇସ୍କୁଲରେ ଆଇସୋଲେଶନ୍ ସେଣ୍ଟର ଖୋଲିବାକୁ ଜିଲାପାଳ ଗତ ୧୬ ତାରିଖରେ ନିର୍ଦ୍ଦେଶ ଦେଇଥିଲେ। ସେଠାରେ ସମସ୍ତ ଆନୁସଙ୍ଗିକ ବ୍ୟବସ୍ଥା ପ୍ରସ୍ତୁତ କରିବାକୁ ବିଡିଓମାନଙ୍କୁ କୁହାଯିବା ସହ ନୋଡାଲ ଅଧିକାରୀଙ୍କୁ ଅନୁଧ୍ୟାନ କରିବାକୁ ପରାମର୍ଶ ଦେଇଥିଲେ। କିନ୍ତୁ ୧୨ ଦିନ ବିତି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ ୮୦ ପ୍ରତିଶତରୁ ଅଧିକ ପଞ୍ଚାୟତରେ ଆଇସୋଲେଶନ୍ ହୋମ୍ ଖୋଲାଯାଇପାରି ନାହିଁ। ଏ ନେଇ ନୋଡାଲ ଅଧିକାରୀ ଚମ୍ପତ୍ତିରାୟ କହିଛନ୍ତି, ଯେଉଁ ପଞ୍ଚାୟତରେ ଲୋକମାନେ ହୋମ୍ କ୍ବାରାଣ୍ଟାଇନ୍ରେ ରହୁଛନ୍ତି ସେଠାରେ ଏହି ଆଇସୋଲେଶନ ସେଣ୍ଟରର ଆବଶ୍ୟକତା ନାହିଁ। ଏହାଛଡ଼ା କୌଣସି ଲକ୍ଷଣ ଦେଖାଦେଲେ ଲୋକମାନଙ୍କୁ ପଞ୍ଚାୟତରେ ଖୋଲାହେବାକୁ ଥିବା ଅସ୍ଥାୟୀ ମେଡିକାଲ କ୍ୟାମ୍ପକୁ ନେବାର ବ୍ୟବସ୍ଥା କରାଯାଇଛି। ଅନୁଗୋଳ ସହରରେ ଅସ୍ଥାୟୀ ମେଡିକାଲ କ୍ୟାମ୍ପ ଖୋଲାଯାଇଥିବା ବେଳେ ବଅଁରପାଳ ଓ ଅନ୍ୟ ପଞ୍ଚାୟତରେ ଥିବା କଲେଜଗୁଡ଼ିକୁ ମଧ୍ୟ ଏଥିପାଇଁ ପ୍ରସ୍ତୁତ କରି ରଖାଯାଉଛି ବୋଲି ପିଡି ପ୍ରକାଶ କରିଛନ୍ତି।