ପାଟନା,୨୯।୧୧: ବିହାରର ବୈଶାଳୀ ଜିଲାରେ ପଞ୍ଚାୟତର ନିର୍ଦ୍ଦେଶକ୍ରମେ ଜଣେ ମହିଳା ଯୁବକଙ୍କୁ ଚପଲରେ ପିଟିବା ଘଟଣାର ଭିଡିଓ ଏବେ ଭାଇରାଲ ହେବାରେ ଲାଗିଛି। ଏହା ଦେଶରି ଥାନା ଅଞ୍ଚଳର ମୁରୌତପୁର ଗାଁର ବୋଲି ଜଣାପଡିଛି। ଭିଡିଓରେ ଦେଖିବାକୁ ମିଳିଛି କେତେଜଣଙ୍କ କହିବା ଅନୁଯାୟୀ ମହିଳା ଜଣକ ଯୁବକଙ୍କୁ କଡା କଥା କହିବା ସହ ଚପଲରେ ମାଡ ମାରୁଛନ୍ତି। ଏହାସହ ଯୁବକଙ୍କ ଉପରେ ପଞ୍ଚାୟତ ପକ୍ଷରୁ ୨୧ ହଜାର ଟଙ୍କା ଜରିମାନା ମଧ୍ୟ କରାଯାଇଛି। ଆହୁରି ମଧ୍ୟ ଚେତାବନୀ ଦିଆଯାଇଛି ଯଦି ପୁଣିଥରେ ଯୁବକ ଏଭଳି ଭୁଲ୍ କରନ୍ତି ତେବେ ୨ଲକ୍ଷ ୫୧ହଜାର ଟଙ୍କା ଜରିମାନା ଦେବାକୁ ପଡିବ। ସୂଚନାଯୋଗ୍ୟ, ଯୁବକ ଜଣକ ବେଆଇନ ଭାବେ ଜଣଙ୍କ ଘରେ ପଶିଯିବାରୁ ତାଙ୍କୁ ଏହି ଦଣ୍ଡ ମିଳିବା ସହ ଗାଁରୁ ତାଙ୍କ ପରିବାରକୁ ବାସନ୍ଦ କରାଯାଇଛି।