ବଇଣ୍ଡା,୧୯।୨(ଡି.ଏନ.ଏ.) – କିଶୋରନଗର ବ୍ଲକର ୨୩ଟି ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନା(ପିଏମଏଓ୍ବାଇ)ରେ ଗୃହ ଯୋଗାଇ ଦେବା ପାଇଁ ପ୍ରଶାସନ ପକ୍ଷରୁ ତାଲିକା ପ୍ରକାଶ ପାଇଛି। ହେଲେ ଅଧିକାଂଶ ପଞ୍ଚାୟତରେ କୋଠାଘର ଥିଲା ବାଲାଙ୍କୁ ଗୃହ ଯୋଗାଇ ଦେବା ପାଇଁ ତାଲିକା ପ୍ରକାଶ ପାଇଥିବାରୁ ଅସନ୍ତୋଷ ଦେଖାଦେଇଛି। ମଙ୍ଗଳବାର ବ୍ଲକର ଝରାବେରେଣୀ ପଞ୍ଚାୟତରେ ମରାଯାଇଥିବା ତାଲିକାକୁ ନେଇ ଉଦ୍ବେଗ ପ୍ରକାଶ ପାଇଛି। ଶତାଧିକ ମହିଳାପୁରୁଷ ହିତାଧିକାରୀ ସେମାନଙ୍କୁ ଗୃହ ପାଇବା ତାଲିକାରୁ ବାଦ ଦିଆଯାଇଥିବା ଅଭିଯୋଗ କରି ପଞ୍ଚାୟତ ଅଫିସକୁ ଘେରାଉ କରିଥିଲେ। ଫଳରେ ସେଠାରେ ଉତ୍ତେଜନା ଦେଖାଦେଇଥିଲା। ଖବରପାଇ କିଶୋରନଗର ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତେଜିତ ଅଞ୍ଚଳବାସୀଙ୍କୁ ବୁଝାଶୁଝା କରିଥିଲେ।
ଅଞ୍ଚଳବାସୀଙ୍କ ଅଭିଯୋଗ ମୁତାବକ, ଏହି ପଞ୍ଚାୟତର ଖଉଦର, ବର୍ବତିପାଲି, ରସୁଣପାଳ, କରଡିଙ୍ଗବାହାଳ, ବାଙ୍କେଶ୍ୱର ଆଦି ୧୦ଟି ଗ୍ରାମକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ଯୋଗାଇ ଦେବା ପାଇଁ ବ୍ଲକ ପ୍ରଶାସନ ପକ୍ଷରୁ ତାଲିକା ପ୍ରସ୍ତୁତ କରାଯାଇଛି। ଏ ନେଇ ପଞ୍ଚାୟତ ଓ ୧୦ଟି ଗ୍ରାମରେ ବିଭିନ୍ନ ଲୋକଙ୍କ ଘର କାନ୍ଥରେ ତାଲିକା ମରାଯାଇଛି। ହେଲେ ଏହି ତାଲିକାରେ ଯୋଗ୍ୟ ହିତାଧିକାରୀଙ୍କ ନାମ ପ୍ରକାଶ ନ ଥିବାବେଳେ ଅନେକ କୋଠା ଥିଲା ବାଲା ଓ ପ୍ରଭାବଶାଳୀ ବ୍ୟକ୍ତିଙ୍କ ନାମ ପ୍ରକାଶ ପାଇଛି। ଘର ଖଣ୍ଡିଏ ନ ଥିବା ପରିବାରକୁ ପକ୍କା ଘର ଯୋଗାଇ ଦେବା ପାଇଁ ବହୁବାର ପଞ୍ଚାୟତ କାର୍ଯ୍ୟାଳୟଠାରେ ଆବେଦନ କରାଯାଇଥିଲେ ମଧ୍ୟ ସେମାନଙ୍କ ନାମ ତାଲିକାରେ ପ୍ରକାଶ ପାଇ ନ ଥିବା ଅଭିଯୋଗ ହୋଇଛି। ପଞ୍ଚାୟତର କେତେଜଣ କର୍ମଚାରୀ ଟଙ୍କା ନେଇ ଏପରି କରୁଥିବା ହିତାଧିକାରୀମାନେ ପ୍ରକାଶ କରିଛନ୍ତି। ତୁରନ୍ତ ଏହାର ଯାଞ୍ଚ କରି ପଞ୍ଚାୟତ ବିଭାଗର ଉଚ୍ଚ ପଦାଧିକାରୀ ଓ ଅନୁଗୋଳ ଜିଲାପାଳ ତଦନ୍ତ କରି ପ୍ରକୃତ ହିତାଧିକାରୀଙ୍କୁ ଘର ଯୋଗାଇ ଦେବା ପାଇଁ ସତ୍ୟନାରାୟଣ ପ୍ରଧାନ, ବାବୁଲା ନାୟକ, ଚିତ୍ତରଞ୍ଜନ ନାୟକ, ବୈଦନାଥ ବେହେରା, ଭାଗ୍ୟ ସେଠୀ, ସୁଶାନ୍ତ ମୁଣ୍ଡା, ପ୍ରଫୁଲ୍ଲ ମୁଣ୍ଡା, ପିଣ୍ଟୁ ସାହୁ, ଦେବରାଜ ଦେହୁରି, ନିରାକାର ପ୍ରଧାନ, ସୁଶିଳା ପ୍ରଧାନ, ଉସା ମାହାର, ଗୌରୀ ମୁଣ୍ଡା, ରଶ୍ମିତା ଦେହୁରି ପ୍ରମୁଖ ଦାବି କରିଛନ୍ତି।
ଏ ନେଇ କିଶୋରନଗର ବିଡିଓ ଅମୃତା ପ୍ରିୟମ୍ବଦା କହିଛନ୍ତି, ପ୍ରଧାନମନ୍ତ୍ରୀ ଆବାସ ଯୋଜନାରେ ଚୟନ ହୋଇଥିବା ହିତାଧିକାରୀଙ୍କ ନାମ ବିଭିନ୍ନ ପଞ୍ଚାୟତରେ ତାଲିକା ମରାଯାଇଛି। ଯେଉଁମାନେ ଗୃହ ପାଇବାରେ ଅଯୋଗ୍ୟ ଥିବେ ଅଭିଯୋଗ ଆସିବା ପରେ ତଦନ୍ତ କରାଯାଇ ପଦକ୍ଷେପ ନିଆଯିବ। ଆଉ ଯୋଗ୍ୟଙ୍କ ଅଭିଯୋଗର ତୁରନ୍ତ ବିଚାର କରାଯିବ।