ବଅଁରପାଳ, ୧୪।୯ (ଡି.ଏନ୍.ଏ) – ଦିନ କେଇଟା ପରେ ନାଲ୍କୋର ପ୍ରସିଦ୍ଧ ବିଶ୍ୱକର୍ମା ପୂଜା। ଏଥିପାଇଁ ସମଗ୍ର ନାଲକୋ ନଗର ଏବେଠାରୁ ଚଳଚଞ୍ଚଳ ହୋଇପଡ଼ିଛି। ଚଳିତ ବର୍ଷ ୨୩ଟି ମଣ୍ଡପରେ ପ୍ରଭୁ ବିଶ୍ୱ ବିନ୍ଧାଣି ପୂଜା ପାଇବେ। ପୂଜା ମଣ୍ଡପକୁ ନିଆରା କରିବାକୁ ସମସ୍ତ ପୂଜା କମିଟିଗୁଡ଼ିକର ପ୍ରସ୍ତୁତି ଜୋରଦାର ଚାଲିଛି। ଏହି ପ୍ରସ୍ତୁତିରେ ସାମିଲ ହୋଇଛି ପଟ୍ଲାଇନ ପୂଜା କମିଟି। ସବୁଥର ପରି ନାଲକୋ ପଟ୍ଲାଇନ ଚଳିତ ଥର ମଧ୍ୟ ଆକର୍ଷଣୀୟ ଢଙ୍ଗରେ ପୂଜା ମଣ୍ଡପକୁ ପ୍ରସ୍ତୁତ କରିବାକୁ ଉଦ୍ୟମ ଚଳାଇଛି। ଏଥିପାଇଁ କମିଟି ପକ୍ଷରୁ ପ୍ରାୟ ୧୦ ଲକ୍ଷ ଟଙ୍କା ବଜେଟରେ ତୋରଣ ଓ ମଣ୍ଡପ ସାଜସଜ୍ଜା କରାଯାଉଛି। ପ୍ରାୟ ୧୨ ଫୁଟ ଉଚ୍ଚତାର ରାଜକୀୟ ଢଙ୍ଗରେ ବାହୁବଳୀ ସିନେମାର ମାହେସ୍ମତୀ ଭବନ ପରି ତୋରଣ ନିର୍ମାଣ ଚାଲିଛି। କମିଟିର ପ୍ରାୟ ୭ ଶହ ସଦସ୍ୟ ପୂଜା ପ୍ରସ୍ତୁତିରେ ସାମିଲ ହୋଇଛନ୍ତି। ରଙ୍ଗବେରଙ୍ଗର ଆଲୋକ ସଜ୍ଜା ଓ ସାଂସ୍କୃତିକ କାର୍ଯ୍ୟକ୍ରମ ଉପରେ ପ୍ରାଧାନ୍ୟ ଦିଆଯାଇଛି।
ଏ ସମ୍ପର୍କରେ ପୂଜା କମିଟିର ସମ୍ପାଦକ ବିଜୟ କୁମାର ସାହୁ କୁହନ୍ତି, ପ୍ରାୟ ୪୦ ଜଣ ବଙ୍ଗୀୟ କାରିଗରମାନଙ୍କ ଦ୍ୱାରା କାରୁକାର୍ଯ୍ୟ ହେଉଛି। ସବୁ ବର୍ଷ ପରି ଚଳିତ ବର୍ଷ ଆମ ପୂଜା ମଣ୍ଡପ ବାଜି ମାରିବ ବୋଲି ଆଶା କରିଛୁ। ନୂଆ ଢାଞ୍ଚାରେ ବାହୁବଳୀ ସିନେମା ଆଧାରରେ କାରୁକାର୍ଯ୍ୟ କରାଯାଉଛି। କମିଟି କୋଷାଧ୍ୟକ୍ଷ ଅଭିରାମ ଧୀର କୁହନ୍ତି, ଚଳିତ ବର୍ଷ ୧୦ ଲକ୍ଷ ଟଙ୍କା ବଜେଟ ରଖାଯାଇଛି। ବିଶେଷ କରି ପୂଜା ମଣ୍ଡପ ଓ ତୋରଣକୁ କିଭଳି ଆକର୍ଷଣୀୟ କରାଯିବ ସେଥିପ୍ରତି ଗୁରୁତ୍ୱ ଦିଆଯାଇଛି। ଏଥିସହ ପ୍ରସାଦ ସେବନ ସାଙ୍ଗକୁ ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି। କାରିଗର ହରମ୍ ଚନ୍ଦ୍ର କୁହନ୍ତି, ଚଳିତ ବର୍ଷ ପଟ୍ଲାଇନ ପୂଜା କମିଟି ମେଢ଼ ଧୁମ୍ଧାମ୍ ଭାବେ ପାଳିତ ହେଉଛି। ଏହି ମେଢ ସବୁଠାରୁ ଆକର୍ଷଣୀୟ ଓ ବଡ଼ ଆକାରରେ ଆୟୋଜନ କରାଯିବାକୁ ସମସ୍ତ ଉଦ୍ୟମ ଚାଲିଛି। ୪୦ ଜଣ ବଙ୍ଗୀୟ କାରିଗର ପୂଜା ପ୍ରସ୍ତୁତି କାର୍ଯ୍ୟରେ ଲାଗିଛନ୍ତି। ସ୍ବତନ୍ତ୍ର ଭାବେ ତୋରଣ ସାଜସଜ୍ଜା କରାଯାଇଛି।