ମୁମ୍ବାଇ,୨୪ା୨- ନ୍ୟୁଜିଲାଣ୍ଡରେ ଭାରତୀୟ ଦଳ ସଂଘର୍ଷ କରୁଥିବାବେଳେ ଏକ ଭଲ ଖବର ସାମ୍ନାକୁ ଆସିଛି। ଅସ୍ତ୍ରୋପଚାର କରାଯିବାର ୫ ମାସ ପରେ ହାର୍ଦ୍ଦିକ ପାଣ୍ଡ୍ୟା ଫିଟ୍ ହୋଇଛନ୍ତି। ଦୀର୍ଘଦିନର ବ୍ୟବଧାନ ପରେ ପାଣ୍ଡ୍ୟା ପଡ଼ିଆ ଓହ୍ଲାଇବେ। ୨୬ ବର୍ଷୀୟ ଫିଟ୍ ଅଲରାଉଣ୍ଡର ଡି ଓ୍ବାଇ ପାଟିଲ ଟି୨୦ ଟୁର୍ନାମେଣ୍ଟରେ ଅଂଶଗ୍ରହଣ କରିବେ। ସେ ରିଲାଏନ୍ସ ଓ୍ବାନ ପାଇଁ ନବି ମୁମ୍ବାଇରେ ଖେଳିବେ। ରିଲାଏନ୍ସ ଓ୍ବାନ ୩ ମ୍ୟାଚ୍ ଚଳିତମାସ ୨୫, ୨୮ ଓ ମେ ୩ ତାରିଖରେ ଖେଳିବ। ରିଲାଏନ୍ସ ଓ୍ବାନ ଦଳରେ ହାର୍ଦ୍ଦିକଙ୍କ ନାମ ରହିଛି। ସେ ଡିଓ୍ବାଇ ପାଟିଲ ଟି୨୦ ଟୁର୍ନାମେଣ୍ଟରେ ଖେଳିବେ। ତାଙ୍କୁ ଜାତୀୟ କ୍ରିକେଟ ଏକାଡେମୀ (ଏନ୍ସିଏ) ଏହି ସୁଯୋଗ ପ୍ରଦାନ କରିଛି ବୋଲି ସୂତ୍ରରୁ ଜଣାପଡ଼ିଛି। ସେ ଗତବର୍ଷ ସେପ୍ଟେମ୍ବର ୨୨ ତାରିଖରେ ଦକ୍ଷିଣ ଆଫ୍ରିକା ବିପକ୍ଷରେ ଅନ୍ତିମ ଟି୨୦ ମ୍ୟାଚ୍ ଖେଳିଥିଲେ। ବ୍ୟସ୍ତବହୁଳ କାର୍ଯ୍ୟସୂଚୀରେ ଭାରତ ବହୁ ସୀମିତ ଓଭର କ୍ରିକେଟ ଖେଳୁଛି ଏବଂ ପାଣ୍ଡ୍ୟାଙ୍କ ଅନୁପସ୍ଥିତି ମଧ୍ୟ ଅନୁଭବ କରୁଛି। ଜାତୀୟ ଚୟନକର୍ତ୍ତା ଏବେ ଡିଓ୍ବାଇ ପାଟିଲ ଷ୍ଟାଡିୟମ ଗସ୍ତ କରି ପାଣ୍ଡ୍ୟାଙ୍କ ଫିଟ୍ନେସ ଓ ଫର୍ମ ଦେଖିବେ। ଯଦି ସେ ନିଜ ଫିଟ୍ନେସ ପ୍ରମାଣ କରିବାରେ ସଫଳ ହୁଅନ୍ତି, ତେବେ ତାଙ୍କୁ ନିଶ୍ଚିତ ଦକ୍ଷିଣ ଆଫ୍ରିକା ବିପକ୍ଷ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଲାଗି ଭାରତୀୟ ଦଳରେ ତାଙ୍କୁ ସ୍ଥାନ ମିଳିବ। ଏହି ସିରିଜ୍ ମାର୍ଚ୍ଚ ୧୨ ତାରିଖଠାରୁ ଧର୍ମଶାଳାଠାରେ ଆରମ୍ଭ ହେବ। ପାଣ୍ଡ୍ୟା ଏପର୍ଯ୍ୟନ୍ତ ୧୧ ଟେଷ୍ଟ, ୫୪ ଦିନିକିଆ ଓ ୪୦ ଟି୨୦ ମ୍ୟାଚ୍ ଖେଳିସାରିଛନ୍ତି।