ନୂଆଦିଲ୍ଲୀ,୨୪।୬: କରୋନା ଭାଇରସ୍ ବିରୋଧରେ ବର୍ତ୍ତମାନ ସାରା ବିଶ୍ୱ ଲଢୁଥିବା ବେଳେ ପତଞ୍ଜଳି ଆୟୁର୍ବେଦ କୋରୋନିଲ୍ ନାମରେ ଔଷଧ ପ୍ରସ୍ତୁତ କରିଥିବା ଯୋଗଗୁରୁ ରାମଦେବ ମଙ୍ଗଳବାର ଦାବି କରିଛନ୍ତି। ବର୍ତ୍ତମାନ କେନ୍ଦ୍ର ଆୟୁଷ ମନ୍ତ୍ରଣାଳୟ ଏହି ପ୍ରସଙ୍ଗରେ କମ୍ପାନୀଠାରୁ ସ୍ପଷ୍ଟୀକରଣ ଲୋଡ଼ିଛି। ଏହି ଔଷଧ ସମ୍ପର୍କରେ ପତଞ୍ଜଳି ଆୟୁର୍ବେଦଠାରୁ ମନ୍ତ୍ରଣାଳୟ ସବିଶେଷ ତଥ୍ୟ ମାଗିଥିବା ଜଣାପଡ଼ିଛି। କିଭଳି ଆଧାରରେ କମ୍ପାନୀ ଏଭଳି ଦାବି କରୁଛି ଏହାର ମେଡିସିନ ବୈଜ୍ଞାନିକ ପରୀକ୍ଷଣ ହୋଇଛି କି ନାହିଁ ସେ ନେଇ ଜଣାଇବାକୁ ପତଞ୍ଜଳିକୁ କୁହାଯାଇଛି। ଏହି ମାମଲା ସମାଧାନ ନ ହେଲା ଯାଏ ଔଷଧ ସମ୍ପର୍କିତ ବିଜ୍ଞାପନ ବନ୍ଦ କରିବାକୁ ମନ୍ତ୍ରଣାଳୟ ପକ୍ଷରୁ କମ୍ପାନୀକୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି। କୋରୋନିଲ୍ ଦ୍ୱାରା ଆୟୁର୍ବେଦିକ ଉପାୟରେ କରୋନାର ସଫଳ ଚିକିତ୍ସା କରାଯାଇପାରିବ ବୋଲି ରାମଦେବ ଦାବି କରିଛନ୍ତି। ମଙ୍ଗଳବାର ରାମଦେବ, ଆଚାର୍ଯ୍ୟ ବାଲ୍କ୍ରିଷ୍ଣା ଏକ ଖବରଦାତା କାର୍ଯ୍ୟକ୍ରମରେ ଏ ସମ୍ପର୍କରେ ଘୋଷଣା କରିଥିଲେ। ଖବରଦାତା କାର୍ଯ୍ୟକ୍ରମରେ ମେଡିସିନ ପ୍ରସ୍ତୁତି କ୍ଷେତ୍ରରେ ଯୋଗଦାନ ରଖିଥିବା ବୈଜ୍ଞାନିକ, ଡାକ୍ତର, ଗବେଷକ ମଧ୍ୟ ସାମିଲ ଥିଲେ।
ଏହି ଅବସରରେ ରାମଦେବ କହିଛନ୍ତି ଯେ, କରୋନାକୁ ଭଲ କରିବା ଦିଗରେ ପରୀକ୍ଷାମୂଳକ ଭାବେ ଏହା ପ୍ରଥମ ଆୟୁର୍ବେଦିକ ମେଡିସିନ। ପତଞ୍ଜଳିର ହରିଦ୍ୱାରସ୍ଥିତ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍ ଏବଂ ଜୟପୁର ଭିତ୍ତିକ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଦ୍ୱାରା ଉକ୍ତ ଔଷଧକୁ ପରୀକ୍ଷା କରାଯାଇଛି। ମେଡିସିନର ପ୍ରସ୍ତୁତି ପତଞ୍ଜଳି ଆୟୁର୍ବେଦ ଲିମିଟେଡ୍ ଏବଂ ଦିବ୍ୟ ଫାର୍ମାସୀ ହରିଦ୍ୱାର ଦ୍ୱାରା କରାଯାଇଛି। ମେଡିସିନ ପ୍ରସ୍ତୁତି ଲାଗି ସ୍ବଦେଶୀ ସାମଗ୍ରୀ ବ୍ୟବହାର କରାଯାଇଛି। ଅଶ୍ୱଗନ୍ଧା, ତୁଳସୀ ସମେତ ଅନ୍ୟ ମୂଲ୍ୟବାନ ଜଡିବୁଟିର ସମ୍ମିଶ୍ରଣରେ ଏହାକୁ ପ୍ରସ୍ତୁତ କରାଯାଇଛି। ପତଞ୍ଜଳି ଷ୍ଟୋରଗୁଡିକରେ ଏହି ଔଷଧ ୬୦୦ ଟଙ୍କାରେ ଉପଲବ୍ଧ ହେବ ବୋଲି ସୂଚନା ରହିଛି। ସେହିଭଳି ଆର୍ଥତ୍କ ଦୁର୍ବଳ ବର୍ଗଙ୍କ ଲାଗି ଏହି ଔଷଧକୁ ମାଗଣାରେ ପ୍ରଦାନ କରିବା ଲାଗି ପଦକ୍ଷେପ ନିଆଯିବ ବୋଲି ରାମଦେବ ମତ ପ୍ରକାଶ କରିଛନ୍ତି। ପତଞ୍ଜଳି ମେଗା ଷ୍ଟୋରରେ ଉପଲବ୍ଧ ହେବାକୁ ଥିବା ଏହି ଔଷଧ ମଧ୍ୟରେ ଗ୍ରାହକଙ୍କୁ ଦିବ୍ୟ କରୋନା କିଟ୍ ଉପଲବ୍ଧ ହେବ। ଏଥିରେ ୩ ପ୍ରକାର ଔଷଧ ସାମିଲ ରହିବ। କୋନୋନିଲ୍ ଟାବଲେଟ ସହ ରେସ୍ପିରେଟୋରି ସିଷ୍ଟମ ଏବଂ ନାଜାଲ ଡ୍ରପ୍ ଏଥିରେ ରହିଛି। ଉକ୍ତ ମେଡିସିନକୁ ପ୍ରାଥମିକ ପର୍ଯ୍ୟାୟରେ ୧୦୦ ଜଣକ ଉପରେ ପରୀକ୍ଷଣ କରାଯାଇଥିବା ବେଳେ ୩ ଦିନରେ ୬୯% ଏବଂ ଗୋଟିଏ ସପ୍ତାହରେ ୧୦୦% ରୋଗୀ ଠିକ୍ ହୋଇଯାଇଥିବା ପତଞ୍ଜଳି ଆୟୁର୍ବେଦ ପକ୍ଷରୁ ଦାବି କରାଯାଇଛି।