ବାହାନଗା, ୧୧ା୮(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ନୂଆପୁର ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ନିଳାମ୍ବର ମଳିକ(୪୮) ତାଙ୍କ ସ୍ତ୍ରୀଙ୍କୁ ଧାନ ବିଲରେ ମାଡ ମାରି ନିଆଁରେ ପୋଡି ଦେବାପରେ ନିଜେ ବିଷ ବିଇ ଆମତ୍ହତ୍ୟା ଉଦ୍ୟମ କରିଛନ୍ତି। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ମେଡ଼ିକାଲରେ ଭର୍ତ୍ତି କରାଯାଇଛି।
ନୂଆପୁର ଗ୍ରାମର ନୀଳାମ୍ବର ଶନିବାର ଦିନସାରା ନିକଟସ୍ଥ ଅରଳା ସୀମାରେ ଥିବା ନିଜ ଧାନ ବିଲରେ ମଦ୍ୟପାନ କରି ଆଉ ଘରକୁ ଫେରି ନ ଥିଲେ। ତାଙ୍କ ସ୍ତ୍ରୀ ସାବିତ୍ରୀ (୪୨) ଅପରାହ୍ନ ୪ଟାରେ ସେହି ବିଲକୁ ଯାଇ ସ୍ବାମୀଙ୍କୁ ଘରକୁ ଯିବା ପାଇଁ ଡାକିଥିଲେ। ଏହି ସମୟରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ନୀଳମ୍ବର ଉତ୍ତ୍ୟକ୍ତ ହୋଇ ସାବିତ୍ରୀଙ୍କୁ ମାଡ ମାରିଥିଲେ। ସାବିତ୍ରୀ ତଳେ ପଡିଯାଇ ଅଚେତ ହେବାରୁ ନୀଳାମ୍ବର ସେହି ବିଲରେ ସାବିତ୍ରୀଙ୍କୁ ନିଆଁ ଲଗାଇ ପୋଡି ଦେଇଥିଲେ। ପରେ ନୀଳାମ୍ବରଙ୍କ ନିଶା ଛାଡିବା ପରେ ସନ୍ଧ୍ୟାରେ ସେ ବିଲରେ ପକାଇବା ପାଇଁ ଆଣିଥିବା କିଟନାଶକ ପିଇ ଆମତ୍ହତ୍ୟା ଉଦ୍ୟମ କରିଥିଲେ। ତେବେ ତାଳପଦା-ଗୋପାଳପୁର ରାସ୍ତାରେ ଯାଉଥିବା ଲୋକମାନେ ବିଲରେ ନିଆଁ ଜଳୁଥିବା ଦେଖି କିଛି ବୁଝି ପାରି ନ ଥିଲେ। ସନ୍ଧ୍ୟାରେ ନୀଳାମ୍ବର ନିଜେ ବିଲରୁ ରାସ୍ତାକୁ ଆସି ସ୍ତ୍ରୀଙ୍କୁ ମାଡ ମାରି ପୋଡିଦେବା ସହ ବିଷ ପିଇଦେଇଥିବା କହିଥିଲେ। ସ୍ଥାନୀୟ ଲୋକେ ଏହା ଶୁଣି ତାଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରିଥିଲେ। ଏ ବିଷୟରେ ଲୋକେ ଗୋପାଳପୁର ଫାଣ୍ଡିକୁ ଜଣାଇବା ପରେ ଫାଣ୍ଡି ଅଧିକାରୀ ବଂଶୀଧର ପ୍ରଧାନ ପହଞ୍ଚି ପୋଡା ଶବକୁ ଜବତ କରିଛି। ଏହି ଘଟଣାକୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଦେଖାଦେଇଛି ା