ରାଇରଙ୍ଗପୁର,୨ା୬(ଡି.ଏନ୍.ଏ.)- ମୟୂରଭଞ୍ଜ ଜିଲା ରାଇରଙ୍ଗପୁର ଟାଉନଥାନା ଅଧୀନ ବଡ଼ପାଖଣା ଗ୍ରାମର ଜଣେ ବ୍ୟକ୍ତିଙ୍କୁ ପଥରରେ ଛେଚି ନିର୍ମମ ଭାବେ ହତ୍ୟା କରାଯାଇଛି। ଘଟଣାରେ ସମ୍ପୃକ୍ତ ଯୁବକଙ୍କୁ ପୋଲିସ ସୋମବାର ଗିରଫ କରିଛି। ଅଭିଯୁକ୍ତ ହେଲେ ବହଳଦା ଥାନା ଗୁହାଳଡ଼ାଙ୍ଗିରି ଗ୍ରାମର ତରଣୀସେନ ଧୀର। ମୃତ ଚନ୍ଦ୍ରମୋହନ ମହାନ୍ତଙ୍କ ପୁଅ ଉମେଶଙ୍କ ଅଭିଯୋଗକୁ ଭିତ୍ତି କରି ପୋଲିସ ଏକ ହତ୍ୟା ମାମଲା (ନଂ.୮୬/୨୦୨୦) ରୁଜୁ କରି ସାଇଣ୍ଟିଫିକ୍ ଟିମ୍ ସହାୟତାରେ ତଦନ୍ତ ଚଳାଇଛି। ମଙ୍ଗଳବାର ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି।
ପୋଲିସ ସୂଚନା ଅନୁଯାୟୀ, ମୃତ ଚନ୍ଦ୍ରମୋହନଙ୍କ ସ୍ତ୍ରୀଙ୍କ ଉପରେ ତରଣୀସେନଙ୍କ ପୂର୍ବରୁ ଖରାପ ନଜର ରହିଥିଲା। ଚନ୍ଦ୍ରମୋହନ ଏ ସମ୍ପର୍କରେ ଜାଣିବା ପରେ ତରଣୀସେନଙ୍କ ଘରକୁ ପଚାରିବା ପାଇଁ ଯାଇଥିଲେ। ସେଠାରୁ ଫେରୁଥିବା ବେଳେ ଅଭିଯୁକ୍ତ ଯୁବକ ତାଙ୍କ ପିଛା କରି ଆସିଥିଲେ। ବଡ଼ପାଖଣା ଗ୍ରାମ ରାସ୍ତାପାର୍ଶ୍ୱ ଏକ ଘଞ୍ଚ ବୁଦା ନିକଟରେ ଏକୁଟିଆ ପାଇ ଚନ୍ଦ୍ରମୋହନଙ୍କ ମୁଣ୍ଡକୁ ଏକ ପଥରରେ ଛେଚି ହତ୍ୟା କରିବା ପରେ ତରଣୀସେନ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଖବରପାଇ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ପୋଲିସ ଅଭିଯୁକ୍ତ ତରଣୀସେନଙ୍କୁ ତାଙ୍କ ଘରୁ ଗିରଫ କରିଥିଲା। ପୋଲିସ ନିକଟରେ ଅଭିଯୁକ୍ତ ନିଜ ଦୋଷ ସ୍ବୀକାର କରିଥିବା ରାଇରଙ୍ଗପୁର ଏସ୍ଡିପିଓ ସ୍ନେହାଶିଷ ସାହୁ ଏବଂ ଥାନା ଅଧିକାରିଣୀ ରେଣୁବାଳା ସାହୁ କହିଛନ୍ତି।
