କଟକ ଅଫିସ,୨୫ା୫: ନିହାଣ ମୁନରେ ନିଜ ପ୍ରତିଭାର ଛାପ ଛାଡ଼ିଛନ୍ତି ଯୁବଶିଳ୍ପୀ ହିମାଂଶୁ ଶେଖର ପରିଡ଼ା (୩୩)। ଲକ୍ଡାଉନ୍ ସମୟର ସଦୁପଯୋଗ କରି ସେ ଏକ ଚମତ୍କାର ମୂର୍ତ୍ତି ନିର୍ମାଣ କରିଛନ୍ତି। ପଥରରେ ଦୁର୍ଗାଙ୍କ ଦଶଭୁଜା ମୂର୍ତ୍ତି ପ୍ରତିଫଳିତ ହୋଇଛି। ମହାନଦୀ ବିହାର ଅଞ୍ଚଳର ହିମାଂଶୁ ଜଣେ ଅନ୍ତର୍ଜାତୀୟ ଶିଳ୍ପୀ ଭାବେ ପ୍ରସିଦ୍ଧି ଅର୍ଜନ କରିଛନ୍ତି। ନିଜ କଳାକୃତିକୁ ନେଇ ସେ ଇଟାଲୀ, ସ୍ଲୋଭାନିଆ, ଫ୍ରାନ୍ସ, ଅଷ୍ଟ୍ରିଆ ଭଳି ଦେଶ ବୁଲିଛନ୍ତି। ଏବେ ନିର୍ମାଣ କରିଥିବା ମୂର୍ତ୍ତି ସବୁ କଳାକୃତିଠାରୁ ଭିନ୍ନ ବୋଲି ସେ କହିଛନ୍ତି। ମୂର୍ତ୍ତିରେ ଦେବୀ ଦୁର୍ଗାଙ୍କ ଦଶଭୁଜା ବେଶ ପାଇଁ ପ୍ରତିଟି ଚରିତ୍ରକୁ ଜୀବନ୍ତ ରୂପ ଦିଆଯାଇଛି। ୩ ମାସର ସମୟ ନେଇ ମୂର୍ତ୍ତି କାର୍ଯ୍ୟ ଶେଷ କରିଥିବା ହିମାଂଶୁ କହିଛନ୍ତି। ପଥର ଓ କାଠର ମିଶ୍ରଣକୁ ନେଇ ହିମାଂଶୁ ପୂର୍ବରୁ ଅନେକ କଳାକୃତି କରିଛନ୍ତି। ତାଙ୍କ ଦ୍ୱାରା ତିଆରି ପଥର ପନିପରିବା ମଧ୍ୟ ସହରରେ ଚର୍ଚ୍ଚାର ଖୋରାକ ଯୋଗାଇଥିଲା। ଉଲ୍ଲେଖଯୋଗ୍ୟ, ହିମାଂଶୁଙ୍କ ବାପା ଗଗନ ବିହାରୀ ପରିଡ଼ା ମଧ୍ୟ ଜଣେ ନାମୀ ଭାସ୍କର୍ଯ୍ୟଶିଳ୍ପୀ। ହିମାଂଶୁ ଭାସ୍କର୍ଯ୍ୟ କଳାରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି।