ଅନୁଗୋଳ ଅଫିସ, ୨୭।୨ – ଅନୁଗୋଳ ପୌରପାଳିକାରେ ଖାଲି ପଡ଼ିଥିବା ବିଭିନ୍ନ ପଦପଦବୀକୁ ନେଇ ଏବେ କର୍ମଚାରୀଙ୍କ ମଧ୍ୟରେ ଚାଲିଛି ଅଙ୍କକଷା। ଘଣ୍ଟାକୁ ଘଣ୍ଟା ସେମାନେ ମେଳି ବାନ୍ଧି କାହାକୁ କେଉଁ ଚୌକି ମିଳିବ ସେ ସମ୍ପର୍କରେ ଆଲୋଚନା କରୁଛନ୍ତି। ଗତ ସପ୍ତାହେ ହେଲା ପୌରପାଳିକାରେ ଏପରି ଦୃଶ୍ୟ ଦେଖିବାକୁ ମିଳୁଥିବା ଏବେ ସହରରେ ଚର୍ଚ୍ଚାର ବିଷୟ ହୋଇଛି।
ପ୍ରକାଶ ଯେ, ଅନୁଗୋଳ ପୌରପାଳିକାରେ ଦୀର୍ଘ ୩୦ ବର୍ଷ ଧରି ଟ୍ୟାକ୍ସ ଦାରୋଗା ଓ ବିଜୁଳି ବିଭାଗ ଦାୟିତ୍ୱରେ ଥିବା ବରିଷ୍ଠ କର୍ମଚାରୀ ଚିତ୍ତରଞ୍ଜନ ପ୍ରଧାନଙ୍କ ତାଳଚେର ପୌରପାଳିକାକୁ ପଦୋନ୍ନତି ସହ ବଦଳି ହୋଇଛି। ସେହିପରି ପରିମଳ ବିଭାଗରେ ଥିବା ଆଶିଷ ଦାସଙ୍କ ପାରାଦୀପ ପୌରପାଳିକାକୁ ପଦୋନ୍ନତି ସହ ବଦଳି ହୋଇଛି। ଚଳିତମାସ ଶେଷ ସୁଦ୍ଧା ସମ୍ପୃକ୍ତ ଦୁଇ କର୍ମଚାରୀଙ୍କୁ ଏଠାରୁ ରିଲିଭ କରାଯିବ। ସେଥିପାଇଁ ସମସ୍ତ ପ୍ରକ୍ରିୟା ଶେଷ କରିବାକୁ ଦୁଇ ଅଧିକାରୀ ଓ ପୌର ପ୍ରଶାସନ ଜୋରଦାର ପ୍ରସ୍ତୁତି କରୁଥିବା ବେଳେ ସେମାନଙ୍କ ବିଭାଗ ଦାୟିତ୍ୱ କେଉଁ କର୍ମଚାରୀଙ୍କୁ ମିଳିବ ତାହା ହିଁ ମୁଖ୍ୟ ଆଲୋଚନାର ବିଷୟ ହୋଇଛି। ଏ ନେଇ ପୌର କର୍ମଚାରୀଙ୍କ ମଧ୍ୟରେ ଏବେ ଉତ୍କଣ୍ଠା ଦେଖିବାକୁ ମିଳୁଛି। ଅନ୍ୟପଟେ ପୌର ନିର୍ବାହୀ ଅଧିକାରୀ ମଧ୍ୟ ଖାଲି ପଡ଼ିବାକୁ ଥିବା ବିଭିନ୍ନ ବିଭାଗର ଦାୟିତ୍ୱ କାହାକୁ ପ୍ରଦାନ କରିବେ ସେ ସମ୍ପର୍କରେ ଚିନ୍ତା କରିବା ସହ କର୍ମଚାରୀଙ୍କ କାର୍ଯ୍ୟ ଦକ୍ଷତା ପରଖୁଛନ୍ତି। କେଉଁ ବରିଷ୍ଠ କର୍ମଚାରୀ ଏହି ବିଭାଗଗୁଡ଼ିକ ସମ୍ଭାଳିଲେ ସହରବାସୀ ଉତ୍ତମ ସେବା ପାଇପାରିବେ ତାହାର ସମୀକ୍ଷା ଚଳାଇଛନ୍ତି। ସବୁଠୁ ଚିନ୍ତାଜନକ ହେଉଛି ପରିମଳ ବିଭାଗ କାହାକୁ ଦିଆଯିବ। ଏହାକୁ ନେଇ ମୁଖ୍ୟ ଅଡ଼ୁଆ ଥିବାରୁ ଶୀର୍ଷସ୍ତରରେ ବିଚାର ବିମର୍ଶ କରାଯାଉଥିବା ସୂଚନା ମିଳିଛି। ଅନ୍ୟପକ୍ଷରେ ଅନୁଗୋଳ ପୌରପାଳିକାରେ ବରିଷ୍ଠ କିରାଣି ଥିବା ବିଜୟ କୁମାର ତ୍ରିପାଠୀଙ୍କ ଆଠମଲ୍ଲିକ ଏନ୍ଏସିକୁ ନିର୍ବାହୀ ଅଧିକାରୀ ଭାବେ ବଦଳି ପରଠାରୁ ଗତ ୩ ବର୍ଷରୁ ଅଧିକ ସମୟ ହେବ ଏଠାରେ ଉକ୍ତ ପଦବୀ ଖାଲି ପଡ଼ିଛି। ଏ ନେଇ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ଦୁଇ ଅଧିକାରୀଙ୍କ ବଦଳି ପରେ ୩ଟି ବିଭାଗରେ ନୂତନ କର୍ମଚାରୀଙ୍କୁ ନିୟୋଜିତ କରାଯିବ। ଏ ସମ୍ପର୍କିତ ନିଷ୍ପତ୍ତି ଖୁବ୍ଶୀଘ୍ର ନିଆଯିବ ବୋଲି ସେ କହିଛନ୍ତି। ତେବେ ଜଣେ ବରିଷ୍ଠ କିରାଣି ପୌରପାଳିକାକୁ ଦେବା ପାଇଁ ସରକାରଙ୍କୁ କୁହାଯାଇଥିବା ନିର୍ବାହୀ ଅଧିକାରୀ ପ୍ରକାଶ କହିଛନ୍ତି।