ପୁରୀ ଅଫିସ, ୩୦ା୧: ମହାପ୍ରଭୁ ଶ୍ରୀଜଗନ୍ନାଥଙ୍କ ସେବା କରିବାକୁ କାହାର ବା ଇଚ୍ଛା ନ ଥାଏ। କିନ୍ତୁ ସମସ୍ତଙ୍କୁ ସେ ସୁଯୋଗ ମିଳି ନ ଥାଏ। ହେଲେ ଯେଉଁମାନେ ଏପରି ସୁଯୋଗ ପାଇଥାନ୍ତି ସେମାନେ ନିଜକୁ ଭାଗ୍ୟବାନ ମଣିଥାନ୍ତି। ଏମିତି ମହାପ୍ରଭୁଙ୍କ ପାଇଁ ଛୋଟ ସେବାଟିଏ କରିବାକୁ ଇଚ୍ଛା କରିଥିଲେ ଅବସରପ୍ରାପ୍ତ ସଂସ୍କୃତ ଶିକ୍ଷକ ୬୫ ବର୍ଷୀୟ ଚିନ୍ତାମଣି ଦାଶ। ଠାକୁରଙ୍କ ପଦ୍ମ ବେଶ ପାଇଁ ପଦ୍ମଫୁଲ ଦେବା ଲାଗି ଆଗ୍ରହ ରଖିଥିଲେ, ଯେଉଁଥିପାଇଁ କ୍ରମାଗତ ୧୦ ବର୍ଷ ହେଲା ନିଜ ସାମର୍ଥ୍ୟ ଅନୁଯାୟୀ ପଦ୍ମଫୁଲର ମାଳ ଯୋଗାଇ ଆସୁଛନ୍ତି।
ବୁଧବାର ଠାକୁରଙ୍କ ପଦ୍ମବେଶ ଲାଗି ଝୁଡ଼ିିଏ ପଦ୍ମଫୁଲ ଆଣି ପୁରୀ ଆସିଥିବା ଚିନ୍ତାମଣି କହିଛନ୍ତି, ଅଚ୍ୟୁତାନନ୍ଦଙ୍କୁ ପଦ୍ମଫୁଲ ମାଳ ଦେଇ ଆସୁଥିଲି। ଦିନେ ଘରେ ପୂଜା କରୁଥିବାବେଳେ ମହାପ୍ରଭୁଙ୍କୁ ପଦ୍ମଫୁଲ ଦେବାକୁ ମନ ହେଲା। ୨୦୧୧ ପଦ୍ମବେଶ ଦିନ ପ୍ରଥମଥର ଲାଗି ମହାପ୍ରଭୁଙ୍କ ପାଇଁ ପଦ୍ମଫୁଲ ଦେବାର ସୁଯୋଗ ପାଇଲି। ସେବେଠାରୁ ପ୍ରତିବର୍ଷ ପଦ୍ମବେଶରେ ଠାକୁରଙ୍କ ପାଇଁ ପଦ୍ମଫୁଲ ଆଣି ଦେଉଛି।
ଠାକୁରଙ୍କୁ ପଦ୍ମଫୁଲ ଯୋଗାଇଦେବା ଲାଗି ଧଉଳି ପାହାଡ଼ ନିକଟ ଆଖପାଖ ଗ୍ରାମର ୫ଟି ପୋଖରୀକୁ ଲିଜ୍ ସୂତ୍ରରେ ନେଇଛନ୍ତି ଚିନ୍ତାମଣି। ବର୍ଷତମାମ୍ ପୋଖରୀରେ ଫୁଲଚାଷ କରାଯାଏ। କିନ୍ତୁ ଶୀତଦିନେ ଫୁଲର ଅଭାବ ଏବଂ ଲୋକେ ନେଇଯାଉଥିବାରୁ ପ୍ରାୟ ୩ମାସ ପୂର୍ବରୁ ସେ ଲୋକ ରଖି ଜଗାରଖା କରିଥାନ୍ତି। ମଙ୍ଗଳବାର ଏହି ପୋଖରୀଗୁଡ଼ିକରୁ ପ୍ରାୟ ୩ ହଜାରରୁ ଊର୍ଦ୍ଧ୍ୱ ଫୁଲ ତୋଳା ଯାଇଥିଲା। ବୁଧବାର ସକାଳୁ ଶୁଦ୍ଧପୂତ ଭାବେ ୪୦ ଜଣ ଲୋକ ମାଳ ଗୁନ୍ଥା କାର୍ଯ୍ୟରେ ନିୟୋଜିତ ଥିଲେ। ୩୦ ଜଣ ଫୁଲଗୁଡ଼ିକୁ ଫୁଟାଇଥିବାବେଳେ ୧୦ ଜଣ କଦଳୀ ପାଟୁକାରେ ମାଳ ଗୁନ୍ଥିଥିଲେ। ଅପରାହ୍ନରେ ସହଧର୍ମିଣୀଙ୍କୁ ସାଥୀରେ ଧରି ଶ୍ରୀମନ୍ଦିରକୁ ଆସି ଫୁଲମାଳ ଦେଇଥିଲେ ଚିନ୍ତାମଣି।
ପ୍ରତିବର୍ଷ ପୁରୀ ଆସିବାବେଳେ ଚିନ୍ତାମଣି ମା’ ବାଟମଙ୍ଗଳାଙ୍କୁ ୫୪ଟି ଫୁଲରେ ଗୁନ୍ଥା ଯାଇଥିବା ମାଳ ଦିଅନ୍ତି। ସେହିପରି ଶ୍ରୀମନ୍ଦିର ପରିସରସ୍ଥ ମା’ ବିମଳା, ଭୁବନେଶ୍ୱରୀ ଓ ମହାଲକ୍ଷ୍ମୀଙ୍କ ପାଇଁ ମଧ୍ୟ ପଦ୍ମମାଳ ପ୍ରଦାନ କରିଥାନ୍ତି। ଚିନ୍ତାମଣି କହିଛନ୍ତି, ସେ ତ ଜଗତ ନିୟନ୍ତା, ତାଙ୍କୁ ବା ମୁଁ କ’ଣ ଦେଇପାରିବି। ମୋ’ ଇଚ୍ଛାରେ ଏହି ଫୁଲ ଦେଉନାହିଁ, ଯାହା ହେଉଛି ଭଗବାନଙ୍କ ଇଚ୍ଛାରେ ହିଁ ହେଉଛି। ମହାପ୍ରଭୁ ଯେତେ ଦିନ ଯାଏ ଚାହିଁଥିବେ ସେତେଦିନ ଯାଏ ଫୁଲ ଆଣି ଶ୍ରୀମନ୍ଦିରରେ ଦେଉଥିବି। ବାଟମଙ୍ଗଳାଙ୍କୁ ଫୁଲମାଳ ଦେବା ସଂକ୍ରାନ୍ତରେ କୁହନ୍ତି, ମା’ଙ୍କ କୃପା ନ ହେଲେ ମହାପ୍ରଭୁଙ୍କ ନବକଳେବର ପାଇଁ ଦାରୁ ମିଳି ନ ଥାଏ। ତେଣୁ ଠାକୁରଙ୍କ ପାଖକୁ ଯିବା ପୂର୍ବରୁ ପ୍ରଥମେ ମା’ଙ୍କୁ ଦର୍ଶନ ଏବଂ ଫୁଲମାଳ ପ୍ରଦାନ ପୂର୍ବକ ଆରାଧନା କରି ଶ୍ରୀମନ୍ଦିର ଅଭିମୁଖେ ଯାଇଥାଏ।