ଅନୁଗୋଳ ଅଫିସ, ୧୧।୫: ଗ୍ରୀନ୍ ଜୋନ୍ରେ ଥିବା ଅନୁଗୋଳକୁ ଛୁଇଁଛି ମହାମାରୀ କରୋନା ଭୂତାଣୁ। ଏକାବେଳେ ୧୫ ପଜିଟିଭ୍ଙ୍କୁ ନେଇ ଜିଲାରେ ପାଦ ଥାପିଛି କୋଭିଡ-୧୯। ରବିବାର ସକାଳେ ୧୩ ସଂକ୍ରମିତଙ୍କ ରିପୋର୍ଟ ଆସିବା ପରେ ତତ୍ପରତା ପ୍ରକାଶ କରିଛି ଜିଲା ପ୍ରଶାସନ। ଏହି ୧୫ ପଜିଟିଭଙ୍କ ମଧ୍ୟରୁ ୧୩ଜଣ ସୁରଟ ଓ ଜଣେ ମହାରାଷ୍ଟ୍ର ଫେରନ୍ତା ହୋଇଥିବା ବେଳେ ଅନ୍ୟ ଜଣେ ସ୍ଥାନୀୟ ଯୁବକ ବୋଲି ଜଣାପଡ଼ିଛି। ତେବେ ସମସ୍ତେ କ୍ୱାରାଣ୍ଟାଇନରେ ଥିବାରୁ ଜିଲାବାସୀ ଭୟଭୀତ ହୁଅନ୍ତୁ ନାହିଁ ବୋଲି ଜିଲାପାଳ ମନୋଜ କୁମାର ମହାନ୍ତି ଆଶ୍ୱାସନା ଦେଇଛନ୍ତି। ସମସ୍ତ ସଂକ୍ରମିତଙ୍କୁ ତାଳଚେରଠାରେ ନିର୍ମିତ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି।
ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ସକାଳେ ଅନୁଗୋଳ ଜିଲାରେ ୧୩ ପଜିଟିଭ ଥିବା କୁହାଯାଇଥିଲା। ସେହିପରି ସନ୍ଧ୍ୟାରେ ଆଉ ୨ ଜଣଙ୍କ ସ୍ବାବ୍ ରିପୋର୍ଟ ପଜିଟିଭ ଆସିଥିବା ସୂଚନା ଦିଆଯାଇଥିଲା। ଆକ୍ରାନ୍ତମାନଙ୍କ ବୟସ ୨୧ରୁ ୩୬ ବର୍ଷ ମଧ୍ୟରେ ହୋଇଥିବା ବେଳେ ୧୩ଜଣ ନିକଟରେ ସୁରଟରୁ ଫେରି କ୍ୱାରାଣ୍ଟାଇନ୍ ସେଣ୍ଟରରେ ଥିଲେ। ତେବେ ସଂକ୍ରମିତ ଯୁବକମାନଙ୍କ ମଧ୍ୟରୁ ସର୍ବାଧିକ ଆଠମଲ୍ଲିକ ବ୍ଲକ ଅଞ୍ଚଳର। ଅନ୍ୟମାନେ ଅନୁଗୋଳ, ବଅଁରପାଳ ଓ ଛେଣ୍ଡିପଦାର ବୋଲି ଜଣାପଡ଼ିଛି। ଅନୁଗୋଳ ଜିଲାରେ କରୋନା ଆକ୍ରାନ୍ତଙ୍କ ଥିବା ଜଣାପଡ଼ିବା ପରେ ଲୋକଙ୍କ ମଧ୍ୟରେ ହଇଚଇ ଖେଳିଯାଇଥିଲା। ଏପରି କି ଅନୁଗୋଳ ସହର ସହ ଜିଲାର ବିଭିନ୍ନ ବଜାର ପୂର୍ବାହ୍ନରୁ ଖଁା ଖଁା ହୋଇଯାଇଥିଲା। ଜରୁରୀ କାମରେ ବାହାରିଥିବା ଲୋକମାନେ ମଧ୍ୟ ଶୀଘ୍ର ଘରକୁ ପଳାଇ ଯାଇଥିବା ଦେଖାଯାଇଥିଲା। ପରେ ଅନୁଗୋଳ ଉପଜିଲାପାଳ ବାସୁଦେବ ଶତପଥୀ, ତହସିଲଦାର ନେହୁରୁ ମାଝି, ଏସ୍ଡିପିଓ ଅଶ୍ୱିନୀ ସାହୁ, ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ, ମେଡିକାଲ ଟିମ୍ର ସୁବାସ ଚନ୍ଦ୍ର ବେହେରା, ଅନୁଗୋଳ ପୌରପାଳିକା କର୍ମଚାରୀ ପ୍ରମୁଖଙ୍କ ସହ ଅନ୍ୟମାନେ ସମସ୍ତ ଆକ୍ରାନ୍ତଙ୍କୁ କଡ଼ା ସୁରକ୍ଷା ବଳୟ ମଧ୍ୟରେ ତାଳଚେରରେ ହୋଇଥିବା କୋଭିଡ-୧୯ ହସ୍ପିଟାଲକୁ ପଠାଇଥିଲେ। ସକାଳେ ରିପୋର୍ଟ ଆସିଥିବା ୧୩ଜଣଙ୍କ ମଧ୍ୟରୁ ୧୨ ଜଣଙ୍କୁ ପଜିଟିଭ୍ ୱାର୍ଡରେ ରଖାଯାଇଥିବାବେଳେ ସ୍ଥାନୀୟ ଅଞ୍ଚଳର ସଂକ୍ରମିତ ଯୁବକଙ୍କୁ ଅବଜରଭେସନ୍ ଗୃହରେ ରଖାଯାଇଛି ବୋଲି ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି। ଅନ୍ୟପକ୍ଷରେ ଜିଲାକୁ ପାଖାପାଖି ୧୭ ହଜାର ପ୍ରବାସୀ ଆସିବେ ବୋଲି ପ୍ରଶାସନ ପକ୍ଷରୁ ଆକଳନ କରାଯାଇଥିଲା। କିନ୍ତୁ ଶନିବାର ସୁଦ୍ଧା ୫୪୦ ଜଣ ଫେରିଥିବାବେଳେ ସୁରଟ ଓ ମହାରାଷ୍ଟ୍ରରୁ ୧୦୯ ଜଣ ରବିବାର ଓଡ଼ିଶା ଆସିଥିବା ପ୍ରଶାସନ ପକ୍ଷରୁ କୁହାଯାଇଛି।