ସୋମବାର ଭାରତରେ ୫୯ଟି ଲୋକପ୍ରିୟ ଚାଇନିଜ ଆପ୍ ଉପରେ ପ୍ରତିବନ୍ଧକ ଲଗାଯାଇଛି। ଏଥିରେ ଟିକ୍ଟକ୍, ୟୁସି ବ୍ରାଉଜର, ହେଲୋ ଆପ ଏବଂ ଶେୟାରଇଟ ସହିତ ଅନେକ ଲୋକପ୍ରିୟ ଆପ୍ ଅନ୍ତର୍ଭୁକ୍ତ ରହିଛି ଯେଉଁଥିରେ ଭାରତରେ କୋଟି କୋଟି ଉପଭୋକ୍ତା ଥିଲେ। ତେବେ, ରୋଚକ ବିଷୟ ହେଉଛି ଯେ ତାଲିକାରେ ପବଜୀ, ଏବଂ ଜୁମ୍ ଭଳି ଲୋକପ୍ରିୟ ଆପ୍ଗୁଡିକ ନାହିଁ। ତାଲିକା ଦେଖିବା ପରେ ବହୁ ସଂଖ୍ୟକ ଲୋକ ପ୍ରଶ୍ନ ପଚାରୁଛନ୍ତି ଯେ, ଯେତେବେଳେ ଏତେ ଲୋକପ୍ରିୟ ଆପ ନିଷେଧ ହୋଇଛି, ଏହି ଦୁଇଟି ଆପ୍କୁ କାହିଁକି ଛାଡିଦିଆଗଲା।
ପବଜୀ ପ୍ରକୃତରେ ଏକ ଚାଇନିଜ ଆପ କି?
PlayerUnknown’s Battlegrounds(PubG) ଏକ ଲୋକପ୍ରିୟ ଆକ୍ସନ ଗେମ। ଏହା ଦକ୍ଷିଣ କୋରିଆର ଭିଡିଓ ଗେମ କମ୍ପାନୀ ବ୍ଲୁହୋଲର ସହାୟକ କମ୍ପାନୀ ଦ୍ୱାରା ପ୍ରସ୍ତୁତ କରାଯାଇଛି। ୨୦୦୦ରେ ରିଲିଜ୍ ହୋଇଥିବା ଜାପାନୀ ଚଳଚ୍ଚିତ୍ର ବ୍ୟାଟଲ୍ ରୋୟେଲ ଦ୍ୱାରା ଅନୁପ୍ରାଣିତ ହୋଇ ଏହାକୁ ପ୍ରସ୍ତୁତ କରାଯାଇଥିଲା। ଦୁନିଆର ସବୁଠୁ ବଡ ଗେମ୍ କମ୍ପାନୀ ମଧ୍ୟରୁ ଅନ୍ୟତମ ଟେନସେଣ୍ଟ ଗେମ୍ସ ଏକ ଚାଇନା କମ୍ପାନୀ। ଟେନସେଣ୍ଟ ଗେମ୍ସ ଚାଇନାରେ ପବଜୀ ଲଞ୍ଚ୍ କରିବାକୁ ପ୍ରସ୍ତାବ ଦେଇଥିଲା ଏବଂ କିଛି ଅଂଶ ମଧ୍ୟ କିଣିଥିଲା। ଯଦିଓ ଚାଇନାରେ ପବଜୀ ଉପରେ ପ୍ରତିବନ୍ଧକ ଲଗାଯାଇଥିଲା। ପରେ ଏହାକୁ ଏକ ନୂଆ ନାମରେ ଚାଇନାକୁ ଅଣାଯାଇଥିଲା। ଏବେ ମଧ୍ୟ ପ୍ଲେ ଷ୍ଟୋରରେ ଏହାର ପ୍ରକାଶକ ଟେନସେଣ୍ଟ ଗେମ୍ସ ଅଛି। ଏହିପରି, ପବଜୀର ମାଲିକାନା ମିକ୍ସ ଅଛି। ସେହିପରି ଜୁମ କମୁନିକେଶନ ହେଉଛି ଏକ ଆମେରିକୀୟ କମ୍ପାନୀ। ଏହାର ପ୍ରତିଷ୍ଠାତା ହେଉଛନ୍ତି ଏରିକ ୟୁଆନ। ଯିଏ କି ଚାଇନାରେ ଜନ୍ମ ହୋଇଥିଲେ, କିନ୍ତୁ ଜଣେ ଆମେରିକୀୟ ନାଗରିକ।