ମୁମ୍ବାଇ,୧୩।୬: ପରଟା ରୁଟି ନୁହେଁ। ଏଥିରେ ୧୮% ସାମଗ୍ରୀ ଓ ସେବା ଟିକସ(ଜିଏସ୍ଟି) ଲାଗୁ ହେବ। ଜିଏସ୍ଟି ବ୍ୟବସ୍ଥାରେ ଥିବା ଅଥରିଟି ଅଫ୍ ଆଡଭାନ୍ସ ରୁଲିଂସ(ଏଏଆର୍)ର କର୍ନାଟକ ବେଞ୍ଚ ରୁଟି ଏବଂ ପରଟା ମଧ୍ୟରେ ପାର୍ଥକ୍ୟ ଦର୍ଶାଇବା ସହ ସର୍ବୋଚ୍ଚ ଟିକସ ହାର ୧୮% ଲାଗୁ ହେବା ନେଇ ନିର୍ଦ୍ଦେଶରେ କହିଛନ୍ତି। ବର୍ତ୍ତମାନ ରୁଟି ଉପରେ ୫% ଜିଏସ୍ଟି ଲାଗୁ ହେଉଛି। ପରଟାକୁ ଖାକରା, ପ୍ଲେନ୍ ଚପାତି ବା ରୁଟି ବର୍ଗରେ ସାମିଲ କରିବା ଲାଗି ହ୍ବାଇଟଫିଲ୍ଡଠାରେ ଅବସ୍ଥିତ ଏକ ଘରୋଇ ଖାଦ୍ୟ ପ୍ରସ୍ତୁତ କରୁଥିବା ଆବେଦନ କରିଥିଲା। ଆବେଦନକାରୀଙ୍କ ମତ ଉପରେ ଏଏଆର୍ ନିଜର ପକ୍ଷ ରଖି ଏଭଳି ନିର୍ଦ୍ଦେଶ ଦେଇଛନ୍ତି।
ରେଡି ଟୁ ଇଟ୍ ଫୁଡ୍ ପ୍ରସ୍ତୁତ କରୁଥିବା କମ୍ପାନୀ ଆଇଡି ଫ୍ରେସ୍ ଫୁଡ୍ ଏଏଆର୍ଙ୍କ ନିକଟରେ ଏକ ଆବେଦନ କରାଯାଇଥିଲା। ଏଥିରେ କୁହାଯାଇଥିଲା ଯେ, ସମ୍ପୂର୍ଣ୍ଣ ଅଟାରୁ ତିଆରି ପରଟା ଏବଂ ମାଲାବାର ପରଟା ଉପର କେଉଁଭଳି ଜିଏସ୍ଟି ଲାଗୁ କରାଯିବା ଆବଶ୍ୟକ ସେ ଉପରେ ସ୍ପଷ୍ଟତା ଆସୁ। ଏହି ପରିପ୍ରେକ୍ଷୀରେ ପିଡବ୍ଲ୍ୟୁସି ଇଣ୍ଡିଆର ପାର୍ଟନର ପ୍ରତୀକ ଜୈନ କହିଛନ୍ତି, ରୁଟିକୁ ଏକ ଜେନେରିକ ଟର୍ମ ଭାବେ ଏଏଆର୍ ନେଇନାହାନ୍ତି। ଏହାକୁ ବିଭିନ୍ନ ବର୍ଗର ଭାରତୀୟ ବ୍ରେଡ୍ ଭାବେ ମଧ୍ୟ ବିବେଚନା କରାଯାଇପାରିବ। କେବଳ କିଛି ବର୍ଗ ପାଇଁ ଏହା ଉଦ୍ଦିଷ୍ଟ ନ ହୋଇପାରେ ବୋଲି ଏଏଆର୍ ବିବେଚନା କରିଛନ୍ତି।
ଏଏଆର୍ ତାଙ୍କ ନିର୍ଦ୍ଦେଶରେ କହିଛନ୍ତି ଯେ, ୧୯୦୫ ହେଡିଂରେ ଆସୁଥିବା ପ୍ରଡକ୍ଟ(ରୁଟି) ରେଡି ଟୁ ୟୁଜ ଖାଦ୍ୟ ପ୍ରସ୍ତୁତି ବର୍ଗରେ ଆସୁଛି। ଅନ୍ୟ ପକ୍ଷରେ ପରଟାକୁ ଖାଇବା ଆଗରୁ ଗରମ କରିବାକୁ ପଡିଥାଏ। ଏଭଳି ଅନ୍ୟ କିଛି ପ୍ରସଙ୍ଗକୁ ଆଧାରକରି ପରଟାକୁ ୧୯୦୫ ହେଡିଂ ମଧ୍ୟ ସାମିଲ କରାଯାଇ ନାହିଁ। ସେହିଭଳି ଏଣ୍ଟ୍ରି ୯୯ ନିୟମ ପରିସରରେ ପରଟା ଆସୁନାହିଁ। ଏଭଳି ସ୍ଥିତିରେ ଏଏଆରଙ୍କ ନିର୍ଦ୍ଦେଶ ଗୁରୁତ୍ୱ ବହନ କରେ। ଅନ୍ତତଃ ପକ୍ଷେ କର୍ନାଟକରେ ପରଟା ପ୍ରେମୀଙ୍କୁ ଅଧିକ ଜିଏସ୍ଟି ଟିକସ ପ୍ରଦାନ କରିବାକୁ ପଡିବ।