ଭୁବନେଶ୍ୱର,୧୮ା୧୦(ବ୍ୟୁରୋ): ସୁପରିଚିତ ଓଡ଼ିଆ କଥାକାର, ପ୍ରାକ୍ତନ ବରିଷ୍ଠ ଇତିହାସ ପ୍ରାଧ୍ୟାପକ ଡକ୍ଟର ହେମନ୍ତ କୁମାର ମହାପାତ୍ରଙ୍କର ଗୁରୁବାର ଅପରାହ୍ଣରେ ପରଲୋକ ହୋଇଯାଇଛି। ୧୯୫୫ରେ ତିର୍ତ୍ତୋଲର ରାମଦାସପୁର ଗ୍ରାମରେ ତାଙ୍କର ଜନ୍ମ। ତାଙ୍କୁ ୬୪ ବର୍ଷ ବୟସ ହୋଇଥିଲା। ସେ ଗତ କିଛିଦିନ ହେବ ଗୁରୁତର ଅସୁସ୍ଥ ଥାଇ ଚିକିତ୍ସାଧୀନ ଥିଲେ। ଓଡ଼ିଶା ଇତିହାସ କଂଗ୍ରେସର ସଭାପତି ଭାବେ ସେ ଦାୟିତ୍ୱ ନିର୍ବାହ କରିଥିଲେ। ‘ଭଙ୍ଗାଦେଉଳ ଓ କଳାସାପ’, ‘ନରଭୋଜୀମାନଙ୍କ ସାମ୍ରାଜ୍ୟ’, ‘ଅଗ୍ନିବଳୟ’, ‘ଦିଗ୍ବଳୟ ଏ ପାଖର ଗଳ୍ପ’, ‘ମର୍ତ୍ତ୍ୟେ ମନୁଷ୍ୟ ଦେହବହି’ ପ୍ରଭୃତି ଗଳ୍ପ ସଂକଳନ ଏବଂ ‘ସୂର୍ଯ୍ୟବଂଶୀ’, ‘ରାଜନନ୍ଦିନୀ’, ‘ଦୁର୍ଗ ବାରବାଟୀ’, ‘ଯଶୋଧାରା’, ‘ଜୟୀ ରାଜଗୁରୁ’, ‘ନାହିଁ ଆଦି, ନାହିଁ ଅନ୍ତ’ ଆଦି ଉପନ୍ୟାସର ସେ ସ୍ବନାମଧନ୍ୟ ସ୍ରଷ୍ଟା।
