ବାରିପଦା ଅଫିସ, ୧୬ା୩- ଓଡ଼ିଆ ସିନେଜଗତର ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ବାଚୁ ମୁଖାର୍ଜୀ(୬୪)ଙ୍କ ରବିବାର ହୃଦ୍ଘାତରେ ପରଲୋକ ଘଟିଛି। ସନ୍ଧ୍ୟାରେ ବାରିପଦା ଲାଲବଜାରସ୍ଥିତ ନିଜ ବାସଭବନରେ ଥିବା ବେଳେ ହଠାତ୍ ତାଙ୍କ ଛାତିରେ ଯନ୍ତ୍ରଣା ହୋଇଥିଲା। ପରିବାର ଲୋକେ ଚିକିତ୍ସା ପାଇଁ ବାରିପଦା ପିଆରଏମ୍ ମେଡ଼ିକାଲ୍କୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଓଡ଼ିଆ ସିନେ ସଙ୍ଗୀତ ଜଗତର ମହାରଥୀ ନିମାଇଁ ମହାନ୍ତି ଓ ସରୋଜ ପଟ୍ଟନାୟକଙ୍କ ସହିତ ବହୁ ସିନେମାରେ ସେ ସଙ୍ଗୀତ ନିର୍ଦ୍ଦେଶନା ଦେଇ ଲୋକପ୍ରିୟ ହୋଇ ପାରିଥିଲେ। ‘ଗୋପରେ ବଢ଼ୁଛି ମୋ କଳା କହ୍ନେଇ’ ଓଡ଼ିଆ ଫିଲ୍ମରେ ସେ ପ୍ରଥମେ ସଙ୍ଗୀତ ନିର୍ଦ୍ଦେଶନା ଦେଇଥିଲେ। ଏହା ପରେ ‘କଥା ରହିଥିବ କାଳ କାଳକୁ’ , ‘ମତେ ତ ଲଭ୍ ହେଲାରେ’ ଭଳିି ଅନେକ ଫିଲ୍ମ ଓ ଆଲବମ୍ରେ ସଙ୍ଗୀତ ନିର୍ଦ୍ଦେଶନା ଦେଇ ଥିଲେ। ତାଙ୍କ ମୃତ୍ୟୁରେ ବାରିପଦା ସହର ସମେତ ମୟୂରଭଞ୍ଜ ଜିଲାରେ ଶୋକର ଛାୟା ଖେଳିଯାଇଛି। ବାଚୁ ଦା ଭାବେ ପରିଚିତ ବାଚୁ ମୁଖାର୍ଜୀଙ୍କ ମୃତ୍ୟୁରେ ନାଟ୍ୟ ନିର୍ଦ୍ଦେଶକ ତଥା ଅଭିନେତା ଅନଦା ଶଙ୍କର ଦାଶ, ସଂଳାପକାର ଚିନ୍ମୟ ଦାସ ପଟ୍ଟନାୟକ, ସଙ୍ଗୀତଜ୍ଞ ଶାନ୍ତନୁ ଶତପଥୀ, ଆମେ ମୟୂରଭଞ୍ଜିଆର ଆବାହକ ସଞ୍ଜୟ କୁମାର ଚୌଧୁରୀ, ସମାଜସେବୀ ଚନ୍ଦନ ଶେଜପଡ଼ା ପ୍ରମୁଖ ଶୋକବ୍ୟକ୍ତ କରିଛନ୍ତି।
