ଭଞ୍ଜନଗର,୨୬।୫(ଡି.ଏନ.ଏ.)-ଭଞ୍ଜନଗର ନିର୍ବାଚନମଣ୍ଡଳୀରେ ଭାଜପା ଜିତିବ ବୋଲି ଦଳର ଅଧିକାଂଶ ନେତା ଓ କର୍ମୀ ନିଶ୍ଚିତ ଥିଲେ। ଏନେଇ ଦଳୀୟ ନେତା ଓ କର୍ମୀମାନେ ମତଦାନ ପରଠୁ ଦମ୍ଭୋକ୍ତି ପ୍ରକାଶ କରିଆସୁଥିଲେ। ନିର୍ବାଚନରେ ଦଳର ପରାଜୟ ନେଇ କର୍ମୀମାନେ ବହୁତ ହତୋତ୍ସାହିତ ହେବାସହ ପରାଜୟକୁ ସହଜରେ ଗ୍ରହଣ କରି ପାରୁନାହାନ୍ତି। ଗ୍ରାମାଞ୍ଚଳରେ ବର୍ତ୍ତମାନ ଭାଜପା କର୍ମୀମାନେ ଗଁା ଦାଣ୍ଡରେ ବସି ପରାଜୟ କାହିଁକି ହେଲେ, କେଉଁଠି କେତେ ଭୋଟ ମିଳିଛି ସେନେଇ ତର୍ଜମା ଚଳାଇଛନ୍ତି। ଆଉ କେତେଜଣ ଆରଥରକୁ ଦେଖିବା ବୋଲି କହୁଛନ୍ତି। ଭାଜପା ନେତାମାନେ ଏହି ନିର୍ବାଚନରେ ବିଜୟ ପାଇଁ ପ୍ରାଣପଣେ ଚେଷ୍ଠା କରିଥିଲେ। କିନ୍ତୁ ପୁରୁଖା ନେତା ତଥା ବିଜେଡି ପ୍ରାର୍ଥୀ ବିକ୍ରମ କେଶରୀ ଆରୁଖଙ୍କ ଗୋଟି ଚାଳନା ଭାଜପାର ସ୍ବପ୍ନକୁ ଧୂଳିସାତ୍ କରିଦେଇଛି।
କିନ୍ତୁ ଏହି ନିର୍ବାଚନରେ ବିଜେଡିର ଭୋଟ ବିଜୟ ବ୍ୟବଧାନ ଗତ ନିର୍ବାଚନ ତୁଳନାରେ କମିବାକୁ ନେଇ ଦଳକୁ ମଧ୍ୟ ଧକ୍କା ଲାଗିଛି। ଦଳର ନେତାମାନେ ଆତ୍ମସମୀକ୍ଷା କରୁଛନ୍ତି କେଉଁ କାରଣରୁ ଭୋଟ କମିଲା। ଏଥିସହ ତ୍ରୁଟିକୁ ସୁଧାରି ଆଗାମୀ ଦିନରେ ହେବାକୁ ଥିବା ବିଭିନ୍ନ ନିର୍ବାଚନକୁ କିଭଳି ମୁକାବିଲା କରାଯିବ ସେନେଇ ଯୋଜନା ପ୍ରସ୍ତୁତ ଲକ୍ଷ୍ୟରେ ଅଛନ୍ତି। କଂଗ୍ରେସ ନେତା ପ୍ରାର୍ଥୀପତ୍ର ଦାଖଲ ଆରମ୍ଭରୁ ହିଁ ଦୁର୍ବଳ ସ୍ଥିତିରେ ଥିଲେ। ଦଳୀୟ ଗୋଷ୍ଠୀ କନ୍ଦଳ ଓ ଦଳଛାଡି ଅନେକ ନେତା ଭାଜପାକୁ ଚାଲିଯିବା ଯୋଗୁ ଦଳର ବିପର୍ଯ୍ୟୟ ହୋଇଛି। ଆଉ କେତେଜଣ ନେତା ଦଳର ବିଭିନ୍ନ ପଦ ପଦବୀରେ ଥାଇ ମଧ୍ୟ ଖୋଲାଖୋଲି ଭାବେ ଅନ୍ୟ ଦଳର ନେତାଙ୍କୁ ସମର୍ଥନ କରିଥିଲେ। ଏହିଭଳି ନେତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦଳ ହାଇକମାଣ୍ଡଙ୍କ ନିକଟରେ ଦାବୀ କରିଥିବା ଜଣାପଡିଛି। ସେହିଭଳି ପ୍ରାର୍ଥୀ ନରସିଂହ ଗୌଡ, ପୁର୍ଣ୍ଣଚନ୍ଦ୍ର ପ୍ରଧାନ, ବିରେନ୍ଦ୍ର ଗୌଡ ମଧ୍ୟ କାହିଁକି ବହୁତ କମ୍ ଭୋଟ ପାଇଲେ ସେନେଇ ସମୀକ୍ଷା କରୁଛନ୍ତି। ଚଳିତ ନିର୍ବାଚନରେ ନୋଟାରେ ୧୪୪୧ ଜଣ ଭୋଟ ଦେଇଛନ୍ତି।