ଆଠଗଡ଼ ,୨୧।୬(ସ୍ବ.ପ୍ର.): କଟକ ଜିଲା ଆଠଗଡ଼ ଥାନା ଅନ୍ତର୍ଗତ ସମସରପୁର ପଞ୍ଚାୟତ ଅଧୀନସ୍ଥ ଆଙ୍କୁଲା ଗ୍ରାମର ଏକ ପରିତ୍ୟକ୍ତ କୂଅ ମଧ୍ୟରୁ ରବିବାର ଏକ ବଜ୍ରକାପ୍ତା ଉଦ୍ଧାର କରାଯାଇଛି । ଗ୍ରାମର ଜନୈକ ବ୍ୟକ୍ତିଙ୍କ ବିଲରେ ଥିବା ଏକ କୂଅ ମଧ୍ୟରେ ପ୍ରାୟ ୮ କେଜି ଓଜନର ଏକ ବଜ୍ରକାପ୍ତା ଭୋର ସମୟରେ ଖସିପଡ଼ିଥିଲା। ଭୋର ପ୍ରାୟ ୫ଟା ସମୟରେ ସଂପୃକ୍ତ ଜମି ମାଲିକ କାମ କରୁଥିବା ବେଳେ କୂଅ ମଧ୍ୟରୁ ଶବ୍ଦ ଶୁଣି କୂଅ ମଧ୍ୟରେ ବଜ୍ରକାପ୍ତା ପଡିଥିବା ଦେଖି ଗ୍ରାମରେ ଖବର ଦେଇଥିଲେ। ପୂର୍ବତନ ସରପଞ୍ଚ ଅଜୟସାଇଁ ବନ ବିଭାଗକୁ ଖବର ଦେଇଥିଲେ। ଖବର ପାଇ ସଦର ବନାଞ୍ଚଳ ଅଧିକାରୀ ଆୟସା ଅଖତାର ନିଶା ଅନ୍ୟ ବନ କର୍ମଚାରୀଙ୍କ ସହ ଘଟଣାସ୍ଥଳରେ ପହଞ୍ଚି କୂଅ ମଧ୍ୟରୁ ବଜ୍ରକାପ୍ତାଟିକୁ ଉଦ୍ଧାର କରି ବନାଞ୍ଚଳ କାର୍ଯ୍ୟାଳୟକୁ ନେଇ ଆସିଛନ୍ତି । ଉଦ୍ଧାର ହୋଇଥିବା ବଜ୍ର କାପ୍ତାଟିର ସ୍ବାସ୍ଥ୍ୟ ପରୀକ୍ଷା କରାଯିବା ପରେ ଜଙ୍ଗଲ ମଧ୍ୟରେ ଛାଡି ଦିଆଯିବ ବୋଲି ବନ ବିଭାଗ ସୂତ୍ରରୁ ଜଣାପଡ଼ିଛି।