ପାରଳାଖେମୁଣ୍ଡି,୨୨।୪ (ସ୍ବ.ପ୍ର.)- ଗଜପତି ଜିଲା ସଦର ମହକୁମା ପାରଳାଖେମୁଣ୍ଡିସ୍ଥିତ ଐତିହାସିକ ସୀତାସାଗର ପୋଖରୀ ଏବେ ପରିତ୍ୟକ୍ତ ଅବସ୍ଥାରେ ପଡିଛି। ଏହାର କୂଳ ଏବେ ଅସାମାଜିକ ଲୋକଙ୍କ ଆଡ୍ଡାସ୍ଥଳୀ ପାଲଟିଛି, ଯେଉଁ ସୀତାସାଗର ପୋଖରୀ ଦିନେ ପାରଳାଖେମୁଣ୍ଡି ସହରର ଐତିହ୍ୟ ଥିଲା। ସହର ଉପକଣ୍ଠସ୍ଥ ଜମିଗୁଡିକ ଜଳସେଚନ ପାଇଁ ଥିଲା ଏକ ବୃହତ୍ ମାଧ୍ୟମ, ତାହା ଏବେ ପରିତ୍ୟକ୍ତ ହୋଇପଡିଛି। ଏହା ସହରର ନିଚ୍ଛାଟିଆ ଅଞ୍ଚଳ ହୋଇଥିବାରୁ ସନ୍ଧ୍ୟାରେ ଲୋକଙ୍କ ଯାତାୟାତ କମିଯାଏ। ଏହାର ସୁଯୋଗ ଅସାମାଜିକ ଲୋକମାନେ ନେଇଥାନ୍ତି। ସେମାନେ ସାଗର ପୋଖରୀ ପାହାଚରେ ବସି ମଦ୍ୟପାନ କରନ୍ତି। ଏହାର ପୁନରୁଦ୍ଧାର ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ପ୍ରଶାସନ କୌଣସି ପଦକ୍ଷେପ ନେଉ ନ ଥିବା ଅଭିଯୋଗ ହେଉଛି। ସୀତାସାଗରର ପୁନରୁଦ୍ଧାର ନ ହେବାରୁ ଏହା ଅଳିଆ,ଆବର୍ଜନା ଏବଂ ମାଟିରେ ଚାରିକଡରୁ ପୋତି ହୋଇ ଧୀରେ ଧୀରେ ସଙ୍କୁଚିତ ହେବାରେ ଲାଗିଛି। ମହାରାଜାଙ୍କ ଅମଳର ଏହି ପୁରାତନ ପୋଖରୀ ପାରଳାଖେମୁଣ୍ଡି ସହରର ବହୁ ଐତିହ୍ୟ ବହନ କରୁଛି। ଗତ ୨୦୦୭ରେ ସାଗରର ସଫେଇ କାର୍ଯ୍ୟ ହେବା ପରେ ୨୦୧୨ ପର୍ଯ୍ୟନ୍ତ ଏହା କିଛିଟା କାର୍ଯ୍ୟକ୍ଷମ ହେଉଥିଲା। ପାରଳାଖେମୁଣ୍ଡିସ୍ଥିତ ମତ୍ସଜୀବୀ ସମବାୟ ସମିତି ପ୍ରତି ବର୍ଷ ନିୟମ ଅନୁଯାୟୀ ଏହାକୁ ଲିଜ୍ ନେଉଛି। ମାତ୍ର ଏହି ପୋଖରୀରୁ କୌଣସି ମାଛ ଉପତ୍ାଦନ ହୋଇପାରୁ ନାହିଁ କି ପୋଖରୀ ସ୍ଥାନୀୟ ଅଞ୍ଚଳରେ କୌଣସି କାର୍ଯ୍ୟରେ ଆସିପାରୁନାହିଁ । ମତ୍ସଜୀବୀମାନେ ଏ ସମ୍ପର୍କରେ ସ୍ଥାନୀୟ ପ୍ରଶାସନ ଓ ରାଜ୍ୟ ସ୍ତରରେ ଅଭିଯୋାଗ କରିଥିଲେ ମଧ୍ୟ କିଛି ସୁଫଳ ମିଳିନାହିଁ। ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।