ମୋଗା,୩।୮: ପଞ୍ଜାବର ମୋଗାରେ ଗୋଟିଏ ପରିବାରର ୫ ଜଣ ସଦସ୍ୟଙ୍କୁ ହତ୍ୟା କରିବା ପରେ ଜଣେ ଯୁବକ ଆତ୍ମହତ୍ୟା କରିଥିବା ଜଣାପଡିଛି। ଘଟଣା ସମ୍ପର୍କରେ ସୂଚନା ପାଇ ପୋଲିସ ସମସ୍ତ ମୃତଦେହକୁ ଜବତ କରିବା ସହ ଉକ୍ତ ଘରୁ ୧୯ ପୃଷ୍ଠାର ଏକ ସୁଇସାଇଟ୍ ନୋଟ୍ ଜବତ କରିଥିବା କହିଛି। ତେବେ ପଡୋଶୀଙ୍କ ସୂଚନା ମୁତାବକ ସନ୍ଦିପ ସିଂଙ୍କ ଘର ଭିତରୁ ହଠାତ୍ ପାଟି ଶୁଭିଥିଲା। ଏହାପରେ ଉକ୍ତ ପରିବାରର ୫ ସଦସ୍ୟ ରକ୍ତଜୁଡୁବୁଡୁ ଭାବେ ପଡିଥିବା ଦେଖି ପଡୋଶୀ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚିବା ବେଳକୁ ସନ୍ଦିପ, ତାଙ୍କ ମାତାପିତା, ଭାଣିଜି, ଭଉଣୀ ଓ ଜେଜେମାଙ୍କ ମୃତ୍ୟୁ ହୋଇ ସାରିଥିଲା। ଗୁରୁତର ଥିବା ତାଙ୍କ ଜେଜେମା’ଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ସନ୍ଦିପ ପରିବାରର ସମସ୍ତ ସଦସ୍ୟଙ୍କୁ ଗୁଳିକରି ହତ୍ୟା କରିବା ପରେ ନିଜେ ଆତ୍ମହତ୍ୟା କରିଥିବା ଅନୁମାନ କରାଯାଉଛି। ତେବେ ଯାହା ଆଲୋଚନା ହେଉଛି କି ସନ୍ଦିପଙ୍କର ବିବାହ ସ୍ଥିର ହୋଇଥିଲା। ହେଲେ ସେ ଯୌନ ରୋଗରେ ପୀଡିତ ଥିବାରୁ ଏଥିରେ ସେ ରାଜି ହୋଇ ନ ଥିଲେ ଓ ବହୁ ପରିମାଣରେ ମଦ୍ୟପାନ କରିବା ଆରମ୍ଭ କରିଦେଇଥିଲେ। ତେବେ ସେ ହୁଏତ ନିଶାରେ ଥାଇ ଏମିତି କରିଥିବା ଅନୁମାନ କରାଯାଉଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।