ସିମୁଳିଆ, ୧ା୫(ଡି.ଏନ.ଏ.)-ଆମ ଚାରିପାଖରେ ନିୟମିତ ଅନେକ ଘଟଣା, ଦୁର୍ଘଟଣା ଘଟୁଛି। ଯାହା ଜୀବନ ଯେତେ ଘଟଣାବହୁଳ ତାହା ଲେଖାଲେଖି କରିବାକୁ ଖୋରାକ ଯୋଗାଇଥାଏ ବୋଲି ସାରସ୍ବତ ସାଧନାରେ ବ୍ରତୀ ରହୁଥିବା ଶିକ୍ଷୟିତ୍ରୀ କାଞ୍ଚନବାଳା ମଲିକ(୪୪) କହିଛନ୍ତି। ସାହିତ୍ୟ ପଠନ ଲାଗି ଆଦର କମୁଥିବାରୁ ଅଭିଭାବକ ଓ ମା’ ବାପାମାନେ ପିଲାଙ୍କ ମଧ୍ୟରେ ପ୍ରାଥମିକ ସ୍ତରରୁ ଲେଖିବା ଓ ପଢ଼ିବା ଅଭ୍ୟାସ ବଢ଼ାଇବାକୁ ଉଦ୍ୟମ କରିବା ଦରକାର। ଏହା ପିିଲାଙ୍କ ନୈତିକ ଜ୍ଞାନ ବଢ଼ାଇବାରେ ସହାୟକ ହୋଇଥାଏ। ମା’ବାପାମାନେ ପିଲାଙ୍କୁ ସବୁବେଳେ ବହି ଉପହାର ଦେଲେ ଏହା ସେମାନଙ୍କ ଉପରେ ସକାରାମତ୍କ ପ୍ରଭାବ ପକାଇପାରିବ ବୋଲି କାଞ୍ଚନବାଳା କହିଛନ୍ତି।
ପରିବେଶ, ପ୍ରକୃତି ଓ ସମୟର ସ୍ପନ୍ଦନକୁ ଲେଖନୀରେ ରୂପାୟିତ କରି କାଞ୍ଚନବାଳା ଗଳ୍ପ କବିତା ଲେଖିଥାନ୍ତି। ଶିକ୍ଷକତା ବୃତ୍ତିରେ ସମୟ ଅତିବାହିତ କରି ଅବସର ପାଇଲେ ଲେଖନୀ ଧରି ବସିପଡ଼ନ୍ତି। ସାମ୍ପ୍ରତିକ ପରିସ୍ଥିତି ଓ ପରିବେଶକୁ ନେଇ ଲେଖୁଥିବା ଗଳ୍ପ ଓ କବିତାକୁ ପାଠିକାପାଠକମାନେ ପସନ୍ଦ କରିଥାନ୍ତି। ବିଭିନ୍ନ ପତ୍ରପତ୍ରିକାରେ ଅଧିକ ଲେଖାଲେଖି କରିବା ସକାଶେ ଏହା ତାଙ୍କୁ ପ୍ରେରଣା ଯୋଗାଇ ଆସୁଛି ବୋଲି ସେ କହିଛନ୍ତି।
କାଞ୍ଚନବାଳା ବାଲେଶ୍ୱର ଜିଲା ସିମୁଳିଆ ବ୍ଲକ ଅଧୀନ ଲକ୍ଷ୍ମୀ ନାରାୟଣ ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଛନ୍ତି। ଗାଁ ସ୍କୁଲରେ ଚତୁର୍ଥ ଶ୍ରେଣୀରେ ପଢୁଥିବା ସମୟରୁ ସେ ନିଜ ବାପା ଶ୍ରୀଧରଙ୍କଠାରୁ ଲେଖାଲେଖି କରିବାକୁ ପ୍ରେରଣା ପାଇଥିଲେ ା ପାଳିଆବିନ୍ଧା ମାଧବାର୍ଜୁନ କଲେଜରେ ପଢୁଥିବା ସମୟରେ ସେ ଲେଖିଥିବା ନାରୀ କବିତା ପ୍ରକାଶ ପାଇଥିଲା। ସେବେଠାରୁ ସେ ଆଉ ପଛକୁ ଫେରି ଚାହିଁ ନାହାନ୍ତି। ବିବାହ ପରେ ଶିକ୍ଷକତା କରୁଥିବା ତାଙ୍କ ସ୍ବାମୀ ପ୍ରସନ୍ନ ଧଳ ତାଙ୍କୁ ଏଥିଲାଗି ପ୍ରେରଣା ଯୋଗାଇ ଆସୁଛନ୍ତି ା ଅନୁରୂପ ପ୍ରେରଣା ପାଇ ତାଙ୍କ ଝିଅ ପ୍ରସନ୍ନିକା ଓ ପୁଅ ଆଶିଷ ସାହିତ୍ୟ ପଠନ ପ୍ରତି ରୁଚି ରଖୁଛନ୍ତି। ପିଲାଙ୍କ ମଧ୍ୟରେ ପ୍ରତିଭା ଅନ୍ବେଷଣ ଲାଗି ଶିକ୍ଷାନୁଷ୍ଠାନରେ ସେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରିବା ସହ ପ୍ରବନ୍ଧ, ଗଳ୍ପ ଓ କବିତା ଉପରେ ଆୟୋଜିତ ଉତ୍ସବରେ ବିଚାରପତି ରୂପେ ଯୋଗ ଦେଇ ଶିଶୁମାନଙ୍କ ଲେଖାର ମୂଲ୍ୟାୟନ କରିଥାନ୍ତି ବୋଲି କାଞ୍ଚନବାଳା କହିଛନ୍ତି।