ଆନନ୍ଦପୁର,୧୭।୨(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ବୈତରଣୀ ନଦୀ ବ୍ୟାରେଜର ଦୁଇଟି ଗେଟ୍ ସୋମବାର ମଧ୍ୟାହ୍ନରେ ଖୋଲାଯାଇ ଜଳ ନିଷ୍କାସନ ପ୍ରକ୍ରିୟା ଆରମ୍ଭ ହୋଇଛି। ମାତ୍ର ୪ ଇଞ୍ଚ ଏହି ଦୁଇଟି ଗେଟ୍ ଖୋଲାଯାଇଥିବା ଯୋଗୁ ତଳିଆ ଅଞ୍ଚଳ ଲୋକଙ୍କ ପାଇଁ କୌଣସି ବିପଦ ସମ୍ଭାବନା ନ ଥିବା ଜଳ ସମ୍ପଦ ବିଭାଗ ତରଫରୁ ସୂଚନା ମିଳିଛି। ଏହା ସତ୍ତ୍ୱେ ପୂର୍ବ ଦିନ ଡାକବାଜି ଯନ୍ତ୍ର ଯୋଗେ ଦିନ ୧୦ରୁ ନଦୀକୁ ପ୍ରବେଶ କରିବା ପାଇଁ କୁହାଯାଇଥିଲା। ନବନିର୍ମିତ ଏହି ବ୍ୟାରେଜ ପ୍ରକଳ୍ପର ଜଳଧାରଣ କ୍ଷମତା ଓ କେନାଲ ଦେଇ ଜଳସେଚନ ପ୍ରକ୍ରିୟାର ପରୀକ୍ଷଣ ପାଇଁ ଗତ ଏକ ମାସ ହେବ ସମସ୍ତ ଗେଟ୍ ବନ୍ଦ କରାଯାଇ ଏହି ପରୀକ୍ଷା କରାଯାଇଥିଲା। ବ୍ୟାରେଜର ରିଜର୍ଭ ଲେଭଲ୍ ୪୪ ମି. ରହିଥିବାବେଳେ ଆଜି ୪୨.୭ମି. ଜଳ ପତ୍ତନ ରହିଥିଲା। କେନାଲ କାମ ଓ ଆଡିବନ୍ଧ କାମ ବାକି ରହିଯାଇଥିବାରୁ ସଂରକ୍ଷିତ ସମସ୍ତ ଜଳକୁ ଧୀରେ ଧୀରେ ନିଷ୍କାସନ କରିବାକୁ ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଥିବା ଆନନ୍ଦପୁର ଜଳସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ବିକ୍ରମ ମଲ୍ଲିକ ସୂଚନା ଦେଇଛନ୍ତି।