ବାରିପଦା ଅଫିସ/ ଚିତ୍ରଡ଼ା,୨୦ା୨(ଡି.ଏନ୍.ଏ.)- ଚଳିତ ବର୍ଷର ମାଟ୍ରିକ୍ ପରୀକ୍ଷା ବୁଧବାରଠାରୁ ଆରମ୍ଭ ହୋଇଛି। ମୟୂରଭଞ୍ଜ ଜିଲାର ୧୮୦ଟି କେନ୍ଦ୍ରରେ ୩୭୧୩୬ ପରୀକ୍ଷାର୍ଥୀ ପରୀକ୍ଷା ଦେବାକୁ ଥିବା ବେଳେ ସେମାନଙ୍କ ମଧ୍ୟରୁ ୩୫୪୩୫ ଜଣ ପ୍ରଥମ ଭାଷା ପରୀକ୍ଷା ଦେଇଥିଲେ। ୧୭୦୧ ପରୀକ୍ଷାର୍ଥୀ ଅନୁପସ୍ଥିତ ଥିଲେ। କିଛି ଛାତ୍ରୀଛାତ୍ରଙ୍କୁ ଛାଡ଼ି ଦେଲେ ସବୁଠି ଉପସ୍ଥାନ ଶତପ୍ରତିଶତ ରହିଥିବା ଜଣାପଡ଼ିଛି। ଅଧିକାଂଶ କେନ୍ଦ୍ରରେ ଶାନ୍ତିଶୃଙ୍ଖଳାର ସହିତ ପରୀକ୍ଷା ହୋଇଥିବା ବେଳେ ଜିଲାର ମୋରଡ଼ା ବ୍ଳକ ଅଧୀନ ଦ୍ୱାରିକାନାଥ ନୂତନ ସରକାରୀ ଉଚ୍ଚ ବିଦ୍ୟାଳୟରେ ଅବ୍ୟବସ୍ଥା ଦେଖିବାକୁ ମିଳିଥିଲା। ରାଜ୍ୟ ମୁକ୍ତ ବିଦ୍ୟାଳୟ ସାର୍ଟିଫିକେଟ ପରୀକ୍ଷା ପାଇଁ ଉକ୍ତ କେନ୍ଦ୍ରରେ ୨୩୮ ପରୀକ୍ଷାର୍ଥୀ ପରୀକ୍ଷା ଦେବାକୁ ଥିବା ବେଳେ ୨୫ ଜଣ ପରୀକ୍ଷା ଦେଇ ପାରି ନ ଥିଲେ। ଇଂରାଜୀ ବଦଳରେ ପ୍ୟାକେଟରୁ ଓଡ଼ିଆ ପ୍ରଶ୍ନପତ୍ର ବାହାରିବାରୁ ସେମାନେ ପରୀକ୍ଷା ଦେବାରୁ ବଞ୍ଚିତ ହୋଇଥିଲେ। ଉଲ୍ଲେଖଯୋଗ୍ୟ ଯେ, ରେଗୁଲାର ଓ ଏକ୍ସରେଗୁଲାର ପିଲାମାନଙ୍କ ବୁଧବାର ଓଡ଼ିଆ ପରୀକ୍ଷା ଥିବା ବେଳେ ରାଜ୍ୟ ମୁକ୍ତ ବିଦ୍ୟାଳୟ ସାର୍ଟିଫିକେଟ ପିଲାମାନଙ୍କର ଇଂରାଜୀ ବିଷୟ ପରୀକ୍ଷା ଥିଲା। ଅପରାହ୍ନ ୧ଟା ୩୦ରେ ଏମାନଙ୍କ ପରୀକ୍ଷା ଆରମ୍ଭ ହୋଇଥିଲା। ଗୋଟିଏ ଶ୍ରେଣୀରେ ବସିଥିବା ପରୀକ୍ଷାର୍ଥୀଙ୍କ ପ୍ରଶ୍ନପତ୍ର ପ୍ୟାକେଟ ଖୋଲିବାରୁ ଇଂରାଜୀ ବଦଳରେ ଓଡ଼ିଆ ପ୍ରଶ୍ନପତ୍ର ବାହାରିଥିଲା। ଫଳରେ ୨୫ ଜଣ ପରୀକ୍ଷାର୍ଥୀ ପରୀକ୍ଷା ଦେବାରୁ ବଞ୍ଚିତ ହୋଇଥିଲେ। ପରେ କେନ୍ଦ୍ର ବାହାରକୁ ଆସି ଫାଟକ ସମ୍ମୁଖରେ ବସି ବୋର୍ଡ଼ କର୍ତ୍ତୃପକ୍ଷଙ୍କ ଦାୟିତ୍ୱହୀନତା ଯୋଗୁଁ ସେମାନେ ପରୀକ୍ଷା ଦେବାରୁ ବଞ୍ଚିତ ହୋଇଥିବା ପ୍ରକାଶ କରିଥିଲେ। ଏ ନେଇ ପରୀକ୍ଷା କେନ୍ଦ୍ର ଦାୟିତ୍ୱରେ ଥିବା ଅଧୀକ୍ଷକ ତଥା ପ୍ରଧାନ ଶିକ୍ଷକ ମୁରଲୀଧର ବାରିକଙ୍କୁ ପଚାରିବାରୁ ପ୍ରଶ୍ନପତ୍ର ବୋର୍ଡରୁ ସେହିଭଳି ଆସିଥିଲା, ଆମେ କ’ଣ କରିପାରିବୁ ବୋଲି କହିଛନ୍ତି। ଦେଖାଯାଉ ଏହି ଗୁରୁତର ତ୍ରୁଟିକୁ ଗଣଶିକ୍ଷା ବିଭାଗ କିପରି ସୁଧାରୁଛି।