ପୁରୀ ଅଫିସ, ୨୦।୨: ସେନାବାହିନୀରେ ଚାକିରୀ କରିବା ଲାଗି ଏକାଧିକଥର ପରୀକ୍ଷା ଦେଇ ବିଫଳ ହେଉଥିବା ଜଣେ ଯୁବକ ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ଲୋଡିଛନ୍ତି। ମହାପ୍ରଭୁଙ୍କ ଆଶୀର୍ବାଦ ରହିଲେ ସେ ନିଶ୍ଚିତ ସେନାବାହିନୀ ପରୀକ୍ଷାରେ କୃତକାର୍ଯ୍ୟ ହେବେ। ଏଭଳି ବିଶ୍ୱାସ ରଖି ଭଦ୍ରକରୁ ଦୌଡ଼ି ଦୌଡ଼ି ପୁରୀରେ ପହଞ୍ଚିଛନ୍ତି ୨୨ ବର୍ଷୀୟ ଯୁବକ ସୌରଭ ସେଠୀ। ଭଦ୍ରକ ଜିଲା ବନ୍ତରୁ ବୁଧବାର ସକାଳ ୭ଟାରେ ଦୌଡ ଆରମ୍ଭ କରିଥିବା ସୌରଭ ଗୁରୁବାର ପୂର୍ବାହ୍ନ ୧୧ଟାରେ ପୁରୀରେ ପହଞ୍ଚି ମହାପ୍ରଭୁଙ୍କ ଦର୍ଶନ କରିଛନ୍ତି। ଭଦ୍ରକରୁ ପୁରୀ ୨୧୦ କିମି ରାସ୍ତାକୁ ସେ ୨୮ ଘଣ୍ଟାରେ ଅତିକ୍ରମ କରିଛନ୍ତି।