ଆନ୍ଧ୍ରପ୍ରଦେଶସ୍ଥିତ କୌଣ୍ଡିନ୍ୟ ବନ୍ୟପ୍ରାଣୀ ଅଭୟାରଣ୍ୟରେ ବହୁ ବିରଳ ପଶୁପକ୍ଷୀଙ୍କୁ ଦେଖିବାକୁ ମିଳିଥାଏ। ଖାସ୍ କରି ଏଠାରେ ହାତୀମାନଙ୍କୁ ସୁରକ୍ଷା ଦେବା ପାଇଁ ବିଶେଷ ଧ୍ୟାନ ଦିଆଯାଇଥାଏ। ତେଣୁ ଏହାକୁ ଏକ ହାତୀ ସଂରକ୍ଷଣ କେନ୍ଦ୍ର କହିଲେ ମଧ୍ୟ ଭୁଲ୍ ହେବନାହିଁ।
ଆନ୍ଧ୍ରପ୍ରଦେଶସ୍ଥିତ କୌଣ୍ଡିନ୍ୟ ବନ୍ୟପ୍ରାଣୀ ଅଭୟାରଣ୍ୟ ଏକ ଆକର୍ଷଣୀୟ ପର୍ଯ୍ୟଟନସ୍ଥଳୀ ଭାବେ ବେଶ୍ ପରିଚିତ। ପ୍ରାୟ ୩୫୭ ବର୍ଗ କି.ମି. ପରିସୀମାବ୍ୟାପ୍ତ ଅଞ୍ଚଳ ଉପରେ ଗଢିଉଠିଥିବା ଏହି ବନ୍ୟପ୍ରାଣୀ ସଂରକ୍ଷଣ କେନ୍ଦ୍ରରେ ପର୍ଯ୍ୟଟକ ବହୁ ବିରଳ ପଶୁପକ୍ଷୀଙ୍କୁ ଦେଖିବାର ସୁଯୋଗ ପାଇଥାନ୍ତି। ଖାସ୍ କରି ଏଠାରେ ହାତୀଙ୍କ ସୁରକ୍ଷା ପାଇଁ ବିଶେଷ ଧ୍ୟାନ ଦିଆଯାଉଥିବାରୁ ସେମାନଙ୍କ ସଂଖ୍ୟା ଏଠି ଟିକେ ଅଧିକ ରହିଥାଏ। ସେହି ଦୃଷ୍ଟିରୁ ଏହାକୁ କେହି କେହି ହାତୀ ସଂରକ୍ଷଣ କେନ୍ଦ୍ର ବୋଲି ମଧ୍ୟ କହିଥାନ୍ତି।
ଇତିହାସ
ଇତିହାସରୁ ଯାହା ଜଣାଯାଏ, ପୂର୍ବେ ଏହି ସ୍ଥାନରେ ଗୋଟିଏ ହେଲେ ବି ହାତୀ ନ ଥିଲେ। କିନ୍ତୁ ଘଞ୍ଚ ଜଙ୍ଗଲ, ନଦୀ ଓ ଝରଣା ପରିବେଷ୍ଟିତ ଏଠାକାର ପ୍ରାକୃତିକ ପରିବେଶ ପ୍ରତି ଆକୃଷ୍ଟ ହୋଇ ଧୀରେ ଧୀରେ ଅନ୍ୟ ଅଞ୍ଚଳରୁ ହାତୀମାନେ ଆସି ଏଠାରେ ସେମାନଙ୍କର ବଂଶ ବିସ୍ତାର କରିବାକୁ ଲାଗିଲେ। ଏହି ଘଟଣା ସମ୍ପର୍କରେ ସ୍ଥାନୀୟ ସରକାର ଅବଗତ ହେବା ପରେ ସେମାନଙ୍କର ସୁରକ୍ଷା ପାଇଁ ଉଦ୍ୟମ କରିବା ସହ ଶେଷରେ ୧୯୯୦ ମସିହାରେ ଏଠାରେ ଏକ ବନ୍ୟପ୍ରାଣୀ ସଂରକ୍ଷଣ କେନ୍ଦ୍ର ଗଢ଼ିବାରେ ସଫଳ ହୋଇଥିଲେ। ସେବେଠାରୁ ଏଠାରେ ହାତୀଙ୍କ ସମେତ ଅନ୍ୟ ପଶୁପକ୍ଷୀଙ୍କୁ ବି ସୁରକ୍ଷା ଦିଆଯାଇ ଆସୁଅଛି।
କେବେ ଯିବେ
ବର୍ଷର ଯେ କୌଣସି ସମୟରେ ଏହି ଅଭୟାରଣ୍ୟକୁ ଯିବାପାଇଁ ସୁବିଧା ରହିଛି। ତେବେ ପାଣିପାଗ ଦୃଷ୍ଟିକୋଣରୁ ଦେଖିଲେ ଖରାଦିନେ ଏଠାରେ ଟିକେ ଅଧିକ ଗରମ ଅନୁଭୂତ ହୋଇଥାଏ। ସେହିପରି ବର୍ଷାରେ ବୁଲିବାକୁ ବି ଅନେକେ ପସନ୍ଦ କରି ନଥାନ୍ତି। ତେଣୁ ଏସବୁକୁ ଧ୍ୟାନରେ ରଖି ଅକ୍ଟୋବରରୁ ମାର୍ଚ୍ଚ ହେଉଛି ଏଠାକୁ ଯିବାପାଇଁ ସବୁଠୁ ଉପଯୁକ୍ତ ସମୟ।
କେମିତି ଯିବେ
ଏହି ଅଭୟାରଣ୍ୟକୁ ଯିବା ପାଇଁ ଗମନାଗମନର ମଧ୍ୟ ଭଲ ସୁବିଧା ରହିଛି। ଏହାର ନିକଟତମ ମୁଖ୍ୟ ବିମାନବନ୍ଦର ହେଉଛି ବାଙ୍ଗାଲୋର, ଯାହା ପ୍ରାୟ ୧୬୦ କି.ମି. ଦୂରରେ ଅବସ୍ଥିତ। ସେହିପରି ମୁଖ୍ୟ ରେଳଷ୍ଟେଶନ ହେଉଛି ଭେଲୋର କାଟପାଡି ଜଙ୍କଶନ୍, ଯାହା ପ୍ରାୟ ୬୫ କି.ମି. ଦୂରରେ ରହିଛି। ତା’ଛଡ଼ା ଦେଶର ବିଭିନ୍ନ ସ୍ଥାନରୁ ଏଠାକୁ ଯିବାପାଇଁ ଟୁରିଷ୍ଟ ବସ୍ର ଭଲ ବ୍ୟବସ୍ଥା ଉପଲବ୍ଧ ଅଛି।
କ’ଣ ଦେଖିବେ
ପର୍ଯ୍ୟଟକ ଉକ୍ତ ଅଭୟାରଣ୍ୟରେ ଅନେକ ହାତୀଙ୍କୁ ଦେଖିବା ସହ ବହୁ ବିରଳ ପଶୁପକ୍ଷୀ ବି ଦେଖିବାର ସୁଯୋଗ ପାଇଥାନ୍ତି। ଯେମିତିକି ଚିତ୍ରାହରିଣ, ଭାଲୁ, ଚିତାବାଘ, ଚୌଶିଙ୍ଗା, ଶମ୍ବର, ଜଙ୍ଗଲୀ ଘୁଷୁରି, ଜଙ୍ଗଲୀ ବିଲେଇ, ଗଧିଆ, ଝିଙ୍କ, ଜଙ୍ଗଲୀ ମାଙ୍କଡ଼, ଜଙ୍ଗଲୀ କୁକୁଡା ଇତ୍ୟାଦି । ସେହିପରି ଏଠାରେ ଦେଖିବାକୁ ମିଳୁଥିବା ଚିତ୍ରା କଇଁଛ ହେଉଛି ଏଠାକାର ଅନ୍ୟତମ ପ୍ରମୁଖ ଆକର୍ଷଣ। ଏହି ଅଭୟାରଣ୍ୟ ମଧ୍ୟରେ ଝରଣା ତଥା ଜଳାଶୟ ଥିବାରୁ, ବହୁ ବିଦେଶୀ ପକ୍ଷୀ ବି ଏଠାକୁ ଆକୃଷ୍ଟ ହୋଇ ଉଡି ଆସିଥାନ୍ତି। ସେଥିପାଇଁ ଏଠାରେ ବହୁ ବିଦେଶୀ ପକ୍ଷୀଙ୍କୁ ଦେଖିବାର ସୁଯୋଗ ପାଇଥାନ୍ତି ପର୍ଯ୍ୟଟକ।
ଅନ୍ୟାନ୍ୟ ଆକର୍ଷଣ
ଏହି ଅଭୟାରଣ୍ୟ ନିକଟରେ କଲ୍ୟାଣ ରେଭୁ ଏବଂ କାଇଗାଲ୍ ନାମକ ଦୁଇଟି ପ୍ରମୁଖ ଝରଣା ଦେଖିବାକୁ ମିଳିଥାଏ। ଜଙ୍ଗଲ ପରିବେଷ୍ଟିତ ଏହି ଝରଣା ନିକଟରେ ପିକ୍ନିକ୍ କରିବା ପାଇଁ ପର୍ଯ୍ୟଟକ ଖୁବ୍ ଭଲ ପାଇଥାନ୍ତି। ତେଣୁ କୌଣ୍ଡିନ୍ୟ ବନ୍ୟପ୍ରାଣୀ ଅଭୟାରଣ୍ୟରେ ବୁଲି ପଶୁପକ୍ଷୀଙ୍କୁ ଦେଖିବା ସହ ଉକ୍ତ ଝରଣା ନିକଟରେ ଆସି ପିକ୍ନିକ୍ କଲେ ପର୍ଯ୍ୟଟକଙ୍କୁ ଏକ ନିଆରା ଅନୁଭୂତି ମିଳିଥାଏ।