ଜମ୍ମୁ ଓ କଶ୍ମୀରସ୍ଥିତ ଏକ ଲୋକପ୍ରିୟ ପର୍ଯ୍ୟଟନସ୍ଥଳୀ ଭାବେ ଅବନ୍ତିପୁରର ବେଶ୍ ନାଁ ରହିଛି। ପ୍ରାକୃତିକ ବୈଭବରେ ଭରା ଏହି ପର୍ଯ୍ୟଟନସ୍ଥଳୀରେ ଅନେକ ପ୍ରାଚୀନ ମନ୍ଦିର ଦେଖିବାକୁ ମିଳିଥାଏ। ସେଥିପାଇଁ ଅନେକେ ଏହାକୁ ପ୍ରାଚୀନ ମନ୍ଦିରର ସହର ଅବନ୍ତିପୁର ବୋଲି ବି କହିଥାନ୍ତି। ଖାସ୍ କରି ଏଠାକାର ଅବନ୍ତୀଶ୍ୱର ଓ ଅବନ୍ତିସ୍ବାମୀ ମନ୍ଦିର ପର୍ଯ୍ୟଟକଙ୍କୁ ଖୁବ୍ ଆକୃଷ୍ଟ କରିଥାଏ…
ଅବନ୍ତିପୁର ଜମ୍ମୁ ଓ କଶ୍ମୀରର ପୁଲଓ୍ବାମା ଜିଲା ଅନ୍ତର୍ଗତ ଏମିତି ଏକ ପର୍ଯ୍ୟଟନସ୍ଥଳୀ, ଯେଉଁଠାରେ ଅନେକ ପ୍ରାଚୀନ ମନ୍ଦିର ଦେଖିବାକୁ ମିଳିଥାଏ। ତନ୍ମଧ୍ୟରୁ ଅବନ୍ତୀଶ୍ୱର ଓ ଅବନ୍ତିସ୍ବାମୀ ମନ୍ଦିର ହେଉଛି ସ୍ଥାନୀୟ ଦୁଇଟି ପ୍ରମୁଖ ପ୍ରାଚୀନ ମନ୍ଦିର। ଏହି ଦୁଇଟି ମନ୍ଦିରର ନିର୍ମାଣ ରାଜା ଅବନ୍ତି ବର୍ମନଙ୍କ ଦ୍ୱାରା ନବମ ଶତାବ୍ଦୀ ସମୟରେ କରାଯାଇଥିଲା। ଅବନ୍ତୀଶ୍ୱର ମନ୍ଦିରରେ ଦେବ ଦେବ ମହାଦେବ ପୂଜା ପାଉଥିବାବେଳେ ଅବନ୍ତିସ୍ବାମୀ ମନ୍ଦିରରେ ପ୍ରଭୁ ବିଷ୍ଣୁଙ୍କୁ ପୂଜାର୍ଚ୍ଚନା କରାଯାଇଥାଏ।
କେବେ ଓ କେମିତି ଯିବେ
ଅବନ୍ତିପୁର ଯିବା ପାଇଁ ସଡ଼କପଥ, ରେଳପଥ ତଥା ଆକାଶପଥର ବେଶ୍ ଭଲ ସୁବିଧା ରହିଛି। ଶ୍ରୀନଗର ଏୟାର୍ପୋର୍ଟ ଏଠାକାର ନିକଟତମ ବିମାନବନ୍ଦର ହୋଇଥିବାବେଳେ ଜମ୍ମୁ ତଓ୍ବି ରେଲଓ୍ବେ ଷ୍ଟେଶନ ହେଉଛି ସ୍ଥାନୀୟ ଏକ ପ୍ରମୁଖ ରେଳଷ୍ଟେଶନ, ଯେଉଁଠାକୁ ଦେଶର ବିଭିନ୍ନ ସ୍ଥାନରୁ ଟ୍ରେନ୍ ଯା’ଆସ କରିଥାଏ। ତା’ଛଡ଼ା ପର୍ଯ୍ୟଟକ ଚାହିଁଲେ ଏଠାକୁ ସଡ଼କ ମାର୍ଗରେ ମଧ୍ୟ ଯାଇପାରିବେ। କିନ୍ତୁ ଏଥିପାଇଁ ସେମାନଙ୍କୁ ପ୍ରଥମେ ବସ୍ରେ ଶ୍ରୀନଗର ଯାଇ ସେଠାରୁ ଅନ୍ୟ ଏକ ବସ୍ ଧରି ଅବନ୍ତିପୁର ଯିବାକୁ ହେବ। ସେହିପରି ସ୍ଥାନୀୟ ପାଣିପାଗ ସୂଚନା କେନ୍ଦ୍ରର ମତାନୁଯାୟୀ, ଏଠାକୁ ଯିବା ପାଇଁ ଏପ୍ରିଲ୍ରୁ ନଭେମ୍ବର ହେଉଛି ସବୁଠୁ ଭଲ ସମୟ। କାରଣ ନଭେମ୍ବର ମାସ ପରେ ଏଠାରେ ପ୍ରବଳ ଶୀତ ଅନୁଭୂତ ହୋଇଥାଏ। ଏପରିକି ଅନେକ ସମୟରେ ଏଠାରେ ତୁଷାରପାତ ହେଉଥିବାର ବି ଦେଖିବାକୁ ମିଳେ।
କ’ଣ ଦେଖିବେ
ଅବନ୍ତିପୁରରେ ଥିବା ଦୁଇ ପ୍ରମୁଖ ମନ୍ଦିର ଅବନ୍ତୀଶ୍ୱର ଓ ଅବନ୍ତିସ୍ବାମୀ ମନ୍ଦିରର ନିର୍ମାଣଶୈଳୀ ଦେଖିଲେ ପ୍ରାୟତଃ ଏକାଭଳି ଦେଖାଯାଇଥାଏ। ଖାସ୍ କରି ଉଭୟ ମନ୍ଦିରର ପ୍ରବେଶ ଦ୍ୱାର ନିକଟସ୍ଥ କାନ୍ଥକୁ ପଥରରେ ଖୋଦେଇ କରି ସେଥିରେ ଏକାପରି ଆକର୍ଷଣୀୟ କଳାକୃତି କରାଯାଇଥିଲା। ବହୁତ ବର୍ଷର ପୁରୁଣା ମନ୍ଦିର ହୋଇଥିବାରୁ ଏବେ ଏହାର ଅନେକ ଅଂଶ ଭାଙ୍ଗିଯାଇଛି। ହେଲେ ଯେଉଁ କଳାକୃତିର ଛାପ ଆଜି ବି ରହିଛି ତାହା ମନେପକାଇ ଦେଉଛି ଅତୀତର ସେହି ସ୍ମୃତିସବୁକୁ। ତା’ଛଡ଼ା ଏହି ମନ୍ଦିରରେ ପୂଜା ପାଉଥିବା ଭଗବାନ ଶିବ ଓ ବିଷ୍ଣୁ ଖୁବ୍ ପ୍ରତ୍ୟକ୍ଷ ହୋଇଥିବାରୁ ଏଠାରେ ସବୁବେଳେ ଭକ୍ତଗଣଙ୍କର ଭିଡ଼ ଲାଗି ରହିଥାଏ। ସେହିପରି ଇତିହାସ ସମ୍ପର୍କିତ ତଥ୍ୟ ସଂଗ୍ରହ କରିବାରେ ରୁଚି ରଖୁଥିବା ପର୍ଯ୍ୟଟକଙ୍କ ପାଇଁ ଏହି ସ୍ଥାନଟି ବି ବହୁତ ଖାସ୍ ହୋଇଥାଏ। ତା’ଛଡ଼ା ଏଠାରେ ଥିବା ଅନ୍ୟ ଛୋଟ ବଡ଼ ପ୍ରାଚୀନ ମନ୍ଦିରଗୁଡ଼ିକୁ ବି ପର୍ଯ୍ୟଟକ ବୁଲି ଯାଇ ନିଆରା ଅନୁଭୂତି ସାଉଁଟି ପାରିବେ।
ନିକଟସ୍ଥ ପର୍ଯ୍ୟଟନସ୍ଥଳୀ
ପ୍ରାକୃତିକ ପରିବେଶପୂର୍ଣ୍ଣ ଅବନ୍ତିପୁରରେ ପ୍ରାଚୀନ ମନ୍ଦିରଗୁଡ଼ିକୁ ବୁଲି ଦେଖିବା ସହ ପର୍ଯ୍ୟଟକ ଚାହିଁଲେ ଏହାର ନିକଟବର୍ତ୍ତୀ ଅଞ୍ଚଳରେ ଥିବା ଅନନ୍ତନାଗ, ମାର୍ତ୍ତଣ୍ଡ ସୂର୍ଯ୍ୟ ମନ୍ଦିର, ପଦଗାମ୍ପୋରା, ଚାର୍ସୋ ଅବନ୍ତିପୋରା ଇତ୍ୟାଦି ଲୋକପ୍ରିୟ ଦର୍ଶନୀୟ ସ୍ଥାନଗୁଡ଼ିକୁ ବି ଦେଖିବାକୁ ଯାଇପାରିବେ।