ଅନୁଗୋଳ ଅଫିସ, ୨୧।୯ – ଅନୁଗୋଳ ସହରରେ ପଲିଥିନ ନିଷେଧ କରାଯାଇଥିଲେ ବି ଏଯାଏ ଲକ୍ଷ୍ୟ ପୂରଣ ହୋଇନାହିଁ। ଏବେ ବି ସହରରେ ଖୋଲାଖୋଲି ଚାଲିଛି ପଲିଥିନ କାରବାର। ଦୋକାନୀମାନେ ବିଭିନ୍ନ ସାମଗ୍ରୀ ଗ୍ରାହକଙ୍କୁ ପଲିଥିନରେ ଦେଉଥିବା ବେଳେ ଉପକଣ୍ଠରେ ଥିବା ଗୋଦାମ ଗୁଡ଼ିକରେ ଟନ ଟନ ପଲିଥିନ ମହଜୁଦ ରଖାଯାଇଥିବା ଚର୍ଚ୍ଚା ହେଉଛି। ହେଲେ ପଲିଥିନ ଖୋଜି ପାଉନି ପୌରସଂସ୍ଥା। ଏପରି କି ଶୁକ୍ରବାର କିଛି ସ୍ଥାନରେ ଚଢ଼ାଉ କରାଯାଇ ମାତ୍ର ୨ କିଲୋଗ୍ରାମ ପଲିଥିନ ସହ ୧୩ଶହ ଟଙ୍କା ଜରିମାନା ଆଦାୟ କରାଯାଇଥିବାରୁ ପୌରପାଳିକାଳର ଆଭିମୁଖ୍ୟ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ସହରବାସୀଙ୍କ କହିବା ଅନୁଯାୟୀ, ଅନୁଗୋଳ ସହରରେ ଥିବା ବିଭିନ୍ନ ଗୋଦାମକୁ ଭୋର ସମୟରେ ପଲିଥିନ ଆସୁଛି। ଏପରି କି ପଲିଥିନ ବନ୍ଦ କରିବା ପାଇଁ ପୌରପାଳିକା ପକ୍ଷରୁ ବିଭିନ୍ନ ସମୟରେ ପଦକ୍ଷେପ ନିଆଯାଉଥିଲେ ମଧ୍ୟ ତାହା ଯଥେଷ୍ଟ ହେଉନାହିଁ। ପଲିଥିନ ବ୍ୟାନ ଥିବାବେଳେ ରାତି ପାହିଲେ ବିଭିନ୍ନ ରାସ୍ତା ଘାଟରେ ପୁଳା ପୁଳା ପଲିଥିନ ପରିଲକ୍ଷିତ ହେଉଛି। ଏ ନେଇ ପୌରନିର୍ବାହୀ ଅଧିକାରୀ ଅତିରିକ୍ତ ଦାୟିତ୍ୱରେ ଥିବା ସୁବ୍ରତ କୁମାର ବେହେରା କହିଛନ୍ତି, ବିଭିନ୍ନ ସ୍ଥାନ ଉପରେ ନଜର ରଖାଯାଇଛି। ତେବେ କେଉଁଠାରୁ ଏହା ଆସୁଛି ତାହା ଜାଣିବା ପାଇଁ ଉଦ୍ୟମ ଜାରି ରହିି। ବ୍ୟବସାୟୀମାନେ ଧରାପଡ଼ିଲେ ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।