ବାଲିଅନ୍ତା,୨୬।୯(ଡି.ଏନ.ଏ.): ଆଉ ଦିନ କେଇଟା ପରେ ଧରାପୃଷ୍ଟକୁ ଓହ୍ଲାଇବେ ମା’ ଜଗତ୍ଜନନୀ। ଏଥିପାଇଁ ରାଜ୍ୟ ସାରା ଚଳଚଞ୍ଚଳ ହୋଇଉଠିଛି। ରାଜ୍ୟର କୋଣ ଅନୁକୋଣରେ ସାଜସଜ୍ଜା ପ୍ରସ୍ତୁତି ଖୁବ ଜୋରସୋରରେ ଚାଲିଛି। ରାଜଧାନୀରେ ବହୁ ଦୁର୍ଗାପୂଜା କମିଟି ପ୍ରତିବର୍ଷ ନୂଆ ଶୈଳୀରେ ତୋରଣ କରି ଲୋକଙ୍କୁ ଆକର୍ଷିତ କରିଥାନ୍ତି। ଏଭଳି ଭିନ୍ନ ଶୈଳରେ ପ୍ରସ୍ତୁତ କରୁଥିବା କମିଟି ମଧ୍ୟରୁ ପଳାଶୁଣୀ ଦୁର୍ଗାପୂଜା ସମିତି ଅନ୍ୟତମ। ରାଜଧାନୀର ପ୍ରବେଶ ପଥର ୧୬ନଂ ଜାତୀୟ ରାଜପଥ ପଳାଶୁଣୀ ଛକରେ ଦୀର୍ଘ ୩୪ବର୍ଷ ଧରି ଦୁର୍ଗାପୂଜା ଅନୁଷ୍ଠିତ ହୋଇଆସୁଛି। ଚଳିତବର୍ଷ ଝୁମର ଓ୍ବାଲା ତୋରଣରେ ବିରାଜିତ ହେବେ ମା’ ଦୁର୍ଗା। ତୋରଣରେ ଶଙ୍ଖ ଓ ଶାମୁକାକୁ ନେଇ ବେଶି ଗୁରୁତ୍ୱ ଦିଆଯାଉଥିବାରୁ ଏହାର ଶୋଭା ବଢ଼ାଇବ। ରୀତି ଅନୁଯାୟୀ ଷଷ୍ଠୀ ତିଥିରେ ଖଲ୍ଲିକୋଟର ମା’ ନାରାୟଣୀଙ୍କ ପୀଠରୁ ଆଜ୍ଞାମାଳ ଆଣିବା ପରେ ଏଠାରେ ପୂଜା ଆରମ୍ଭ ହୋଇଥାଏ ବୋଲି ସମିତିର ସହସମ୍ପାଦକ ସିଲୁ ଲେଙ୍କା କହିଛନ୍ତି। ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ନବମୀରେ ଖେଚୁଡ଼ି ଓ ଦଶମୀରେ ଦହି ପଖାଳ ଭକ୍ତମାନଙ୍କୁ ପ୍ରସାଦ ଆକାରରେ ଦିଆଯିବ। ପାରମ୍ପରିକ ରୀତି ଅନୁଯାୟୀ ଏଠାରେ ୫ଦିନ ଧରି ପୂଜା ଅନୁଷ୍ଠିତ ହୋଇଥାଏ। ସାଂସ୍କୃତିକ କାର୍ଯ୍ୟକ୍ରମ ରୂପେ ସପ୍ତମୀରେ ଭଜନ ସମାରୋହ, ଅଷ୍ଟମୀ ଓ ନବମୀରେ ମେଲୋଡ଼ି ପରିବେଷିତ ହେବ। ରଙ୍ଗବେରଙ୍ଗ ଆଲୋକମାଳାରେ ଝଲସିବ ଜାତୀୟ ରାଜପଥ ପାର୍ଶ୍ୱ। ଏଥିସହିତ ୬୦ଫୁଟର ଏଲ୍ଇଡି ଲାଇଟ୍ ପୂଜା ମଣ୍ଡପ ଚତୁଃପାର୍ଶ୍ୱରେ ରହିବ। ଚଳିତବର୍ଷ ପୂଜାର ବଜେଟ ୧୮ଲକ୍ଷ ଟଙ୍କା ରଖାଯାଇଛି। ଭସାଣିରେ ପାରମ୍ପରିକ ବାଦ୍ୟ ସହ ବାଣ, ଘୋଡ଼ା ଓ ଷଣ୍ଢ ନାଚ ସାମିଲ କରାଯାଇଛି।