କୋଲକତା,୨।୧:ପଶ୍ଚିମବଙ୍ଗରେ କରୋନା ବୃଦ୍ଧି ପାଉଥିବା ମାମଲାକୁ ଦୃଷ୍ଟିରେ ରଖି ମମତା ସରକାର ରବିବାର ନୂଆ ପ୍ରତିବନ୍ଧକ ଘୋଷଣା କରିଛନ୍ତି। ଏହି ପ୍ରତିବନ୍ଧକଗୁଡିକ ଆଂଶିକ ଲକଡାଉନ ରୂପରେ ଦେଖାଯାଉଛି। ଆସନ୍ତାକାଲି ଅର୍ଥାତ୍ ସୋମବାର ପଶ୍ଚିମବଙ୍ଗରେ ସମସ୍ତ ସ୍କୁଲ, କଲେଜ, ବିଶ୍ୱବିଦ୍ୟାଳୟ, ସ୍ପା, ସେଲୁନ, ବିୟୁଟି ପାର୍ଲର, ପ୍ରାଣୀ ଉଦ୍ୟାନ ଏବଂ ମନୋରଞ୍ଜନ ପାର୍କ ବନ୍ଦ ରହିବ। ରାଜ୍ୟ ମୁଖ୍ୟ ସଚିବ ଏଚ.କେ ଦ୍ୱିବେଦୀ ସୂଚନା ଦେଇଛନ୍ତି ଯେ ସମସ୍ତ ସରକାରୀ ଏବଂ ବେସରକାରୀ କାର୍ଯ୍ୟାଳୟ ୫୦% କ୍ଷମତାରେ କାର୍ଯ୍ୟ କରିବେ। ସମସ୍ତ ପ୍ରଶାସନିକ ବୈଠକ ଭର୍ଚୁଆଲ ମୋଡ ମାଧ୍ୟମରେ କରାଯିବ। ମୁଖ୍ୟ ସଚିବ କହିଛନ୍ତି ଯେ ସିଏମ ମମତା ବାନାର୍ଜୀ ପୂର୍ବରୁ କିଛି ପ୍ରତିବନ୍ଧକ ଲଗାଯିବ ବୋଲି କହିଥିଲେ। ଆସନ୍ତାକାଲି ଠାରୁ ବ୍ରିଟେନରୁ ବିମାନ ଉଡ଼ାଣ ଉପରେ ପ୍ରତିବନ୍ଧକ ଲଗାଯାଇଛି। ବିପଦପୂର୍ଣ୍ଣ ଦେଶରୁ ଆସୁଥିବା ଯାତ୍ରୀମାନଙ୍କ ପାଇଁ ଆରଟିପିସିଆର୍ ଟେଷ୍ଟ କରାଯିବ। ସେହିଭଳି ଅନ୍ୟ ଦେଶରୁ ଆସୁଥିବା ଯାତ୍ରୀମାନଙ୍କ ପାଇଁ ଆଣ୍ଟିଜେନ ପରୀକ୍ଷା କରାଯିବ।
