ଛତ୍ରପୁର,୨୩ା୫(ଡି.ଏନ୍.ଏ.)- ଲକ୍ଡାଉନ୍ ଯୋଗୁ ପଶ୍ଚିମବଙ୍ଗର ହାୱଡା ଜିଲା ଘୁଷରି ଅଞ୍ଚଳ ନସ୍କପତା ବସ୍ତିରେ ଗଞ୍ଜାମ ଜିଲାର ୫୦ ପରିବାର ଝୁମ୍ପୁଡି ମଧ୍ୟରେ ରହି ଆସୁଥିଲେ। ସେମାନେ ବୁଗୁଡା, ପୋଲସରା, ନିମପଦର, ଆସିକା, ସୋରଡା ଆଦି ଅଞ୍ଚଳର। କାମ କରୁଥିବା ଝୋଟ ମିଲ୍ ବନ୍ଦ ହୋଇଯିବାରୁ ଚଳିବା କଷ୍ଟକର ହୋଇପଡିଥିଲା। ଏବେ ବାତ୍ୟା ଅମ୍ଫନ ପ୍ରଭାବରେ ଘରେ ବନ୍ୟା ପାଣି ପଶି ଯାଇଛି। ଫଳରେ ଉକ୍ତ ୫୦ ପରିବାର ଏକପ୍ରକାର ଜଳବନ୍ଦୀ ମଧ୍ୟରେ ରହିଛନ୍ତି। ନିକଟସ୍ଥ ସ୍କୁଲ ଓ କେତେକ ଘରର ଛାତ ଉପରେ ସପରିବାର ଦିନ କାଟୁଥିବା ମିନତି ସାହୁ ଓ ଭାଗୀରଥି ସାହୁ ପ୍ରମୁଖ ସୂଚନା ଦେଇଛନ୍ତି। ଭିଟାମାଟିକୁ ଫେରାଇଆଣିବା ବ୍ୟବସ୍ଥା କରିବାକୁ ସେମାନେ ଓଡ଼ିଡା ସରକାର ଓ ଗଞ୍ଜାମ ଜିଲା ପ୍ରଶାସନକୁ ନିବେଦନ କରିଛନ୍ତି। ସେଠାରେ ଖାଇବା ପିଇବା ମିଳୁ ନ ଥିବା ମଧ୍ୟ ଅଭିଯୋଗ କରିଛନ୍ତି।