ଫୁଲବାଣୀ ଅଫିସ, ୧୯ା୧୦: ପଶ୍ଚିମବଙ୍ଗ ମୁର୍ଶିଦାବାଦରେ ପ୍ରକାଶ ପାଲ ଏବଂ ତାଙ୍କ ଗର୍ଭବତୀ ସ୍ତ୍ରୀଙ୍କ ସହ ୮ ବର୍ଷର ନିଷ୍ପାପ ପୁଅକୁ ଅତି ଜଘନ୍ୟ ଭାବେ ଗତ ୧୦ ତାରିଖରେ ହତ୍ୟା କରାଯାଇଛି। ଏହି ଘଟଣାକୁ ନେଇ ସମଗ୍ର ରାଷ୍ଟ୍ରର ହିନ୍ଦୁ ସମାଜ ବ୍ୟଥିତ। ପଶ୍ଚିମବଙ୍ଗରେ ହିନ୍ଦୁମାନେ ନିଜକୁ ଅସୁରକ୍ଷିତ ମନେ କରୁଛନ୍ତି। ବାଂଲାଦେଶୀ ମୁସଲମାନଙ୍କ ଅନୁପ୍ରବେଶ ଏହାର ମୁଖ୍ୟ କାରଣ। ଭୋଟ ଆଶାରେ ମମତା ବାନାର୍ଜୀଙ୍କ ସରକାର କୌଣସି ଆଇନଗତ ପଦକ୍ଷେପ ନେଇ ନାହାନ୍ତି। ବିଗତ କିଛି ବର୍ଷ ହେଲା ପଶ୍ଚିମବଙ୍ଗରେ ହିନ୍ଦୁମାନଙ୍କୁ ବାରମ୍ବାର ହତ୍ୟା କରାଯାଉଛି। ହତ୍ୟାକାରୀଙ୍କୁ ସରକାର ସମର୍ଥନ କରୁଛନ୍ତି। ସେଠାରେ ସରକାରକୁ ବରଖାସ୍ତ କରି ତୁରନ୍ତ ରାଷ୍ଟ୍ରପତି ଶାସନ ଜାରି କରିବା ଦାବିରେ ଶନିବାର ବଜରଙ୍ଗ ଦଳ ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ଏଥିସହ ୫ ଦଫା ସମ୍ବଳିତ ଦାବିପତ୍ର ଜିଲାପାଳଙ୍କ ଜରିଆରେ ରାଷ୍ଟ୍ରପତିଙ୍କ ନିକଟକୁ ପଠାଯାଇଛି।
ଏହି ହତ୍ୟାକାଣ୍ଡର ସିବିଆଇ ତଦନ୍ତ ସହ ଦୋଷୀଙ୍କୁ ଫାଶୀ ଦିଆଯାଉ। ପଶ୍ଚିମବଙ୍ଗରେ ଏନ୍ଆରସି ଲାଗୁ କରାଯାଇ ବାଂଲାଦେଶୀ ଅନୁପ୍ରବେଶକାରୀଙ୍କୁ ଚିହ୍ନଟ କରି ଦେଶରୁ ବାହାର କରାଯିବା ଦରକାର। ନାଗରିକତା ବିଲ୍ରେ ସଂଶୋଧନ ଆଣି ବାଂଲାଦେଶରୁ ନିର୍ଯାତିତ ହୋଇ ଆସିଥିବା ହିନ୍ଦୁମାନଙ୍କୁ ସଂରକ୍ଷଣ ଦିଆଯାଇ ସୁରକ୍ଷା ପ୍ରଦାନ ଜରୁରୀ ହୋଇପଡିଛି ବୋଲି ବଜରଙ୍ଗ ଦଳର ସଂଯୋଜକ ନିରଞ୍ଜନ ମହାନ୍ତି, ରାକେଶ ମିଶ୍ର, ଗୋପାଳ କୃଷ୍ଣ ଷଡଙ୍ଗୀ, ସତ୍ୟନାରାୟଣ ପାତ୍ର, ମୂରଲୀଧର ପଣ୍ଡା, ଅମ୍ବିକା ଦାସ, ଗୌତମ ମହାରଣା ପ୍ରମୁଖ ପ୍ରକାଶ କରିଛନ୍ତି।