କୋଲକାତା,୧୧ା୮(ପି.ଟି.): ଲୋକ ସଭା ନିର୍ବାଚନରେ ପରାଜୟ ପରେ କଂଗ୍ରେସ ଏବଂ ସିପିଆଇ(ଏମ୍) ଆଗାମୀ ପଶ୍ଚିମବଙ୍ଗ ବିଧାନସଭା ଉପନିର୍ବାଚନ ପାଇଁ ଆସନ ବୁଝାମଣା କରିଛନ୍ତି। ରାଜ୍ୟରେ ଭାଜପା ଓ ତୃଣମୂଳ କଂଗ୍ରେସ (ଟିଏମ୍ସି)ର ବିଜୟ ଅଭିଯାନରେ ରୋକ୍ ଲଗାଇବାକୁ ୩ ବିଧାନସଭା ଆସନରେ ଏକାଠି ଲଢ଼ିବା ଲାଗି କଂଗ୍ରେସ ଓ ସିପିଆଇ(ଏମ୍)ର ରାଜ୍ୟ ନେତୃତ୍ୱ ଏକ ବୈଠକରେ ନିଷ୍ପତ୍ତି ନେଇଛନ୍ତି। ତଦନୁଯାୟୀ କଂଗ୍ରେସ ଉତ୍ତର ଦିନାଜପୁର ଜିଲାର କାଳିଆଗଞ୍ଜ ଏବଂ ପଶ୍ଚିମ ମିଦନାପୁର ଜିଲାର ଖଡଗପୁର ଆସନରେ ନିର୍ବାଚନ ଲଢ଼ିବାକୁ ଥିବାବେଳେ ସିପିଆଇ(ଏମ୍) ନେତୃତ୍ୱାଧୀନ ବାମ ସାମ୍ମୁଖ୍ୟ ନଦୀୟା ଜିଲାର କରିମ୍ପୁର ଆସନରେ ପ୍ରାର୍ଥୀ ଦେବ। ଏହି ମେଣ୍ଟ ପଶ୍ଚିମବଙ୍ଗ ରାଜନୀତିରେ ନୂଆ ଅଧ୍ୟାୟ ସୃଷ୍ଟି କରିବ। ଆମେ ସାମ୍ପ୍ରଦାୟିକ ଦଳ ଭାଜପା ଓ ଟିଏମ୍ସିକୁ ପରାଜିତ କରିବୁ ବୋଲି ପଶ୍ଚିମବଙ୍ଗ କଂଗ୍ରେସ ସଭାପତି ସୋମେନ ମିତ୍ର କହିଛନ୍ତି। କଂଗ୍ରେସ ବିଧାୟକ ପ୍ରମଥନାଥ ରାୟଙ୍କ ପରଲୋକ ପରେ କାଳିଆଗଞ୍ଜ ଆସନ ଖାଲିପଡିଥିବାବେଳେ ଖଡଗପୁରର ଭାଜପା ବିଧାୟକ ଦିଲୀପ ଘୋଷ ଲୋକ ସଭାକୁ ନିର୍ବାଚିତ ହୋଇଛନ୍ତି। ସେହିପରି ଟିଏମ୍ସି ବିଧାୟକ ମହୁଆ ମୈତ୍ର କ୍ରିଷ୍ଣନଗର ଆସନରୁ ଲୋକ ସଭାକୁ ନିିର୍ବାଚିତ ହୋଇଥିବାରୁ କରିମନଗର ଆସନ ଖାଲିପଡିଛି।
