ଭୁବନେଶ୍ୱର,୧୮।୨(ବ୍ୟୁରୋ): ପଶ୍ଚିମ ଓଡ଼ିଶା ଓକିଲ ଆନ୍ଦୋଳନ ଯୋଗୁ ସୁପ୍ରିମ କୋର୍ଟଙ୍କ ନିର୍ଦ୍ଦେଶ କ୍ରମେ ରାଜ୍ୟ ସରକାର ସମସ୍ତ କେସ୍ଗୁଡ଼ିକୁ ଅନ୍ୟ କୋର୍ଟକୁ ସ୍ଥାନାନ୍ତର କରିଛନ୍ତି। ଏହା ଦ୍ୱାରା ଲୋକମୋନେ ନ୍ୟାୟ ପାଇବାରୁ ବଞ୍ଚିତ ହୋଇଛନ୍ତି। ଦୂରଦୂରାନ୍ତକୁ ଯାଇ କେସ୍ ଲଢ଼ିବା ଲୋକଙ୍କ ପକ୍ଷେ ସମ୍ଭବ ହେଉ ନାହିଁ। ମାମଲା ସ୍ଥାନାନ୍ତର କରିବା ପୂର୍ବରୁ ଲୋକଙ୍କୁ ଏ ବିଷୟରେ ଅବଗତ କରାଯାଇ ନାହିଁ। କୌଣସି ନ୍ୟାୟ ପାଇବା ପାଇଁ ଲୋକମାନେ ଅଦାଲତକୁ ଯାଇଥାନ୍ତି। ତେବେ ଦୂରରୁ ଦୂରକୁ କେସ୍ ସ୍ଥାନାନ୍ତର ହେବା ପରେ ଜନସାଧାରଣ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ସରକାର ତୁରନ୍ତ ସ୍ଥାନାନ୍ତର ହୋଇଥିବା କେସ୍ଗୁଡିକୁ ଫେରାଇ ନେବାକୁ ପଦକ୍ଷେପ ନିଅନ୍ତୁ।
ଶୂନ୍ୟକାଳରେ ଏହି ପ୍ରସଙ୍ଗ ଉଠାଇଥିଲେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର। ଗୃହରେ ଏହି ପ୍ରସଙ୍ଗରେ ବିବୃତି ଦେବା ଲାଗି ଆଇନ ମନ୍ତ୍ରୀଙ୍କୁ ନିର୍ଦ୍ଦେଶ ଦେବା ପାଇଁ ଅଡି ବସିଥିଲେ। ବାଚସ୍ପତି ଏ ନେଇ ରିଲିଫ୍ ଦିଅନ୍ତୁ ବୋଲି ସେ ଦାବି କରିଥିଲେ। ବାଚସ୍ପତି କହିଥିଲେ ଯେ ଏହା ସରକାରଙ୍କ ନିସ୍ପତ୍ତି। ଆଇନ ବିଭାଗ ଏହା ଉପରେ ତର୍ଜମା କରିବାକୁ ନିର୍ଦ୍ଦେଶ ଦିଆଯିବ। ମାତ୍ର ନରସିଂହ ବାଚସ୍ପତିଙ୍କ ଏଭଳି ନିର୍ଦ୍ଦେଶକୁ ଗ୍ରହଣ କରି ନ ଥିଲେ। ଗୃହରେ ବିବୃତି ଦେବା ଲାଗି ଦାବିକରିଥିଲେ। ଶେଷରେ ବାଚସ୍ପତି ବାଧ୍ୟହୋଇ ଏ ସଂକ୍ରାନ୍ତରେ ଗୃହରେ ବିବୃତିି ଦେବା ଲାଗି ଆଇନ ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ।