ବସ୍ତା, ୧୬।୨(ଡି.ଏନ.ଏ.)-ବାଲେଶ୍ୱର ଜିଲା ବସ୍ତା ଥାନା ବ୍ରାହ୍ମଣଦା ପଞ୍ଚାୟତ ରଣାମୁଣ୍ଡଳି ଗ୍ରାମର ସେନାବାହିନୀରେ କାର୍ଯ୍ୟରତ ସୈନିକ ଅଭିରାମ ରାମ ଶହୀଦ ହେବା ପରେ ତାଙ୍କ ମରଶରୀର ବସ୍ତାରେ ପହଞ୍ଚିଛି। ତାଙ୍କ ମରଶରୀର ପହଞ୍ଚିବା ପରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଶହୀଦ ଅଭିରାମ ଅମର ରହେ ସ୍ଲୋଗାନ ଦେଇ ହଜାର ହଜାର ଜନସାଧାରଣ ତାଙ୍କ ଶବାଯାତ୍ରାରେ ସାମିଲ ହୋଇଥିଲେ।
ଅଭିରାମ ୨୦୦୯ରେ ଇଣ୍ଡିଆନ ଆର୍ମିରେ ଯୋଗ ଦେଇଥିଲେ । ସେ ଅରୁଣାଚଳ ପ୍ରଦେଶରେ ସେ ୟୁନିଟ-୧୫ ବିହାର ହେଡରେ ନାୟକ ଭାବେ କାର୍ଯ୍ୟରତ ଥିଲେ। ଗତ ୧୩ ତାରିଖରେ ଏକ ଗାଡିରେ ସେ ଯବାନମାନଙ୍କ ସହ ଯାଉଥିବା ବେଳେ ଲାଇକଚୋଲି ଆଉଟ ପୋଷ୍ଟ ପାରି ହେବାର ୫ କି.ମି. ପରେ ଗାଡିଟି ଦୁର୍ଘଟଣାଗ୍ରସ୍ତ ହୋଇଥିଲା। ଫଳରେ ତାଙ୍କର ମୃତ୍ୟୁ ହୋଇଯାଇଥିଲା। ତାଙ୍କର ମୃତ୍ୟୁ ଖବର ବିଭାଗୀୟ କାର୍ଯ୍ୟାଳୟରୁ ଶୁକ୍ରବାର ତାଙ୍କ ପରିବାର ଲୋକଙ୍କୁ ଜଣାଯାଇଥିଲା। ଶନିବାର ମଧ୍ୟାହ୍ନରେ ତାଙ୍କ ମରଶରୀର ବିମାନ ଯୋଗେ ଭୁବନେଶ୍ୱର ପହଞ୍ଚିବା ପରେ ତାଙ୍କୁ ଆର୍ମି ବିଭାଗ ପକ୍ଷରୁ ଏକ ସ୍ବତନ୍ତ୍ର ଗାଡିରେ ବସ୍ତା ପର୍ଯ୍ୟନ୍ତ ଅଣାଯାଇଥିଲା। ବିଭିନ୍ନ ସଙ୍ଗଠନ, ଅବସରପ୍ରାପ୍ତ ସୈନିକ ସଂଘ, ବିଭିନ୍ନ ରାଜନୈତିକ ଦଳର ନେତୃବୃନ୍ଦ, ମାନ୍ୟଗଣ୍ୟ ବ୍ୟକ୍ତି, ସମାଜସେବୀ ସମେତ ଜନସାଧାରଣ ତାଙ୍କର ଶେଷଦର୍ଶନ କରିଥିଲେ। ତାଙ୍କର ସମ୍ମାନାର୍ଥେ ବସ୍ତାରେ ଦୋକାନ ବଜାର ସନ୍ଧ୍ୟା ପରେ ସ୍ବତପ୍ରବୃତଃ ଭାବେ ବନ୍ଦ କରାଯାଇଥିଲା।
