ନୂଆଦିଲ୍ଲୀ,୨୩।୫: କରୋନା ଯୋଗୁ କୃଷକମାନେ ବର୍ତ୍ତମାନ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି। ଏଭଳି ବିଭିନ୍ନ ସମସ୍ୟା ଲାଗି ପାଇକାରୀ ବଜାରରେ ଟମାଟୋର କିଲୋ ପ୍ରତି ଦର ୫ ଟଙ୍କାକୁ ଖସିଛି। ଏହି ସମୟରେ ଟମାଟୋର ପାଇକାରୀ ମୂଲ୍ୟ ୩ ବର୍ଷର ସର୍ବନିମ୍ନ ସ୍ତରକୁ ଖସିଥିବା ଜଣାପଡିଛି। ଦିଲ୍ଲୀ, ବାଙ୍ଗାଲୋର ଏବଂ ହାଇଦ୍ରାବାଦ ଭଳି ସହରରେ ଏଭଳି ସ୍ଥିତି ସାମ୍ନାକୁ ଆସିଛି। ସରକାରୀ ତଥ୍ୟ ମୁତାବକ ପାଇକାରୀ ବଜାରରେ ଶୁକ୍ରବାର ଏହାର ମୂଲ୍ୟ ପ୍ରାୟ ୪ ଟଙ୍କାରୁ ୧୦ ଟଙ୍କା ମଧ୍ୟରେ ରହିଥିବା ଦେଖାଯାଇଥିଲା। ଗତବର୍ଷ ସମାନ ସମୟରେ ଟମାଟୋର ଖୁଚୁରା ଦର ୩୦ରୁ ୪୦ ଟଙ୍କା ରହିଥିବା ବେଳେ ଏହା ଚଳିତ ବର୍ଷ ୧୦ ଟଙ୍କାକୁ ଖସିଛି। ଦିଲ୍ଲୀର ଆଜାଦପୁର ମଣ୍ଡିରେ ଗତ ବର୍ଷ ୨୨ ମେ’ରେ ଟମାଟୋର ଖୁଚୁରା ମୂଲ୍ୟ ୧୪.୩୦ ଟଙ୍କା ରହିଥିବା ବେଳେ ଏହା ହାଇଦ୍ରାବାଦରେ ୩୦ ଟଙ୍କାରୁ ଊର୍ଦ୍ଧ୍ୱରେ ରହିଥିଲା। କୋଭିଡ୍ ଏବଂ ଚାହିଦା ଖସିବା ଯୋଗୁ ଏଭଳି ସ୍ଥିତି ସାମ୍ନାକୁ ଆସିଥିବା ଜଣାପଡିଛି।