ବଅଁରପାଳ, ୨୯ା୫(ଡି.ଏନ.ଏ.)- ନାଲ୍କୋ ଆଶପଣ୍ଡରୁ ଗୁରୁବାର ପାଉଁଶଗୁଣ୍ଡ ଉଡିବାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇବା ସହ ଉତ୍ତେଜନା ଦେଇଦେଇଛି। ପ୍ରତିବାଦରେ କୁକୁଡାଙ୍ଗ ଓ କୁରୁଡୁଲ ଗ୍ରାମବାସୀ ଆଶପଣ୍ଡ ସମ୍ମୁଖରେ ଆନ୍ଦୋଳନ କରିଥିଲେ। ଏହି ସମୟରେ ଆନ୍ଦୋଳନକାରୀ ୪ ନାଲ୍କୋ ଅଧିକାରୀ ଓ ଅନ୍ୟ କେତେଜଣ କର୍ମଚାରୀଙ୍କୁ ମାଡ଼ ମାରିଥିବା ଥାନାରେ ଅଭିଯୋଗ ହୋଇଛି। ଏଥିସହ ଆହତ କର୍ମଚାରୀ ନାଲ୍କୋ କର୍ତ୍ତୃପକ୍ଷଙ୍କୁ ମଧ୍ୟ ଲିଖିତ ଭାବେ ଜଣାଇଛନ୍ତି।
ଘଟଣାରୁ ପ୍ରକାଶ, ଗୁରୁବାର ଅପରାହ୍ନରେ ନାଲ୍କୋ ଆଶପଣ୍ଡରୁ ପାଉଁଶ ଉଡିଥିଲା। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ବାରମ୍ବାର ଏପରି ପାଉଁଶ ଉଡି ଲୋକେ ହଇରାଣ ହେଉଥିଲେ ହେଁ ପ୍ରକଳ୍ପ ପକ୍ଷରୁ ପ୍ରତିକାର ବ୍ୟବସ୍ଥା କରାଯାଉ ନ ଥିବା ଅଭିଯୋଗକରି ଉପରୋକ୍ତ ୨ ଗ୍ରାମର ଲୋକେ ଆଶପଣ୍ଡ ସମ୍ମୁଖରେ ଆନ୍ଦୋଳନ କରିଥିଲେ। ପରେ ନାଲ୍କୋର ନିଷିଦ୍ଧାଞ୍ଚଳ ପଲ୍ୟୁସନ କଣ୍ଟ୍ରୋଲ ୟୁନିଟ ପରିସରରେ ଆନ୍ଦୋଳନକାରୀ ପଶି ସେଠାରେ ଉପସ୍ଥିତ ୪ ଜଣ ଅଧିକାରୀ ଓ କେତେକ କର୍ମଚାରୀଙ୍କୁ ମାଡ଼ ମାରିଥିବା ସନ୍ଧ୍ୟାରେ ନାଲ୍କୋ ପକ୍ଷରୁ ଥାନାରେ ଅଭିଯୋଗ ହୋଇଛି। ଅଭିଯୋଗ କ୍ରମେ ନଂ. ୬୦/୨୦ ରେ ମାମଲା ରୁଜୁ କରି ତଦନ୍ତ ଚଳାଇଥିବା ନାଲ୍କୋ ପୋଲିସ କହିଛି। ଏହି ଘଟଣାକୁ ନାଲ୍କୋ ଶ୍ରମିକ କଂଗ୍ରେସ ୟୁନିୟନର କାର୍ଯ୍ୟକାରୀ ସଭାପତି ବିଭବ ଜେନା, ନାଲ୍କୋ ଅଫିସର୍ସ ଆସୋସିଏଶନର ସାଧାରଣ ସମ୍ପାଦକ ନଳିନୀ ପଣ୍ଡା, ଉପ ସଭାପତି ବନମାଳୀ ସେଠୀ, ସହ ସମ୍ପାଦକ କେ. କେ. ବେହେରା ପ୍ରମୁଖ ନିନ୍ଦା କରିବା ସହ ମାଡ଼ ମାରିଥିବା ଅଭିଯୁକ୍ତଙ୍କୁ ଗିରଫ ପାଇଁ ଦାବି କରିଛନ୍ତି।