ଜିଲାରେ କୋଇଲାକୁ ଜାଳେଣି ଭାବେ ବ୍ୟବହାର କରୁଥିବା ଅନେକ ଶିଳ୍ପାନୁଷ୍ଠାନ ରହିଛି। ଏହି ଶିଳ୍ପାନୁଷ୍ଠାନରୁ ପ୍ରତିଦିନ ରାସାୟନିକ ମିଶ୍ରିତ ଶହ ଶହ ଟନ ପାଉଁଶ (ଫ୍ଲାଏଆଶ୍) ବାହାରୁଛି। ସେହି ପାଉଁଶ ଏବେ ଶିଳ୍ପାନୁଷ୍ଠାନଗୁଡ଼ିକ ପାଇଁ ବୋଝ ପାଲଟିଥିବା ବେଳେ ଜିଲାବାସୀ ପ୍ରଦୂଷଣର ବିଷବଳୟ ଭିତରେ ଘାଣ୍ଟି ହେଉଛନ୍ତି। ଶିଳ୍ପାନୁଷ୍ଠାନଗୁଡ଼ିକ କାରଖାନାରୁ ନିର୍ଗତ ପାଉଁଶକୁ ଶତପ୍ରତିଶତ ଉପଯୋଗ କରିବାରେ ସକ୍ଷମ ହୋଇନାହାନ୍ତି। ଏଥିପାଇଁ ପ୍ରାୟ ୮୦ରୁ ୯୦ ପ୍ରତିଶତ ପାଉଁଶକୁ ନିଜସ ଆଶ୍ପଣ୍ଡଗୁଡ଼ିକରେ ଠୁଳ କରୁଛନ୍ତି। ବାକି ୧୦ରୁ ୨୦ ପ୍ରତିଶତ ପାଉଁଶକୁ ପ୍ରତିଦିନ ଉପଯୋଗ ପାଇଁ ପରିବହନ ସଂସ୍ଥା ଜରିଆରେ ବିଭିନ୍ନ ନିର୍ମାଣାଧୀନ ପ୍ରକଳ୍ପ, ଖାଲୁଆ ଜମି ଓ ଇଟା କାରଖାନାଗୁଡ଼ିକୁ ପଠାଉଛନ୍ତି। ପାଉଁଶ ଉପଯୋଗର ଏତାଦୃଶ ନିୟମିତ ପ୍ରକ୍ରିିୟା ଯୋଗୁ ପ୍ରଦୂଷଣ ମାତ୍ରା ବଢ଼ି ଚାଲିଛି। ନଦୀ, ନାଳ ଓ ଚାଷଜମି କ୍ଷତିଗ୍ରସ୍ତ ହେଉଛି। ଜୀବଜଗତ ଓ ଜଳଚର ପ୍ରାଣୀ ରୋଗଗ୍ରସ୍ତ ହେଉଛନ୍ତି। ଏପରି କି ପାଉଁଶ ପଡ଼ୁଥିବା ସ୍ଥାନରେ ସବୁଜିମା ସୃଷ୍ଟିର ଆଶା ମଉଳି ଯାଉଛି। କମ୍ପାନୀଗୁଡ଼ିକର ଏତାଦୃଶ ପାଉଁଶ ଉପଯୋଗ ବ୍ୟବସ୍ଥା ଦ୍ୱାରା କିଛି ପରିବହନ ସଂସ୍ଥା ଲାଭାନ୍ବିତ ହେଉଛନ୍ତି। ମାତ୍ର ସାଧାରଣ ଲୋକେ ପାଉଁଶ ସଂସ୍ପର୍ଶରେ ଆସିି ବିଭିନ୍ନ ପ୍ରକାର ଶ୍ୱାସ ଓ ଚର୍ମଜନିତ ରୋଗରେ ଆକ୍ରାନ୍ତ ହେଉଛନ୍ତି। ଏଥିପାଇଁ ବିଭିନ୍ନ ସମୟରେ ଜନଅସନ୍ତୋଷ ସୃଷ୍ଟି ହେଉଛି। ଲୋକେ ବେଆଇନ ପାଉଁଶ ପରିବହନକୁ ବିରୋଧ କରି ଆନ୍ଦୋଳନ ପାଇଁ ରାଜରାସ୍ତାକୁ ଓହ୍ଲାଉଛନ୍ତି। ୨ବର୍ଷ ତଳର କଥା। ଏକ ଶିଳ୍ପାନୁଷ୍ଠାନର ପାଉଁଶ ପୋଖରୀ ଭାଙ୍ଗିଯିବା ଓ ଚାଷଜମି କ୍ଷତିଗ୍ରସ୍ତ ହେବାକୁ ନେଇ ଝାରସୁଗୁଡ଼ାରେ କାତିକେଲା ଗ୍ରାମବାସୀ ଆନ୍ଦୋଳନକୁ ଓହ୍ଲାଇଥିଲେ। ଏବେ ଅନ୍ୟ ଏକ ଶିଳ୍ପାନୁଷ୍ଠାନର ପାଉଁଶ ପୋଖରୀ ନିର୍ମାଣକୁ ନେଇ ଲଖନପୁର ବ୍ଲକ ତିଲିଆ ମୌଜା ଅନ୍ତର୍ଗତ ସଂସରାଟିକିରା ଗ୍ରାମବାସୀ ବିରୋଧ କରିଆସୁଛନ୍ତି। ଗଁାର ଏକ ସ୍ବୟଂ ସହାୟିକା ଗୋଷ୍ଠୀ ପାଉଁଶ ପ୍ରଦୂଷଣଜନିତ ସମସ୍ୟାକୁ ନେଇ ଜାତୀୟ ଗ୍ରୀନ ଟ୍ରିବ୍ୟୁନାଲ (ଏନ୍ଜିଟି)ର ଦ୍ୱାରସ୍ଥ ହୋଇଛି। ପୂର୍ବରୁ ଜନବସତି ଅଞ୍ଚଳରେ ବେଆଇନ ପାଉଁଶ ପକାଯିବାକୁ ନେଇ ଝାରସୁଗୁଡ଼ା ବ୍ଲକର ବିଭିନ୍ନ ସ୍ଥାନରେ ବ୍ୟାପକ ଜନଅସନ୍ତୋଷ ଦେଖିବାକୁ ମିଳିଥିଲା। ଏବେ ପାଉଁଶ ଚାଲାଣ ଯୋଗୁ ବ୍ରଜରାଜନଗର ପୌରାଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢି ଚାଲିଛି। ଅଞ୍ଚଳବାସୀ ଜନବସତି ସ୍ଥାନରେ ବେଆଇନ ପାଉଁଶ ପକାଯିବାକୁ ନେଇ ବାରମ୍ବାର ବିରୋଧ କରିଆସୁଛନ୍ତି। ତଥାପି ଜିଲାର ବିଭିନ୍ନ ସ୍ଥାନକୁ ପାଉଁଶ ପରିବହନ କାର୍ଯ୍ୟ ଜାରି ରହିଛି। ଜିଲାରେ ଥିବା ନିର୍ଦ୍ଦିଷ୍ଟ କେତେକ ଶିଳ୍ପାନୁଷ୍ଠାନରୁ ଦୈନନ୍ଦିନ ହଜାର ହଜାର ଟନ୍ ପାଉଁଶ ବର୍ଜ୍ୟ ବାହାରୁଛି। ଅଥଚ ଏହାର ଅଧିକ ଉପଯୋଗ ପାଇଁ ଜିଲାରେ ଆବଶ୍ୟକତା ଅନୁଯାୟୀ ସିମେଣ୍ଟ ଓ ଆଶ୍ବ୍ରିକ୍ସ (ଇଟା) କାରଖାନା ପ୍ରତିଷ୍ଠା ହୋଇପାରିନାହିଁ। ପାଉଁଶ ଉପଯୋଗୀଭିତ୍ତିକ ଶିଳ୍ପ ପ୍ରତିଷ୍ଠାକୁ ପ୍ରୋତ୍ସାହିତ କରାଯାଇପାରିଲେ କିଛି ମାତ୍ରାରେ ପାଉଁଶ ପ୍ରଦୂଷଣଜନିତ ସମସ୍ୟା ହ୍ରାସ ପାଇପାରନ୍ତା ଓ ବେକାର ଯୁବତୀଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ ବୋଲି ଅଞ୍ଚଳବାସୀ କହୁଛନ୍ତି।