ମୁମ୍ବାଇ,୧୯।୧୧: ମହାରାଷ୍ଟ୍ରରେ ସରକାର ଗଠନକୁ ନେଇ ଲାଗି ରହିଛି ଅସାମଞ୍ଜସ୍ୟ। ନୂଆ ସମିକରଣ ଅନୁଯାୟୀ ଶିବସେନା ଏନ୍ସିପି ଓ କଂଗ୍ରେସ ସହ ମିଶି ସରକାର ଗଠନ କରିବାକୁ ଚାହୁଁଛି। ହେଲେ ଏହାକୁ ନେଇ କଂଗ୍ରେସ କି ଏନ୍ସିପି ଏପର୍ଯ୍ୟନ୍ତ କୌଣସି ସ୍ପଷ୍ଟସୂଚନା ଦେଉନାହାଁନ୍ତି। ଏହା ଫଳରେ ଏବେ ଶିବସେନା ନେତା କ୍ରୋଧ ପ୍ରକାଶ କରିଛନ୍ତି। ସୋମବାର ଏନ୍ସିପି ମୁଖ୍ୟ ଶରଦ ପାଓ୍ବାର ଦିଲ୍ଲୀ ଯାଇ କଂଗ୍ରେସର ଅସ୍ଥାୟୀ ଅଧ୍ୟକ୍ଷା ସୋନିଆଙ୍କୁ ଭେଟିଥିଲେ। ଆଲୋଚନା ହେଉଥିଲା କି ଏହାପରେ ହୁଏତ ମହାରାଷ୍ଟ୍ରରେ ଶିବସେନା, କଂଗ୍ରେସ ଓ ଏନ୍ସିପି ମେଣ୍ଟ ସରକାର ଗଢିବାକୁ ନେଇ ସୋନିଆ ସହମତି ପ୍ରକାଶ କରିଥିବେ। ହେଲେ ସୋନିଆଙ୍କ ସହ ସାକ୍ଷାତ୍ ପରେ ପାଓ୍ବାର ସସ୍ପେନ୍ସକୁ ବଢାଇ ଦେଇଛନ୍ତି। ସେ କହିଛନ୍ତି ମହାରାଷ୍ଟ୍ରରେ ସରକାର ଗଠନକୁ ନେଇ ସୋନିଆଙ୍କ ସହ କିଛି ଆଲୋଚନା କରି ନାହାଁନ୍ତି। ଏମିତି କଥା ଶୁଣିବା ପରେ ଶିବସେନା ନେତା ସଞ୍ଜୟ ରାଉତ କହିଛନ୍ତି, ମହାରାଷ୍ଟ୍ରରେ ଶିବସେନା ସରକାର ଗଢିବ ଓ ମୁଖ୍ୟମନ୍ତ୍ରୀ ଆସନରେ ବସିବ। ଆଉ ଏହାକୁ ବୁଝିବାକୁ ପାଓ୍ବାରଙ୍କୁ ଆଉ କିଛି ଜନ୍ମ ଲାଗିବ।