ଅମ୍ରିତସର,୧୦।୨- ଭାରତରୁ ୬୦ ଜଣିଆ ସର୍କଲ କବାଡ଼ି ଦଳ ପାକିସ୍ତାନ ଦ୍ୱାରା ଆୟୋଜିତ ପ୍ରଥମ କବାଡ଼ି ବିଶ୍ୱକପ୍ ୨୦୨୦ରେ ଭାଗ ନେଇଛନ୍ତି। ଏହି ଇଭେଣ୍ଟ ସର୍କେଲ ଫର୍ମାଟରେ ଖେଳାଯାଏ। କ୍ରୀଡ଼ା ମନ୍ତ୍ରଣାଳୟଠାରୁ କୌଣସି ଅନୁମତି ନ ନେଇ ପାକିସ୍ତାନ ଗସ୍ତ କରିଥିବାରୁ ବିବାଦ ଦେଖାଦେଇଛି। ଇଭେଣ୍ଟ ପାଇଁ ଭାରତ ତା’ର କୌଣସି ଅଫିସିଆଲ ଦଳ ପଠାଇବାକୁ ମନା କରି ଦେଇଥିଲା। ଆମେଚର କବାଡ଼ି ଫେଡେରେଶନ ଅଫ୍ ଇଣ୍ଡିଆ (ଏକେଏଫ୍ଆଇ) ମଧ୍ୟ ମନ୍ତ୍ରଣାଳୟ ନିଷ୍ପତ୍ତିକୁ ବିରୋଧ କରି ନ ଥିଲା। ପ୍ରଥମ ଥର ପାକିସ୍ତାନ ଏଭଳି ଇଭେଣ୍ଟ ଆୟୋଜନ କରୁଛି। ଟୁର୍ନାମେଣ୍ଟ ପୋଷ୍ଟରରେ ୧୦ ଦେଶ ଅଂଶଗ୍ରହଣ କରୁଥିବା ଦେଖାଯାଇଛି। ଏଥିରେ ଭାରତ, ଅଷ୍ଟ୍ରେଲିଆ, ଇଂଲଣ୍ଡ, କାନାଡା, ଜର୍ମାନୀ, ଇରାନ, କେନିୟା, ସିରା ଲେଓନ ଓ ଆଜରବାଇଜାନ ଅଂଶଗ୍ରହଣ କରିବେ ବୋଲି କୁହାଯାଇଥିଲା। ୮ ଦିନ ଧରି ଚାଲିବାକୁ ଥିବା ଟୁର୍ନାମେଣ୍ଟ ରବିବାର ଲାହୋରସ୍ଥିତ ପଞ୍ଜାବ ଷ୍ଟାଡିୟମରୁ ଆରମ୍ଭ ହୋଇଛି। ଚାମ୍ପିୟନ ଦଳକୁ ୧ କୋଟି ପାକିସ୍ତାନ ଟଙ୍କା ପୁରସ୍କାର ସ୍ବରୂପ ଦିଆଯିବ। ସର୍କେଲ ଫର୍ମାଟର କବାଡ଼ି ପ୍ରାୟତଃ ପଞ୍ଜାବରେ ଖେଳାଯାଏ। ଏଥିରେ ୧୦ ଜଣ ଖେଳାଳି ଥାଆନ୍ତି। ୪ ଜଣ ବଦଳ ଖେଳାଳିଙ୍କୁ ମଧ୍ୟ ରଖାଯାଇଥାଏ। ଭାରତରୁ ୬୦ ଖେଳାଳିଙ୍କୁ ଆମନ୍ତ୍ରଣ ଦିଆଯାଇଥିବାରୁ ପାକିସ୍ତାନରେ ମଧ୍ୟ ବିବାଦ ଦେଖାଦେଇଛି। ଏ ନେଇ ପାକିସ୍ତାନ ସ୍ପୋଟର୍ସ ବୋର୍ଡ (ପିଏସ୍ବି)କୁ ଦାୟୀ କରିଛି ପାକିସ୍ତାନ ଆମେଚର ସର୍କେଲ କବାଡି ଫେଡେରେଶନ (ପିଏସିକେଏଫ୍)।