ଇସଲାମାବାଦ୍,୧୧।୯: ପାକିସ୍ତାନରେ ଏଚ୍ଆଇଭି ଆତଙ୍କ ଦେଖାଦେଇଛି। ଗତ ୧୦ ବର୍ଷ ମଧ୍ୟରେ ଏଚ୍ଆଇଭି ସଂକ୍ରମିତଙ୍କ ସଂଖ୍ୟା ୧୩ ପ୍ରତିଶତ ବୃଦ୍ଧି ପାଇ ଲକ୍ଷେ ୬୦ ହଜାରରେ ପହଞ୍ଚିଛି। ୨୦୧୦ରେ ଏଭଳି ସଂକ୍ରମିତଙ୍କ ସଂଖ୍ୟା ୬୭ ହଜାର ଥିଲା ବୋଲି ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି। ଦେଶରେ ଏଚ୍ଆଇଭି ସଂକ୍ରମଣ ସମଲିଙ୍ଗୀ ବ୍ୟକ୍ତି ଏବଂ ଯୌନ କର୍ମୀଙ୍କ ଯୋଗୁ ବଢୁଥିବା ରିପୋର୍ଟ ପ୍ରକାଶ ପାଇଛି। ୨୦୧୫ରୁ ୨୦୧୮ ଗତ ୩ ବର୍ଷ ମଧ୍ୟରେ ୧୪ ବର୍ଷ ବୟସ୍କ ୧୫ ହଜାର ଏହା ଦ୍ୱାରା ସଂକ୍ରମିତ ହୋଇଛନ୍ତି। ସେହିପରି ୧୫ ବର୍ଷ ବୟସ୍କ ୩୭ ହଜାରଙ୍କୁ ଏଚ୍ଆଇଭି ପଜେଟିଭ୍ ଭାବେ ଚିହ୍ନଟ କରାଯାଇଛି। ଦେଶରେ ଏଚ୍ଆଇଭି ସଂକ୍ରମିତ ୪୮ ହଜାର ମହିଳା ଅଛନ୍ତି ବୋଲି ଜାତିସଂଘ ରିପୋର୍ଟରେ କୁହାଯାଇଛି। ନିଶାଦ୍ରବ୍ୟ ପାଇଁ ବ୍ୟବହାର ହେଉଥିବା ସିରିଞ୍ଜ୍ ଯୋଗୁ ଏଚ୍ଆଇଭିଙ୍କ ସଂଖ୍ୟା ୨୧ ପ୍ରତିଶତ ବୃଦ୍ଧି ପାଇଛି। ସେହିପରି ଯୌନକର୍ମୀଙ୍କ ଯୋଗୁ ୩.୮ ପ୍ରତିଶତ ଏବଂ ସମଲିଙ୍ଗୀ ସମ୍ପର୍କ ଯୋଗୁ ଏହା ୩.୭ ପ୍ରତିଶତ ବଢ଼ିଥିବା କୁହାଯାଉଛି। ଲରକାନା ଜିଲାରେ ଚଳିତ ବର୍ଷ ୮ ଶହ ନୂଆ ଏଚ୍ଆଇଭି ସଂକ୍ରମିତ ହୋଇଥିବା ରିପୋର୍ଟ ପ୍ରକାଶ ପାଇଛି।