ଇସଲାମାବାଦ୍,୨୪।୧୧: ପାକିସ୍ତାନର ଗଣତନ୍ତ୍ରର ଚତୁର୍ଥ ସ୍ତମ୍ଭ କୁହାଯାଉଥିବା ଗଣମାଧ୍ୟମ ସୁରକ୍ଷିତ ନୁହେଁ। ଗତ ୬ ବର୍ଷରେ ଏଠାରେ କାର୍ଯ୍ୟରତ ୩୩ ଜଣ ଗଣମାଧ୍ୟମ ପ୍ରତିନିଧିଙ୍କୁ ହତ୍ୟା କରାଯାଇଛି। ଏନେଇ ଫ୍ରିଡମ୍ ନେଟ୍ଓ୍ବାର୍କ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ପାକିସ୍ତାନ ପ୍ରେସ୍ ଫାଉଣ୍ଡେସନ୍ ଅନୁସାରେ ଦେଶରେ ୪୮ ଗଣମାଧ୍ୟମ ପ୍ରତିନିଧିଙ୍କୁ ବିଭିନ୍ନ କାରଣରୁ ହତ୍ୟା କରାଯାଇଛି। ସେହିପରି ୧୭୧ ଜଣଙ୍କ ଉପରେ ଆକ୍ରମଣ ହୋଇଛି। ସେମାନଙ୍କ ମଧ୍ୟରୁ ୭୭ ଜଣଙ୍କ ଉପରେ ଛୋଟ ଧରଣର ଆକ୍ରମଣ କରାଯାଇଛି। ଏଭଳି ଆକ୍ରମଣ ଘଟଣାରେ ୧୮ ଜଣଙ୍କୁ ଗିରଫ କରାଯାଇଥିବାବେଳେ ୩୬ ଜଣଙ୍କ ନାମରେ ମାମଲା ଦାଏର ହୋଇଛି। ସେହିପରି ୨୬ ଜଣଙ୍କୁ ଅଭିଯୋଗ ଆଧାରରେ ଅଟକ ରଖାଯାଇଥିବା ଏହି ରିପୋର୍ଟରେ ପ୍ରକାଶ ପାଇଛି। ୨୦୧୯ ପ୍ରେସ୍ ଇଣ୍ଡେକ୍ସ୍ରେ ପୃଥିବୀର ୧୮୦ଟି ଦେଶ ମଧ୍ୟରୁ ପାକିସ୍ତାନ ୧୪୨ସ୍ଥାନରେ ରହିଛି।