କରାଚୀ,୯।୬(ପି.ଟି.): ଆଗାମୀ ଇଂଲଣ୍ଡ ଗସ୍ତ ପାଇଁ ପାକିସ୍ତାନ କ୍ରିକେଟ ବୋର୍ଡ (ପିସିବି) ନୂଆ ବ୍ୟାଟିଂ ଓ ବୋଲିଂ କୋଚ୍ ନିଯୁକ୍ତ କରିଛି। ପିସିବି ପୂର୍ବତନ ବ୍ୟାଟ୍ସମ୍ୟାନ ୟୁନିସ୍ ଖାନଙ୍କ ବ୍ୟାଟିଂ କୋଚ୍ ଓ ପୂର୍ବତନ ସ୍ପିନର ମୁସ୍ତାକ ଅହମ୍ମଦଙ୍କୁ ବୋଲିଂ କୋଚ୍ ରୂପେ ନିଯୁକ୍ତ କରିଛି। ମଙ୍ଗଳବାର ପିସିବି ତରଫରୁ ଏ ନେଇ ଘୋଷଣା କରାଯାଇଛି।
୪୨ ବର୍ଷୀୟ ୟୁନିସ୍ ୧୧୮ଟି ଟେଷ୍ଟ ଖେଳି ୧୦,୦୯୯ ରନ ସଂଗ୍ରହ କରିଛି। ସେ ମଧ୍ୟ ୩୧୩ ରନର ବ୍ୟକ୍ତିଗତ ସର୍ବାଧିକ ସ୍କୋର ହାସଲ କରି ଟେଷ୍ଟରେ ତ୍ରିଶତକ ହାସଲ କରିଥିଲେ। ସେତେବେଳେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ର଼୍ୟାଙ୍କିଙ୍ଗରେ ୧ ନମ୍ବର ବ୍ୟାଟ୍ସମ୍ୟାନର ମାନ୍ୟତା ପାଇଥିଲେ। ଇଂଲଣ୍ଡ ଗସ୍ତରେ ପାକିସ୍ତାନ ୩ ମ୍ୟାଚ୍ ବିଶିଷ୍ଟ ଟେଷ୍ଟ ଓ ପରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଖେଳିବା କାର୍ଯ୍ୟକ୍ରମ ରହିଛି। ଜୁଲାଇ ୮ ତାରିଖରୁ ଟେଷ୍ଟ ସିରିଜ ଆରମ୍ଭ ହେବ।
ପାକିସ୍ତାନ ବ୍ୟାଟିଂ କୋଚ୍ ହେବା ପାଇଁ ୟୁନିସ ସବୁଠାରୁ ଯୋଗ୍ୟ ବ୍ୟକ୍ତି ବୋଲି ପିସିବି ମୁଖ୍ୟ କାର୍ଯ୍ୟନିର୍ବାହୀ ଓ୍ବାସିମ୍ ଖାନ କହିଛନ୍ତି। ସେହିପରି ପୂର୍ବତନ ଲେଗ୍ ସ୍ପିନର ମୁସ୍ତାକ ଅହମ୍ମଦ ୫୨ ଟେଷ୍ଟ ଖେଳି ୧୮୫ ଉଇକେଟ ହାସଲ କରିଛନ୍ତି। ସ୍ପିନ୍ କୋଚ୍ ହେବା ସହିତ ସେ ଦଳର ମେଣ୍ଟର ଦାୟିତ୍ୱରେ ମଧ୍ୟ ରହିବେ। ସେ ମଧ୍ୟ ପୂର୍ବରୁ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜର ସ୍ପିନ୍ ବୋଲିଂ କୋଚ୍ ଭାବେ ସଫଳତାର ସହ ଦାୟିତ୍ୱ ସମ୍ଭାଳିଛନ୍ତି। ଇଂଲଣ୍ଡର ପରିବେଶ ସହ ମୁସ୍ତାକ ବେଶ୍ ଅଭ୍ୟସ୍ତ। ସେ ମଧ୍ୟ ସେଠାରେ ଦୀର୍ଘ ସମୟ ରହି କାଉଣ୍ଟି କ୍ରିକେଟ ଖେଳିବା ସହ ଇଂଲଣ୍ଡ ଦଳ ସହ କାର୍ଯ୍ୟ କରିଛନ୍ତି। ତାଙ୍କ ଅଭିଜ୍ଞତାରୁ ପାକିସ୍ତାନ ଫାଇଦା ଉଠାଇପାରିବ ବୋଲି ଓ୍ବାସିମ କହିଛନ୍ତି। ମେଣ୍ଟର ଭାବେ ସେ ମୁସ୍ତାକ ମୁଖ୍ୟ କୋଚ୍ ମିସ୍ବା ଉଲ୍ ହକ୍ଙ୍କୁ ମ୍ୟାଚ୍ ପାଇଁ ଯୋଜନା ଓ ପ୍ରସ୍ତୁତିରେ ସହାୟତା ପ୍ରଦାନ କରିବେ। ଦ୍ରୁତ ବୋଲିଂ କୋଚ୍ ଓ୍ବାକର ୟୁନିସ ମଧ୍ୟ ଏହି ଗସ୍ତରେ ଦାୟିତ୍ୱରେ ରହିବେ। ନୂଆ ଦାୟିତ୍ୱ ମିଳିଥିବାରୁ ୟୁନିସ୍ ଓ ମୁସ୍ତାକ ଖୁସି ଜାହିର କରିଛନ୍ତି। ୟୁନିସ ଓ ମୁସ୍ତାକଙ୍କ ନିଯୁକ୍ତିକୁ ସ୍ବାଗତ କରିଛନ୍ତି ହେଡ୍ କୋଚ୍ ମିସ୍ବା।